Өдөр тутмын сонинуудын холбооноос мэдэгдэл гаргажээ

0
274

Монголын Сэтгүүлчдийн Нэгдсэн эвлэлийн Их хурал болж байгаатай холбоотойгоор Өдөр тутсын сонинуудын холбооноос мэдэгдэл гаргажээ. Мэдэгдэлд “2004 онд үүсгэн байгуулагдсан Өдөр тутмын сонинуудын холбоо түүхэндээ анх удаа нэгдмэл бодлогоор МСНЭ-ийн Их хуралд оролцон албан ёсоор холбооныхоо нэр дэвшигчийг зарлах болсон шалтгааныг тайлбарлах нь сэтгүүлч, уншигчдынхаа өмнө хүлээсэн бидний үүрэг гэж үзлээ. 2018 оны хоёрдугаар сарын 7-ныг хүртэл салангид байр суурьтай байсан манай холбооны гишүүд МСНЭ-ийн Их хурлын өмнө газар авч буй бохир заваан үйлдэлд бухимдсан нь нийтлэг дүр төрх биз ээ. Тиймээс ч зарим нэг гишүүдийн санаачлагаар Өдөр тутмын сонинуудын холбооны хурлыг 2018 оны хоёрдугаар сарын 6-нд дотооддоо зарлан дараах өдөр нь хуралдсан болно.

Төлөөлөгчөө сонгох хурлын үеэр манай холбооноос хоёр гишүүн дэвшиж, холбооны Ерөнхийлөгч Э.Долгион олонхийн саналыг авсан учраас нэг дуу хоолойгоор нэр дэвшигчээ дэмжих шийдвэрт хүрсэн. МСНЭ-ийн идэвхит гишүүн байгууллагын хувьд сэтгүүл зүйн дээд байгууллагыг улс төрийн нам авах гэсэн өргөн цар хүрээтэй компанит үйл ажиллагааг бид эсэргүүцсэн. Хэн нэгэн аль нэг намын эрх ашигт тааруулахын тулд 67 жилийн түүхтэй МСНЭ-ийн дүрмийг өөрчлөхийн төлөө бус уг байгууллагын чиглэл, зорилго, үйл ажиллагаа, ёс зүйд нь салхи оруулах зорилготой Э.Долгионы мөрийн хөтөлбөрийг дэмжсэн.

Тэрбээр Өдөр тутмын сонинуудын холбоог 2017 оны хоёр сарын 23-наас удирдаж эхлэн бидний итгэлийг даасан ажлуудыг хийсэн. Э.Долгион сонин, телевиз, сайт гээд сэтгүүл зүйн бүх салбарт нийт 14 жилийн ажилласан туршлагатай сэтгүүлч. Мөн Монголын мэдээллийн салбарт “Блүүмбэрг ТВ”, “Засгийн газрын мэдээ” сонин, Форбес сэтгүүл, Asia mining сэтгүүл, Finincial Times сонин бүхий ёс зүйтэй мэдээллийн цогц медиа салбарыг нэр төртэй, амжилттайгаар удирдаж ирсэн, олон улсын хэвлэл мэдээллийн стандартыг анхлан нутагшуулсан чадварлаг зохион байгуулагч, залуу удирдагч, менежер. Тиймээс Монголын өдөр тутмын сонинуудын холбооны гишүүд чадварлаг сэтгүүлч, менежер Э.Долгионыг Монголын Сэтгүүлчдийн нэгдсэн эвлэлийн Ерөнхийлөгчид албан ёсоор нэр дэвшүүлж байна” гэжээ.

Сэтгэгдэл үлдээх

Please enter your comment!