B.Ganbold
Төрийн албаны зөвлөлөөс 2020 онд хэрэгжүүлсэн ажлаа дүгнэх, ирэх оны ажлын төлөвлөлт, зорилтод тусгах зөвлөмж чиглэлийг өгч буй цуврал уулзалтыг өндөржүүлсэн бэлэн байдлын зэрэгт шилжсэн үед халдвар хамгааллын горим дор зохион байгуулж байна.
Цахимаар явагдаж буй эдгээр цуврал уулзалтаар төрийн албаны зөвлөлийн дарга, гишүүд, нийт яамдын Төрийн нарийн бичгийн дарга нар, Засгийн газрын 35 агентлагийн дарга удирдлагууд, аймаг, нийслэлийн 22 тамгын газрын дарга нар, хүний нөөцийн асуудал хариуцсан ажилтнуудад зөвлөмж чиглэл өгч ажиллалаа.
Төрийн албаны тухай хууль, бусад хууль тогтоомж, Монгол Улсын үндэсний аюулгүй байдлын үзэл баримтлал, “Алсын хараа-2050” урт хугацааны бодлогыг мөрдөж, үр дүн гарган ажиллах, мэргэшсэн чадварлаг хүний нөөцийн үндэсний тогтолцоог бүрдүүлэх, иргэдийн итгэлийг хүлээсэн ёс зүйт төрийн албыг төлөвшүүлэх, цахим засаглалын хүрээнд стратеги, бодлого төлөвлөлтийн нэгдсэн платформ бий болгох талаарх асуудлыг хэлэлцэв.
Төрийн албаны хүний нөөцийн хангамж тасралтгүй сайжирч нөөцөд буй иргэд тусгай шалгалт өгч дэс түшмэлийн албан тушаалд шууд томилогдох боломжийг бүрдүүлж, үүний зэрэгцээ төрийн албан хаагчид байгууллага дотроо шилжин ажиллах зохицуулалтыг илүү уян хатан болгож буй талаар мэдээллээ. Түүнчлэн тэтгэвэр тогтоолгох насанд хүрсэн хэдий ч туршлагатай ахмадууд болон өндөр мэдлэг, ур чадвартай залуусын нөөц боломжийг төрийн албанд хэрхэн үр дүнтэй ашиглах асуудлыг судалж байгааг эдгээр уулзалтуудаар онцоллоо.
Шинэ цаг үе, шинэ орчинд шинэ сорилтуудыг даван туулахад төрийн албан хаагчдад шаардагдах ур чадварын талаар Төрийн албаны зөвлөлөөс үндэсний болон олон улсын өндөр түвшний экспертүүдтэй хамтран бодлогын баримт бичгийг гаргахаар ажиллаж байна. Ийнхүү 2021 онд төрийн албан хаагчдын ангилал тус бүрт тохирсон ур чадвар, хандлагын хүрээ төрийн албаны үйл ажиллагаанд хэрэгжиж эхэлнэ. Мөн удирдах албан тушаалтнуудад зориулсан сэтгэлзүйн тестийг туршин нэвтрүүлэхээс гадна төрийн албанд цоо шинээр нэвтрүүлж буй “Хүний нөөцийн аудит“-ыг бүх шатанд хэрэгжүүлж, ёс зүйн зөвлөлүүдийн үйл ажиллагааг хэвшүүлэх томоохон зорилтуудыг тавьж байна.
Төрийн албаны зөвлөлийн дарга Б.Баатарзориг яамдын Төрийн нарийн бичгийн дарга нарт хандаж эрх үүргээ хэрэгжүүлэхдээ инновац шингэсэн, шинийг эрэлхийлсэн, шийдэл гаргалгааг олж чаддаг чадварлаг төрийн албыг мерит зарчим, шатлан дэвших тогтолцоогоор төлөвшүүлж, эрхэлсэн салбарынхаа ажлыг өргөн хүрээнд алсын хараатайгаар удирдан манлайлж ажиллахыг зөвлөв.
Улс орон даяар өндөржүүлсэн бэлэн байдлын зэрэгт шилжсэн үед Төрийн албаны зөвлөлөөс гаргасан “Зохион байгуулалтын зарим арга хэмжээний тухай” 01 тоот зөвлөмжийн дагуу төрийн байгууллагууд ажлын байрандаа халдвар хамгааллын дэглэмийг сахих, ажлын цахим горимд шилжих зэргээр төрийн үйл ажиллагаа, үйлчилгээ тасралтгүй байх зарчмыг ханган ажиллаж байна.
