B.Ganbold
Баянхонгор аймагт өчигдөр нэг иргэний түргэвчилсэн шинжилгээний хариу сул эерэг гарчээ. Тиймээс аймгийн Онцгой комиссоос цар тахлын тархалтаас урьдчилан сэргийлэх зорилгоор дараах салбарт ажилладаг ажилтан, албан хаагчдыг хувийн автомашинаараа зорчих хөдөлгөөний цагийг тогтоосон байна.
Тодруулбал, өнөөдөр буюу 11 дүгээр сарын 25-ны 07:00 цагаас эхлэн Гамшгаас хамгаалах бүх нийтийн бэлэн байдлын зэрэг цуцлагдах хүртэл хугацаанд
- эрчим хүчний,
- ус хангамжийн,
- эрүүл мэндийн,
- банкы төлбөр тооцооны,
- хэвлэл мэдээлэл,
- харилцаа холбоо,
- шуудангийн,
- тусгайлсан чиг үүрэг бүхий болон стратегийн ач холбогдох бүхий объект, байгууллагын,
- шүүх, прокурорын байгууллагуудын ажилтан, албан хаагчдыг хувийн автомашинаар замын хөдөлгөөнд оролцох хуваарийг 07:00-09:00, 17:00-19:00 цаг болгожээ.
Мөн хүнсний үйлдвэрлэл, худалдаа, эм, эмийн хэрэгсэл түгээлтийн, газрын тос, түлшний хангамжийн автомашинуудыг 09:00-11:00, 19:00-21:00 цагт замын хөдөлгөөнд оролцуулахаар тогтоож, бусад цагт явган хүн, автомашины хөдөлгөөнийг хязгаарласан байна.
Сэжигтэй тохиолдлын PCR шинжилгээний хариу өнөөдөр гарна.
