Хотын дарга газрын наймаанд гар дүрсэн үү?

0
78

Ингэж асуух, бүр дүгнэж ч болох ноцтой нөхцөл байдал нийслэлд үүсч, өнөөг хүртэл маргаан дагуулсаар байна. Хотын өмнөх мэр асан Э.Бат-Үүл Улаанбаатар хотын төвлөрлийг сааруулж, нэг төвт хотоос олон төвт хот болгон хөгжүүлэх зорилгоор хотын захиргааг Баянхошуунд нүүлгэх  шийдвэр гаргаж, улмаар шавыг нь хүртэл тавьж байсныг уншигчид санаж буй биз ээ. Сонгинохайрхан дүүргийн нутаг дэвсгэр дэх 9.0 га газарт Хотын захиргааны шинэ байр барих ажлыг НИТХ-ын хурлаар батлуулж, 2013 оны наймдугаар сарын 12-ны өдөр захирамж гарган, төсөл хэрэгжүүлэгчээр нь “Халла гонсол” ХХК-ийг шалгаруулан батламжилж, шавыг нь тавиад байсан газрыг өнөөгийн мэр буюу Хотын дарга Су.Батболд бусдад алдсан дүрд тоглон, мэдэн будилж байна.

Нийслэлийн Санхүү, эдийн засгийн асуудал хариуцсан орлогч дарга асан Н.Батаагийн гарын үсэг бүхий “НИТХ-ын 2013 оны 07/29 дүгээр тогтоолыг үндэслэн Сонгинохайрхан дүүргийн 5,6,7 дугаар хорооны нутаг дэвсгэр дэх “Ханын материал” орчмын хэсэгчилсэн ерөнхий төлөвлөгөөний дагуу Нийслэлийн Засаг даргын Тамгын газарт нутгийн удирдлагын ордны зориулалтаар Сонгинохайрхан дүүргийн зургаадугаар хорооны нутаг Ханын материалын үйлдвэрийн хашаанд байршуулан 9.2 га газрыг 15 жилийн хугацаатай эзэмшүүлэх эрх олгосугай хэмээсэн 2015 оны дөрөвдүгээр сарын 22-ны өдрийн А/334 дүгээр эл захирамж Су.Батболдын шийдвэрээр хүчингүй болсон нь анхаарал татаж байгаа юм. Өөрөөр хэлбэл, энэ оны зургадугаар сарын 20-ны өдөр мань Засаг ноён гуай “Ханын материалын үйлдвэрийн хашаанд байрлах Нийслэлийн Засаг даргын Тамгын газрын нутгийн удирдлагын ордны зориулалтаар эзэмшиж байгаа 9.0 га газрын эзэмших эрхийн гэрчилгээг Сонгинохайрхан дүүргийн Засаг даргын Тамгын газарт шилжүүлсүгэй” хэмээн захирамжилснаар дээрх А/334 дүгээр захирамж хүчингүй болж, дүүргийн газар болон хувирсан байдаг. Уг нь аль ч дүүрэг зөвхөн төлөвлөлтөд ороогүй, дэд бүтэцгүй газрыг л эзэмшилдээ байлгадаг байтал Сонгинохайрхан дүүрэг нь ийнхүү Нийслэлийн Засаг даргын Тамгын газрын нутгийн удирдлагын ордны зориулалтаар ашиглах газрын эрхийг шилжүүлэн аваад зогсохгүй нэгэнт шийдэгдсэн барилга, байгууламжийг ч бариулахгүйгээр эзэн суучихаад байгаа нь сонин.

Энгийн иргэний ухаанаар бол Хотын нэгэнт эзэмшихээр шаваа тавьсан газрыг дүүрэг гуай нь “За” гээд л өгчихмөөр байтал яахаараа ингэтэл том толгойлдог билээ. Эсвэл хотыг Су.Батболд биш Сонгинохайрхан дүүргийн Засаг дарга удирдаад байна уу. Дүүргийн даргаас дор мэдэлтэй мэр гэж байх уу. Тэрбайтугай 9.0 га газар нь 9.9 болж томроод хэн нэгэн далд эзний саварт атгагдчихаад байхад л нүдэн балай, чихэн дүлий суусаар. Эл дүлий байдлаас нь, мөн тэртэй тэргүй шийдлээ олчихсон байсан шийдвэрийг ингэж цуцлан барин зүтгэхээс нь харвал мань мэр мөнөөх далд эзний далбагар савартай хэдийнээ түншилсэн байхаас зайлахгүй. Хамгийн хорлонтой нь дээрх зургаадугаар хорооны нутаг дэвсгэрт хэсэгчилсэн ерөнхий төлөвлөгөөний дагуу  түрээсийн орон сууц барихаар төлөвлөж байсан нь ийнхүү газрын “хулгайчдын” гарт өртчихөөд байна. Хэл ам татлаад буй 9.9 га газарт Нийслэлийн орон сууцны корпараци /НОСК/  хямд үнэтэй Түрээсийн орон сууц төслийг хэрэгжүүлэхээр БНХАУ-ын Хөгжлийн банк, Монгол Улсын Хөгжлийн банктай хамтран ажиллаж хөрөнгийн асуудлаа шийдсэн ч ажил нэгэнт гацах нь энэ. Цагтаа өөрсдийн нь мэдэлд байсан газар учир үл олдох шалтгаанаар буюу С.Батболдын шийдвэрээр буруу замаар орж будилаан үүсгээд байгаад холбогдох газрын дарга нар нь үгээ барж, үсээ зулгаахдаа тулж байгаа юм байх.

Өөрөөр хэлбэл, Нийслэлийн орон сууцны корпорациас Нийслэлийн Засаг даргын А/593 тоот захирамжийг хүчингүй болгож төсөл хэрэгжүүлэгч НОСК-ийн нэр дээр газар эзэмших эрхийг шилжүүлж гэрчилгээ олгож өгөхийг хүссэн өчнөөн хүсэлт тэврэн өнгөрөгч хоёр улирлын турш өөдөө сөөргөө өнхөрч унатлаа гүйж буй ч тусыг эс олсон гэнэ. Хотын захиргааны шинэ байраа байг гэхэд 1000 өрхийн түрээсийн орон сууцаа барьчихсан бол энэ аймшигт утааг бууруулахад бага ч атугай бодит нэмэр болох байлтай.

Харамсалтай нь энэхүү 10 шахам га газар нь өдгөөгийн хотын захирагч болон мөнөөх дүүргийн нууц эздийн үмхий саварт хэдийнэ орчихсон бололтой. Газрын маргаан, улаан махны хэрүүл сайны үр хэзээд дагуулдаггүй гэдэг. Ядарсан 1000 өрхөө халуун дулаан сууцанд оруулчих сэтгэлгүй төрийн түшээдийг хэдий хүртэл хүлээж тэвчих вэ. Эл газрыг эрхэндээ оруулсан Засгийн газрын болоод УИХ-ын эрхэм гишүүн, эрх шилжүүлэхэд нь мэдэн будилсхийсэн дүрээр гар бие оролцсон хотын даргыг шалгаж, хариуцлага үүрүүлэх цаг хэдийнэ болсон биш үү.

Сэтгэгдэл үлдээх

Please enter your comment!