С.Баяр, Ч.Сайханбилэг нарыг баярлуулан гомдоож, үргэлжлүүлэн хорихоор боллоо

0
136

Оюутолгойн хөрөнгө оруулалтын гэрээ болон Дубайн гэрээг үзэглэсэн Монгол Улсын 25 дахь Ерөнхий сайд С.Баяр, 28 дахь Ерөнхий сайд Ч.Сайханбилэг нарыг 461 дүгээр хорих ангид саатуулаад байгаа. Тэдний хоригдох хугацаа дуусч байгаа тул үргэлжлүүлэн хорих, суллах эсэхийг өчигдөр Баянзүрх, Сүхбаатар, Чингэлтэй дүүргийн шүүхэд хэлэлцлээ. Шүүх хуралд Ерөнхий сайд Ч.Сайханбилэг, С.Баяр нар онлайнаар оролцсон юм. Уг нь шүүхээс Ерөнхий сайд нарыг үргэлжлүүлэн хорих шаардлагагүй хэмээн үзэж батлан даалтад гаргахаар шийдвэрлээд байв. Тодруулбал, “Чингэлтэй дүүргийн Эрүүгийн хэргийн анхан шатны шүүхэд Нийслэлийн прокурорын газраас Ч.Сайханбилэг, С.Баяр нарт цагдан хорих таслан сэргийлэх арга хэмжээ авахуулах тухай саналыг анх 2018 оны дөрөвдүгээр сарын 11-ний өдөр ирүүлснийг хүлээн авч Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.3-д заасан үндэслэлээр Ч.Сайханбилэг, С.Баяр нарыг тус бүр 1 сарын хугацаагаар цагдан хорих таслан сэргийлэх арга хэмжээ авсан. Нийслэлийн прокурорын газраас Ч.Сайханбилэг, С.Баяр нарт цагдан хорих таслан сэргийлэх арга хэмжээ авсан хугацааг сунгуулах тухай санал ирүүлснийг энэ сарын 10-ны өдөр Чингэлтэй дүүргийн Эрүүгийн хэргийн анхан шатны шүүх хүлээн авч шүүх хуралдаанаар дараах шийдвэрийг гаргалаа. Үүнд Ч.Сайханбилэгт өмнө авсан цагдан хорих таслан сэргийлэх арга хэмжээг өөрчилж, Монгол Улсын хилээр гарахгүй байх хилийн хориг тавих таслан сэргийлэх арга хэмжээ авсан болно. С.Баярт өмнө авсан цагдан хорих таслан сэргийлэх арга хэмжээг өөрчилж, Монгол Улсын хилээр гарахгүй байх хилийн хориг тавих таслан сэргийлэх арга хэмжээ авсан болно. Шүүх хуралдаанд С.Баяр, Ч.Сайханбилэг нар нь цагдан хорих 461-р ангиас онлайнаар шууд холбогдож оролцсон болно” гэжээ.

Гэвч Прокурорын газраас дээрх шүүхийн шийдвэрийг эсэргүүцэж,  Чингэлтэй  дүүргийн ерөнхий шүүгчид гомдол гаргаад байна. Өөрөөр хэлбэл, Ерөнхий шүүгчид гомдол гаргах эрхийн хүрээнд дээрх гомдлыг гаргасан аж. Ерөнхий шүүгч ямар шийдвэр гаргахаас тэдний суллагдах эсэх нь шийдэгдэхээр болсон.

Гэвч өчигдөр 15.00 цагт эхэлсэн шүүх хурлаас тэднийг үргэлжлүүлэн хорих шийдвэрийг гаргав. Тодруулбал, Чингэлтэй дүүргийн Эрүүгийн хэргийн анхан шатны шүүхэд Нийслэлийн прокурорын газраас Ч.Сайханбилэг, С.Баяр, Б.Бадрал нарын цагдан хорих таслан сэргийлэх арга хэмжээний хугацааг сунгуулах тухай санал ирүүлснийг өнөөдөр буюу 2018.05.10-ны өдөр Чингэлтэй дүүргийн Эрүүгийн хэргийн анхан шатны шүүх хүлээн авч хэлэлцэн Ч.Сайханбилэг, С.Баяр, Б.Бадрал нарт өмнө авсан цагдан хорих таслан сэргийлэх арга хэмжээг өөрчилж Монгол Улсын хилээр гарахгүй байх хязгаарлалт тогтоох таслан сэргийлэх арга хэмжээ авсан болно. Уг шүүгчийн захирамжид хуульд заасан эрхийнхээ хүрээнд прокуророос Чингэлтэй дүүргийн Эрүүгийн хэргийн анхан шатны шүүхийн Ерөнхий шүүгчид гомдол гаргасныг хүлээн авч хянаад С.Баяр, Ч.Сайханбилэг, Б.Бадрал нарын таслан сэргийлэх арга хэмжээг өөрчилсөн шүүгчийн захирамж үндэслэл тодорхойгүй бус гэсэн үндэслэлээр уг шүүгчийн захирамжийг хүчингүйд тооцож, прокурорын гомдлыг хангаж шийдвэрлэлээ. Иймд С.Баяр, Ч.Сайханбилэг, Б.Бадрал нарыг тус бүрийн цагдан хорих хугацааг нэг сараар сунгасан болно хэмээн мэдэгдэв. Шүүх хуралд шүүгдэгч нарын өмгөөлөгч нар ирээгүй юм.

Сэтгэгдэл үлдээх

Please enter your comment!