B.Ganbold
Их Британи, Энэтхэг худалдааны эргэлтийн хэмжээгээ нэг тэрбум фунт стерлингээр нэмэгдүүлэхийг зорьж байгаа бөгөөд ингэснээр хоёр улсын чөлөөт худалдааны тухай илүү өргөн хүрээг хамарсан хэлэлцээр байгуулах зам тавигдах юм хэмээн Их Британийн Ерөнхий сайд Борис Жонсон мэдэгдсэн байна.
Мөн Тэрбээр, “Түншлэлийн тухай шинэ хэлэлцээр, чөлөөт худалдааны тухай цогц гэрээг байгуулснаар ойрын арван жилд бидний худалдааны түншлэлийн хэмжээ хоёр дахин нэмэгдэж, хоёр улсын харилцаа шинэ түвшинд гарна” гэжээ.
Борис Жонсон Энэтхэгт нэгдүгээр сард айлчлахаар төлөвлөж байсан ч Их Британид халдварт өвчний нөхцөл байдал огцом муудаж, хөл хорио тогтоосны улмаас айлчлалыг хойшлуулсан байна. Харин дараагийн удаад Энэтхэгт цар тахал дэгдсэний улмаас айлчлалыг бүрмөсөн цуцалсан байна.
Дээр дурдагдсан мөнгөний тал гаруй нь буюу 533 сая фунт стерлинг нь Энэтхэгийн Их Британийн эдийн засагт оруулж буй хөрөнгө оруулалт байх аж. Ингэснээр Их Британийн технолог, эрүүл мэндийн салбарт 6.5 мянга гаруй ажлын байр шинээр бий болох боломжтой. Харин 240 сая фунт стерлинг нь Их Британийн нутаг дэвсгэрт байрладаг Энэтхэгийн Ийлдсийн судалгааны хүрээлэнгийн судалгаа шинжилгээний ажилд зориулагдах юм байна.
