Үйлдвэрийн дарга нартаа “гологддог” гэх Б.Цэнгэлийг Н.Цэрэнбатаар солих уу?

Төрийн өмчит үйлдвэрийн газруудын чих халууцуулсан хатуу мэдээнүүд тасралтгүй хөвөрсөн өдрүүдэд Төрийн өмчийн бодлого зохицуулалтын газрын дарга Б.Цэнгэл татан буугдчихсан агентлагийн дарга шиг л чимээ аниргүй. Сүх далайтал үхэр амар гэгчээр бусдын үг, үүрэг даалгавраар явсаар сурчихсан бололтой. Өөр ч яалтай.

Намтар, ажлын туршлага мэдээлэл нь Ерөнхий сайд У.Хүрэлсүхийн өөдлөн дэвжсэн, уруудан доройтсон он цагтай яг таг давхцдаг шатрын “хөвгүүд”-ийн нэг. Улс төрийн албан тушаал ороо бусгаа, тогтворгүй үеэр олон ч байгууллагын хаалгыг нээж, бас хаасан. Жил хүрэхгүй хаасан хаалга түүнд олон. Улс төрийнхөн дундаа “Гүзээ” Цэнгэл гэх хочтой тэрбээр 2012 онд орон нутгийн сонгуулиар Дархан-Уул аймагт өрсөлдсөн ч өвдөг шороодож байв. Засаг ноёны сэнтийд санаархсан ч дарханчууд түүнийг сонгоогүй хэрэг. Бусдаар Ерөнхий сайд У.Хүрэлсүхийн дэвээ шаваа бүрээр далны хуудас гэдэг шиг албан тушаалын хуудас хүртэж л яваа эр. Түүний хүртэж буй олон хуудасны нэг нь өнөөгийн Төрийн өмчийн бодлого зохицуулалтын газар.

Өөрөөр хэлбэл, төрийн өмчит болон төрийн өмчийн оролцоотой хуулийн этгээдэд сайн засаглалыг хөгжүүлэх замаар өмчийн үр өгөөжийг нэмэгдүүлэх, худалдан авах ажиллагааг олон улсын жишигт хүргэн, ил тод өрсөлдөх тэгш боломжийг хангах буюу чухамдаа төрийн өмчийг зузаатгаж, саалийн үнээ сайтар бэлтгээх үүрэгтэй газрын дарга юм.

Харамсалтай нь, нам доторх бүлэг фракцийн “шатрын хөлөг” дээр түлхүүлж явдаг “хүү” энэ чухал байгууллагын үүрэг зорилгыг мэддэг болов уу. Магадгүй түүний хэм хэмжээнд хэт ахдсан, зарим харьяа үйлдвэрийн дарга нараасаа ажил, мэдлэгийн цар хүрээ нь жижигддэг байж мэднэ /түүний удирдлагын арга барилыг чамалдаг дарга нар олон гэх/.

Уг нь Төрийн өмчит байгууллагуудын захирлуудын томилгоо Б.Цэнгэлийн шууд удирдлагад багтахын хэрээр хяналт тавих, загнаж зандрах, айлган сүрдүүлэх зэрэг худал ч болтугай сүрийг үзүүлэх эрх түүнд бий. Гэвч салбар байгууллага, үйлдвэрийн дарга нарынхаа чадал чансаанд хүрэх сачий дутах тул төрийн өмчийн дансыг ийнхүү баруун солгойгүй самарч суухад нь Төрийн өмчийн бодлого зохицуулалтын газрын даргынхаа зөөлөн суудалд чимээгүйхэн хярж суухаас өөр зам байхгүй гэдгийг намын нь нөхөд хэлж байна.

Монгол Улсад 102 төрийн өмчит болон төрийн өмчийн оролцоотой компани, төрийн өмчийн үйлдвэрийн газар бий. Үүнээс Төрийн өмчийн бодлого, зохицуулалтын газрын харьяанд 83 төрийн өмчит компани, төрийн өмчит үйлдвэрийн газар багтдаг юм шүү дээ…

Түүнийг үндсэн үүрэгтээ жулдах хэрнээ ажлаа аваад удалгүй хотын “А” зэрэглэлийн газрыг дээрх обьекттой нь хамт гадны компанид өгөх ажлыг гардан гүйцэтгэж байна хэмээн Зууны мэдээ сонин баримтат тулгуурлан шүүмжилж байгаа.

Тэр эл үйлдлийнхээ хариуд он гаргаад ажлаа өгөх мэдээлэл ч байна. Харьяа, удирдлагадаа багтдаг дарга захирлуудынхаа дэргэд чадвар, туршлага, эн дутаж, удирдлагаар хангаж чадахгүй яваа түүний ажлыг Байгаль орчны сайд асан Н.Цэрэнбатад өгч магадгүй гэх шуумыг удахгүй амтлах “идшээ” хүлээн суугаа албан тушаалын хоёрдугаар ээлжийнхэн өгч байгаа юм.

Орчуулах »