БНСУ-д хорио цээрийн хязгаарлалтын зэрэглэлийг нэмэгдүүллээ

БНСУ-ын УОК-оос Ковид-19 цар тахлын тохиолдол Сөүл хот болон орон нутагт (11/18-нд 313, 11/19-нд 343, 11/20-нд 363, 11/21-нд 386, 11/22-нд 330, 11/23-нд 271, 11/24-нд 320) эрчимтэй нэмэгдэж байгаатай холбогдуулан “Нийгмийн зай барих” хязгаарлалт, хорио цээрийн дэглэмийн зэрэглэлийг нэмэгдүүлэх шийдвэр гаргав.

Шийдвэрийн дагуу өчигдөр буюу арванэгдүгээр сарын 24-ний 00.00 цагаас арванхоёрдугаар сарын 7-ны өдрийн 24.00 цаг хүртэл 2 долоо хоногийн хугацаатай Сөүл хотод хорио цээрийн 2 дугаар шатлал, Жөнра муж, Гуанжу хотод 1.5 дугаар шатлалыг тус тус тогтоохоор болов.

БНСУ-ын Халдварт өвчин судлалын төвөөс нийслэл Сөүл хотод халдварын тохиолдол нэмэгдэх магадлал өндөр байгааг анхааруулж байна.

Иймд, Иргэд амны хаалт зүүх, хоорондоо 2 метрийн зай барьж харилцах, гараа угаах, аль болох олон нийтийн газраар явахгүй байх, олноор цуглахгүй байх, хувийн ариун цэврийг чанд сахих зэрэг хорио цээрийн журмыг үргэлжлүүлэн чанд сахиж, дараах зүйлийг анхаарна уу.
 

• Хорио цээрийн 2 дугаар шатлалд шилжүүлж байгаатай холбогдуулан гадуур холбогдох байгууллагуудын хяналт, шалгалт тогтмол хийгдэх тул олон нийтийн газраар явахгүй байх, өдөр тутмын өргөн хэрэглээний бараа бүтээгдэхүүн худалдан авахаас бусад тохиолдолд гэрээсээ аль болох гарахгүй байх, хувийн болон албан уулзалт, цуглаан, аяллыг хойшлуулах, цуцлах.
   
• Халуурах, ханиалгах, хоолой өвдөх зэрэг шинж тэмдэг илэрвэл эмнэлэгт шуурхай хандах, ингэхдээ БНСУ-ын Халдварт өвчин судлалын төвийн 1339 дугаарт залгасны дараа “4” товчлуурыг дарж гадаадын иргэдийг хариуцсан ажилтантай холбогдож заавар, зөвлөгөө авна уу.
   
• ЭСЯ-ны консулын зарим үйлчилгээг шуудангаар болон цахимаар авах боломжтой. Халдварт өртөхөөс урьдчилан сэргийлэх, эрсдэлийг бууруулах үүднээс халдварын тархалт намжтал, мөн Монгол Улсад 12 дугаар сарын 1-ний өдөр хүртэл хатуу хөл хорио тогтоосонтой холбогдуулан Консулын хэлтэст биеэр ирэхгүй байх, зайлшгүй шаардлагатай, нэн яаралтай бус бол иргэний бүртгэл, бичиг баримт захиалга, итгэмжлэл, нотариатын баталгаажуулалтыг түр азнахыг зөвлөж байна.

Эх сурвалж: МОНГОЛ УЛСААС БНСУ-Д СУУГАА ЭЛЧИН САЙДЫН ЯАМ