Хүйтний эрч чангарч, цасаар шуурах нь

0
130

Ес эхэллээ. Өвлийн улирлын оргил хүйтний цагийг “ес эхлэх өдөр” буюу арванхоёрдугаар сарын 22-ноос эхлэн есөн ес 81 хоногоор тооцдог уламжлалтай. Улмаар есөн есөө гурав гурваар нь багцалж “нялх гурав”, “идэр гурав”, “хөгшин гурав” хэмээн нэрлэнэ.

Тэгвэл өнөөдөр ес эхэлж байна. Цаг агаарын урьдчилсан мэдээгээр Увс, Завханы хойд хэсгээр 24-29 градус, Алтайн өвөр говиор 10-15 градус, бусад хэсгээр 18-23 градус хүйтэн байна. Сарын сүүлээр буюу ирэх 7 хоногоос хүйтний эрч чангарч Идэр, Тэсийн хөндий, Хүрэн бэлчир орчмоор шөнөдөө 42-47 градус, өдөртөө 28-33 градус, Алтайн өвөр говиор шөнөдөө 21-26 градус, өдөртөө 10-15 градус хүрч хүйтрэх гэнэ. Харин бусад нутгаар шөнөдөө 29-34 градус, өдөртөө 18-23 градус хүйтэн байх нь.

Энэ сард Баян-Өлгий, Ховдын хойд, Увсын баруун, Говь-Алтай, Баяхонгорын өмнөд хэсгээр уур амьсгалын дунджаас бага, Завханы зүүн, Баянхонгорын баруун хойд хэсгээр уур амьсгалын дунджаас ахиу, бусад нутгаар дунджийн орчим цас орох төлөвтэй гэж Цаг уур, орчны шинжилгээний газраас мэдээлсэн. Энэ үед салхи зарим газраар 12-14м/с, нутгийн өмнөд хэсгээр 18-20 м/с хүрч ширүүсэх төлөвтэйг онцлоё.

Түүнчлэн уур амьсгалын дунджаар Увс, Булганы хойд, Ховдын өмнөд, Завханы зүүн, Хөвсгөлийн баруун, Хэнтийн зүүн хойд, Дорнодын зүүн өмнөд, Өмнөговийн баруун хойд хэсэг, Сэлэнгийн нутгаар 2-3 мм, бусад нутгаар 2 мм хүртэл цас ордгийг мэргэжилтнүүд анхаарууллаа.

 

12.22-12.30  Нэг есд нэрмэл архи хөлдөнө
12.31-01.08  Хоёр есд хорз архи хөлдөнө
01.09-01.17  Гурван есд гунан үхрийн эвэр хуга хөлдөнө
01.18-01.26  Дөрвөн есд дөнөн үхрийн эвэр хуга хөлдөнө
01.27-02.04  Таван есд тавьсан будаа хөлдөхгүй
02.05-02.13  Зургаан есд зурайсан зам гарна
02.14-02.22  Долоон есд дов толгой борлоно
02.23-03.02  Найман есд нал шал болно
03.03-03.11  Есөн есд ерийн дулаан болно гэдэг билээ.

Сэтгэгдэл үлдээх

Please enter your comment!