ЕРӨНХИЙ САЙДАА, ОРОН НУТАГ ДАХЬ АГЕНТЛАГ ЧИНЬ ЭЦЭГ ҮРИЙГ АМЬДЫН ХАГАЦАЛД ЧИРЧ БАЙНА

-7-хон настай балчир охиныг ОХУ-ын иргэн хэмээн аавтай нь уулзуулалгүй хорьсоор байгаад хил давуулах нь-

Увс аймгийн иргэн, “Аянгат тэнгэр” ХХК-ийн захирал Д.Баянмөнх 7-хон настай балчир үрээ Оросын талд алдахдаа хүрч, аргаа барахдаа Зариг.мн сайтын редакцид ханджээ. Сайтын зүгээс иргэн Д.Баянмөнхөөс дэлгэрэнгүй ярилцлага авч, улмаар холбогдох албаныхнаас ч тодруулга авч, олон түмэнд дуулгасаар байгаа аж. Д.Баянмөнхийн Зариг.мн-д өгсөн ярилцлагаас үзвэл тэрбээр ОХУ-ын иргэн тува эмэгтэйтэй хамтран амьдарч байгаад Монгол руугаа буцан ирж, улмаар эргээд ОХУ-руу орох гэхэд нь хар тамга дарагдан виза нь гараагүй бололтой. Удаан хөөцөлдөж, хүлээсний эцэст дахин хил давах боломж олдон бүсгүйдээ очиход тэр нь бусдын гарт амиа алдаж, харин тэдний дундаас төрсөн охин ОХУ-ын иргэнээр бүртгэгдэн асрамжийн газарт хүргэгдсэн байсан гэнэ. Нэгэнт өөрийн төрсөн охин учир хүний нутагт хөөцөлдсөөр охиноо асрамжийн газраас аван Монголдоо эргэн иржээ. Тэрбээр дахин гэрлэж, хоёр дахь эхнэр болон ОХУ-д төрсөн өөрийн охин А-гийн хамт Увс аймагт амьдардаг аж. Харамсалтай нь, Д.Баянмөнхтэй хувийн өс хонзонтой нэгэн хонзонгоо авахын тулд удаа дараа Д.Баянмөнхийг охиноо хүчирхийлдэг, зодож дарамталдаг зэргээр цагдаагийн газарт хандаж, эцэстээ эл увайгүй үйлдэл нь үнэнд гүйцэгдэхийн эрхэнд ОХУ-руу эл гүтгэлэгт мэдээллээ хүргүүлсэн бололтой. Мэдээллийн мөрөөр Тувагаас албаны хүмүүс, Увс аймгийн цагдаагийн хэлтэс, Гэр бүл хүүхэд залуучуудын хөгжлийн газрынхантай ирж, охиныг гэрээс нь хүчээр авч явсан байна. Улмаар орос хэл мэддэггүй, Монголд гурав дахь жилдээ амьдарч буй А охиныг нь Тувагийн асрамжийн газарт өгнө гэж мэдэгдсэн бололтой. Зариг.мн сайтын тодруулснаар төрсөн аав нь охиноо хүчирхийлсэн элдэв асуудал байхгүй гэдгийг Увс аймгийн Цагдаагийн хэлтсээс өгчээ. Харин өөр эх сурвалжийн мэдээлснээр, мөн охины аавын ярианд ч цухас гарснаас үзвэл хувийн өс хонзонт нөгөөх нөхөр Увс аймгийн Гэр бүл, хүүхэд залуучуудын хөгжлийн газрын дарга эмэгтэйгээс тусламж авч, тэр нь ийм байдал үүстэл “туслаж” яваа байж магадгүй байна.

Одоогийн байдлаар долоохон настай жаахан охиныг хамгаалалтад авсан нэрээр төрсөн эцгээс нь тусгаарлан хорьж, ар гэрийнхнээс нь хэнтэй ч уулзуулахгүй амьдын хагацал үзүүлж байгаа аж. Энэ талаар тус сайтын хамт олон Увс аймгийн Гэр бүл, хүүхэд залуучуудын хөгжлийн газрын дарга Б.Нансалмаа гэгчээс мэдээлэл авах гэж оролдсон боловч эхэндээ “Миний хоолой өвдчихсөн байна, мэдээлэл өгөх боломжгүй” хэмээн утсаа тасдаж байгаад эцэстээ “Охин ОХУ-ын иргэн. Охиныг аймгийн ГБХЗХГ-ын Хамгаалах байранд байрлуулан, хамгаалалтын үйлчилгээ үзүүлж байна. Улс хоорондын асуудал тул мэдээлэл өгөх боломжгүй” гэсэн хариултыг өгчээ.

