Б.МӨНХБИЛЭГ: ЗАЛУУС ШОРТТОЙ ТӨРЛИЙГ СОНГООД БАЙГАА

0
4265

Бодибилдинг фитнессийн спорт манай улсад үүсч хөгжөөд багагүй хугацаа өнгөрч байна. Тэгвэл бид өнөөдийг хүртэл энэ спортыг булчин талаас нь л харж үзэж иржээ. Үнэн хэрэгтээ залуусын эрүүл мэнд болон гоо зүй тал дээр энэхүү спорт маань их ач тус өгдөг аж. Сүүлийн үед манай залуус өөрсдийн эрүүл мэнд бие галбирт ихээхэн анхаарч энэ төрлийн спортоор хичээллэх болсон байна. Тиймээс тэдний төлөөлөл болсон нэгэн залуутай ярилцлаа.

-Та өөрийгөө танилцуулна уу?

-Намайг Б.Мөнхбилэг гэдэг. Бодибилдингийн спортын Мэнс физик төрлөөр хичээллэдэг. Одоо “STEP UP” фитнесс клубын тамирчин, дасгалжуулагч.

-Энэ спортын тамирчин болно гэдэг асар их тэвчээр бас хөдөлмөр шаарддаг байх. Нөгөө талаас та бүхнийг дэмждэг байгууллага хэр байдаг вэ?

-Тэгэлгүй яахав. Тамирчин хүн бүр асар их тэсвэр хатуужил гаргаж байж амжилтад хүрдэг. Манай спорт гэхэд тэмцээн уралдаанд орохын тулд хоол хүнсээ сойх, тааруулах гээд бие сэтгэлийн тэвчээр их шаардана. Санхүүгийн хувьд ч хүндрэлтэй байдаг. Харин Монголын бодибилдинг фитнессийн нэгдсэн холбоо маань бидэнд ихээхэн тус болдог. Жишээ нь хоёр дахь удаагаа Ази тивийн аварга шалгаруулах тэмцээнийг эх орондоо зохион байгуулж байгаа нь тамирчин бидэнд замын зардлаас эхсүүлээд маш их хөнгөлөлт болж байгаа юм.

Манай улсад болж байгаа Ази тивийн аварга шалгаруулах тэмцээн нь Олон улсын IFBB холбооны томоохон тэмцээн юм. Энэхүү холбоо нь ч олон улсдаа нэр хүндтэй том холбоо. МБФНХолбоо нь Олон улсын IFBB холбооны харьяанд ажиллаж байгаа нь тамирчдад маш их тус дэм болдог. Тамирчин бидэнд авдаг шагнал мөнгөнөөс илүү нэр төр чухал. Энэ холбооны харьяа болсноор бид амжилттай оролцсон уралдаан бүрээсээ оноо цуглуулж Pro card-ын эзэн болох юм. Өөрөөр хэлбэл олон улсад хүлээн зөвшөөрөгдсөн өндөр зэрэглэлийн тамирчин болно гэсэн үг.

-Та энэ спортоор хичнээн жил хичээллэж байж амжилт гаргав?

-Би 2015 оноос эхлэн хичээллэж эхэлсэн. Хамгийн анх 2017 оны Мэнс физик төрлөөр хотын аварга шалгаруулах тэмцээнд оролцон хүрэл медаль хүртэж байв. Ингээд тус оныхоо улсын аварга шалгаруулах тэмцээнээс мөнгөн медаль хүртэж Азийн аваргад орох эрхээ авсан. 2017 онд Монгол улсад анх удаагаа зохиогдсон 51 дэх удаагийн ААШТ-д шагналт тавдугаар байрт шалгарч байв. Саяхан болж өнгөрсөн 2018 оны улсын аваргаас мөнгөн медаль хүртэж улсын аваргын хошой мөнгөн медалын эзэн боллоо.

-Асар богино хугацаанд том амжилт гаргажээ. Үүнд чинь нөлөөлсөн зүйл байдаг уу?

-Энэ бол манай клубын тамирчдын багийн амжилт юм. Би ганцаараа ийм амжилт үзүүлсэн юм биш. Манай тамирчид бүгд л сайн бэлдэж бие биедээ их дэм болдог. Жишээ нь, манай клубын тамирчин н.Төгөлдөр мөн энэ төрлөөр 2017, 2018 оны улсын хошой  аварга болсон. Мөн 2017 онд Азийн аварга болж байлаа. Тэгэхээр бид бүгд нэг түвшинд л яваад байгаа биз. Би өөрөө үйлчилгээний салбарт ажиллаж байгаа болохоор үйлчлүүлэгчдийнхээ ая тух, сэтгэл ханамжийг ихэд чухалчилдаг. Манай “STEP UP” клубын гишүүд их нийтэч. Дан ганц энэ спортоор нөхөрлөөд зогсохгүй хамт явган аялал хийх, заал авах зэрэг ажлуудыг зохион байгуулдаг. Хүн хүнтэйгээ гоё сайхан харьцаж байж л өөртөө татаж итгэлийг нь олно шүү дээ. Энэ олон клуб дундаас үйлчлүүлэгчдээ сэтгэл ханамжтай үлдээхийг л хүсдэг. Тиймээс үйлчлүүлэгчиддээ ихээхэн анхаарч ажиллаж байна.

-Энэ спортоор хичээллэсний ач тус чухам юундаа байна вэ?

-Хамгийн гол нь эрүүл мэнд шүү дээ. Хүн хөгширч үхдэггүй хөшиж үхдэг гэдэг үг байдаг байхаа. Тиймээс хүнд хөдөлгөөн зайлшгүй хэрэгтэй. Мөн сүүлийн үед залуус маань биеийн зөв галбирт ихээхэн анхаарах болсон. Эрэгтэй ч бай эмэгтэй ч бай хүн зөв тэгш бие хаатай байх нь хөөрхөн царай төрхөөс илүү асар их гоо зүйн мэдрэмж юм. Энэ спортоор хичээллээд зөв хооллож сурна, мөн архи тамхи зэрэг хорт зуршлаасаа өөрийн эрхгүй татгалздаг болдог юм.

-Бодибилдинг фитнесс гэхээр л нэг их булчин болсон хүн төсөөлөгддөг. Харин энэ Мэнс физик төрөл арай өөр байна уу?

-Тиймээ энэ төрөл маань өөрөө их булчинлаг байж болохгүй гэж үздэг. Хүн өөрийн биедээ таарсан булчинтай байх ёстой. Мэнс физик нь бодибилдингийн спортын залуу төрөл юм. Гэсэн ч дэлхийд төдийгүй манай улсад маш их эрч хүчтэй хөгжиж байна. Залуус энэ ангиллыг шорттой төрөл гэдгээр нь их мэддэг болсон шүү.

 

 

Сэтгэгдэл үлдээх

Please enter your comment!