B.Ganbold
Нийслэл хот өнөөдөр /2020.12.23/ өглөөний 06:00 цагаас эхлэн хатуу хөл хорионд шилжлээ. Коронавируст халдварын улмаас Засгийн газар даваа гарагт /2020.12.21/ ээлжит бусаар хуралдаж 2020.12.23-ны өдрийн 06:00 цагаас эхлэн 2021.01.06-ны өдрийн 06:00 цаг хүртэл Бүх нийтийн бэлэн байдлын зэрэгт хэсэгчилсэн байдлаар шилжих шийдвэрийг гаргасан билээ.
Энэхүү 14 хоногийн хугацаанд зөвшөөрөгдсөн 15 салбарын үйл ажиллагааг хязгаарлагдахгүй бөгөөд аль болох цөөн хүн ажиллуулах чиглэл барих хэрэгтэйг УОК, НОК-оос анхааруулж байна.
Үйл ажиллагаа явуулах зөвшөөрөлтэй 15 салбар
- Эрчим хүч, дулаан сайжруулсан түлшээр хангах үйл ажиллагаа
- Хүнсний үйлдвэрлэл, худалдаа, түгээлт, тээвэрлэлтийн үйл ажиллагаа
- Газрын тосны бүтээгдэхүүн, түлшний хангамж, түгээлт, тээвэрлэлтийн үйл ажиллагаа
- Малын өвс, тэжээлийн түгээлт, тээвэрлэлтийн үйл ажиллагаа
- Улсын онц чухал болон стратегийн ач холбогдол бүхий объект, байгууллагын үйл ажиллагаа, тэдгээрийн хүч хэрэгслийн хангамж, тээвэрлэлт
- Нийтийн тээвэр, зөвшөөрөлтэй такси үйлчилгээ
- Хот, суурины ус хангах, ариутгах, татуургын ашиглалтын үйл ажиллагаа
- Эрүүл мэндийн байгууллага, эм, эмнэлгийн хэрэгсэл ханган нийлүүлэх үйл ажиллагаа
- Банкны үйл ажиллагаа
- Хэвлэл мэдээлэл, харилцаа холбоо, шуудангийн үйл ажиллагаа
- Тусгайлсан чиг үүрэг бүхий байгууллагын үйл ажиллагаа
- Хууль тогтоох байгууллага, шүүх, прокурор, өмгөөлөл, нотариатын үйл ажиллагаа
- Оршуулгын үйл ажиллагаа
- Гэр бүлийн хүчирхийлэлтэй тэмцэх, хүүхэд харах төв
- Төрийн захиргааны зарим байгууллага багтаж байна.
Эдгээр салбарт үйл ажиллагаа явуулдаг 23,900 иргэний автомашинд 2020 оны арванхоёрдугаар сарын 1-нээс өмнө олгогдсон QR код автоматаар идэвхжих аж. Гэхдээ QR кодыг шинээр заавал хэвлүүлэх ёстой. Өмнө нь код авсан бол smartcar.mn сайт руу орж, хэвлэж авах байна.
