ЯЛАЛТЫН 73 ЖИЛИЙН ОЙГООР МАРШАЛ ЖУКОВЫН ХӨШӨӨНД ХҮНДЭТГЭЛ ҮЗҮҮЛЛЭЭ

Агуаа их ялалтын 73 жилийн ойн баяр өнөөдөр тохиож байна. Энэхүү өдрийг оросын ард түмэн дэлхийн хоёрдугаар дайнд ялсан “Ялалтын баяр” хэмээн тэмдэглэн өнгөрүүлдэг билээ. Өнөөдөр ЗХУ-н дөрвөн удаагийн баатар, БНМАУ-н баатар Маршал Георгий Константинович Жуковын хөшөөнд цэцэг өргөж хүндэтгэл үзүүлэх ёслол боллоо. Цэцэг өргөх ёслолын арга хэмжээнд Гадаад харилцааны яамны сайд Д.Цогтбаатар, ЗХУ-н баатар, БНМАУ-н баатар Ж.Гүррагчаа, ОХУ-н Элчин сайдын яамны төлөөлөгчид,  БХЯ болон ЗХЖШ-н удирдлагууд, Монгол, Орос иргэдийн төлөөлөл оролцлоо. Мөн ЕБС-н сурагчид оролцон урлаг соёлын тоглолт үзүүлж Ю.А.Гагарины нэрэмжит Русский Лицей сургуулийн Кадетын нэгдүгээр ангийн хүүхдүүд цэргийн тангараг өргөлөө.

Г.К.Жуков нь 1939 оны Халх голын дайнд гарамгай гавьяа байгуулсныхаа төлөө ЗХУ-с анхныхаа Баатар цолыг авч байв. Энэ нь түүний дэлхийн хоёрдугаар дайнд үзүүлсэн ажилтын эхлэл байжээ.  Харин Халх голын дайны 30 жилийн ойгоор буюу 1969 онд БНМАУ-н Баатар цолыг авсан байна.

1981 онд уран барималч С.Доржпаламын эх загвараар цээж хөшөөг босгосон нь эдүүгээ Жуковын хөшөө хэмээн нийслэл хотод маань сүндэрлэн байдаг.

Сэтгэгдэл үлдээх

Please enter your comment!