B.Ganbold
Үндэсний цэцэрлэгт хүрээлэнд өнгөрөгч бямба гаригт бүх нийтээр мод тарих өдөрлөг боллоо. Тус өдөрлөгт 50 орчим байгууллага, 500 гаруй иргэд оролцон 2000 гаруй модны суулгацыг тарив.
Энэ талаар Үндэсний цэцэрлэгт хүрээлэн ОНӨТҮГ-ын дарга Ү.Оюунзул “Хавар, намрын мод тарилтаар 20 мянган суулгац бүхий мод, бутлагийг тарина. Мөн 100 мянган суулгацыг Туул голын эргийн хамгаалалтад зурвас үүсгэн тарихаар төлөвлөсөн. Ийнхүү 2022 онд 120 мянган модыг манай байгууллагын зүгээс тарьж ургуулахаар ажиллаж байна. Өнөөдөр 2000 мянган модыг иргэд, аж ахуй нэгжүүдтэйгээ хамтран тарилаа. Дараагийн өдөрлөг тавдугаар сарын 14-нд болох бөгөөд 100 гаруй байгууллагын оролцоотойгоор 8000 модыг тарина. “Тэрбум мод” үндэсний хөдөлгөөн өрнөж эхэлсэнтэй холбоотойгоор нийслэлийн хэмжээнд 120 сая модыг тарьж, ургуулах амлалтыг өгсөн. Үндэсний цэцэрлэгт хүрээлэнгийн хувьд нийслэлийн ногоон байгууламжийн ¼-г дангаараа бүрдүүлдэг тул уг ажилд манлайлан оролцоно. Бид тарьсан модоо жилийн дөрвөн улиралд арчилж, хамгаалдаг тул ургах баталгаа маш өндөртэй” гэв.
Үндэсний цэцэрлэгт хүрээлэнгийн хувьд Маршалын гүүрнээс Улиастайн гүүр хүртэл нийт 973 га талбайд оршдог. Нэгдүгээр ээлжийн 183 га талбайг тохижуулсан бөгөөд одоогийн байдлаар тус талбайн 85 хувьд ногоон байгууламж бий болгох, мод тарих ажлыг хийж байгаа юм. Тус байгууллагын тарьж, ургуулсан 150 мянга гаруй мод 98.5 хувийн амьдралтайгаар ургаж байгааг албаныхан онцолж байв.
Иргэд голт бор, улиас зэрэг арав гаруй нэр төрлийн модноос сонгон тарьж байгаа бөгөөд тус өдөрлөгт оролцож буй залуус сэтгэгдлээ хуваалцлаа.
“Смарт ложик” ХХК-ийн ерөнхий захирал Б.Анхбаяр:
“Манай компанийн залуус “Тэрбум мод” үндэсний хөдөлгөөнийг дэмжээд өнөөдөр хамт олноороо ирж, мод тарилаа. Үндэсний цэцэрлэгт хүрээлэнгийн зүгээс мод зөв тарих зөвлөгөөг сайтар өгсөн. Зааврын дагуу суулгацаа суулгахад амар байлаа. Цаашид уг байгууллагын зүгээс арчилгаа, хамгаалалтыг нь тогтмол хийнэ. Бид ч өөрсдийн тарьсан модоо эргэж, тойрно доо. Ер нь жил болгон бүх нийтийн мод тарих өдрүүдэд идэвхтэй оролцоно гэсэн бодолтой байна” хэмээв.
“EASY EdTech” ХХК-ийн захирал Б.Хангай:
“Манайх 2019 оноос хойш гурав дахь жилдээ “Хог биш мод тарья” хөтөлбөрөө хэрэгжүүлж байгаа. Уг хөтөлбөрийнхөө хүрээнд энэ удаагийн бүх нийтээр мод тарих хөтөлбөрт хамрагдаж, 30 улиас модыг тарилаа. Үндэсний цэцэрлэгт хүрээлэнгийн зүгээс мод тарих стандарт хэмжээтэй нүх болоод бусад шаардлагатай зүйлсийг бэлдчихсэн болохоор их амар байлаа” гэв.
Үндэсний цэцэрлэгт хүрээлэн ОНӨТҮГ-аас иргэдэд экологийн боловсрол олгох тал дээр санаачилга гарган ажилладаг. Тухайлбал, найман аймаг, есөн дүүрэг болоод томоохон аж ахуй нэгж байгууллагуудын 10000 гаруй хүнд ногоон байгууламжийн цогц сургалтыг хийжээ. Мөн мод тарьж, арчилж, ургуулах тухай гарын авлагыг гарган, “Green talk” цуврал видео зэрэг олон хэлбэрээр иргэдэд экологийн боловсрол олгоход анхаарч байна.
Түүнчлэн тавдугаар сарын 20-ны өдрөөс эхлэн Үндэсний цэцэрлэгт хүрээлэнгийн хоёр байршилд зүлэгжүүлэлтийн ажлыг эхлүүлэхээр төлөвлөжээ. Ийнхүү тус байгууллагын зүгээс иргэдийн амарч, зугаалах нөхцөлийг бүрдүүлэхэд анхааран ажиллах бөгөөд иргэд, олон нийтийг тус хэсгүүдэд соёлтой үйлчлүүлэхийг уриалж байв.
НИЙСЛЭЛИЙН СУРГАЛТ, СУДАЛГАА, ОЛОН НИЙТТЭЙ ХАРИЛЦАХ ГАЗАР