Хичнээн буруутай байлаа ч Төрсөн эцэг үрийг ийнхүү амьдын хагацалд учруулах эрх хэнд байна вэ. Хүүхдээ хүчирхийлдэг, занчдаг нь үнэн байсан бол охиноо гэсэн аав ингэтэл тусламж эрэн, наашаа гэсэн болгоны араас царайчлан гүйх үү. Хэзээнээс төрсөн эцэг, үрийн асуудал улс хоорондын асуудал байдаг болчихоо вэ. Охин ОХУ-ын иргэн бол аав нь Монгол Улсын иргэн. Охиныг ОХУ авах гээд ирчихсэн бол иргэнээ охинтой нь байлгахын төлөө энэ Монгол Улс юу ч хийхгүй хэрэг үү. Гэр бүл, хүүхэд залуучуудын хөгжлийн газрыг ийм харгис, ийм өөдгүй хүн удирдахаар энэ газраас илүү сайхан зүйл хүлээх хэрэг байна уу. Жинхэнэ хүчирхийлэлд өртчихөөд, зодуур нүдүүр харгислалын золиос болон яваа бяцхан үрсдээ хүрч ажиллаж чаддаггүй байж гэр бүлийн хүчирхийлэл нь цагдаагийн газрын шалгалтаар нотлогдоогүй гэр бүлийг ингэж хэзээ ч дахин уулзахааргүй хагацалд түлхэхийн учир юу вэ. Иргэн Д.Баянмөнх ОХУ-ын хилийг дахин хэзээ хэрхэн давж чадахаа мэдэхгүй гэж байгаа. Тэрбээр охиноо асрамжийн газраас авч, өөрөө дагуулан ирэхийн тулд тухайн улсын албадад шаардлагатай бичиг цаасыг хөөцөлдсөөр зөвшөөрөгдсөн хугацаагаа хэтрүүлсэн шалтгаанаар дахиад хар тамга даруулсан аж. Тиймээс хөөрхий бяцхан охин хаана, аль асрамжийн газарт хүргэгдэж, аав нь хэзээ өөрийг нь олж очихыг хэн ч мэдэхгүй гунигт тавилан руу хэзээ мөдгүй хөөгдөн орох нь. Тэртэй тэргүй дахин уулзалдахгүй байж мэдэх хатуу тавилангийн өмнө авааччихаад ганц цаг ч болов охиноо харах, тэврэх, үнсэх эрхийг яагаад аавд нь өгч болдоггүй юм бэ. Өөрсдийн чинь мах цусны тасархайг ингээд хамгаалалт нэртэй битүү саванд хорьж байгаад хаашаа ч хамаагүй аваачаад, хэний ч юм гарт атгуулахад зүгээр үү, Б.Нансалмаа дарга аа. Яачихсан өс хонзон, яачихсан өр төлбөр гэхээрээ эцэг үрийг амьд салгаж байж тайтгарч, таашаал авахад хүргэдэг байна вэ? Ерөнхий сайдаа, Гэр бүл, хүүхэд залуусыг хөгжүүлэх ёстой агентлаг чинь бусдын өс хонзонгийн чиглүүлэгч, хутгуур болчихсон яваа юм биш биз.

Охины аав Д.Баянмөнхтэй хийсэн Зариг.мн сайтын ярилцлагын дэлгэрэнгүйг дараахь холбоосоор үзнэ үү.

http://zarig.mn/e68?fbclid=IwAR3LGYtENOjQx_lByDeFgh-Y1HlBZLoTyEDhaTSjgLOF2Hm6aIgFUvHmaEA

13 Сэтгэгдэлүүд

  1. Нийгмийн хамгаалал, хөдөлмөрийн яамны сайд нь энэ жилийг хүүхэд хамгааллын жил гээл байсан биз дээ. Хүүхдээ хамгаалах биш худалдаж байгаам биш үү

  2. Tsagdaanuud bolimoor yum aliin bolgon tom gureni umnu buhulzuj ard irgedee daramtalah yum, ajilaa hiij baigaa bolovch bas hin chanar gargaj bolno doo.

  3. Монгол Улсын нутаг дэвсгэрт гадныхан шууд албадан ажиллагаа явуулах эрх байна уу. Энэ улсыг дээрэлхэж ханахгүй юмаа

  4. Энэ одоо хувийн өс хонзонг нялх балчир амьтдаар барьцаалж авдаг юм уу.Ийм хүүхэд залуучуудын төв гэж юу байдаг юм вэ.Маш сайн шалгаж учрыг нь олооч.
    БУРУУТАЙ ЭДГЭЭДЭД ХАРИУЦЛАГ ТООЦООЧ ДЭ.

  5. Tsagdaagiin gazar ni aaviig ni gemt heregten bish geed bgaan bish uu. Huuhdee huchirhiildeg baisan bol udiid barivchlagdah ystoi biz dee. Tuvachuud odoo yu be

  6. ОХУ-руу хэлчихвэл хүүхдийг нь салгаад авч явна гэдэг зөвлөгөөг наад Нансалмаа авгай чинь өгч л дээ. Хэрэгт хамсаатан гэдэг нь тодорхой байна. Түүнээс биш хөдөөгийн нөхөд Олон улс хооронд гомдол хүргүүлж мэдэх үү

  7. Увсынхан хүний цаана гарч байж л санаа нь амардаг их л заргач хүмүүс дээ. Нинжин сэтгэл гэж байхгүй хэрэгтэй гэвэл өстнийхөө махыг ч иднэ

  8. Хүүхэд авч хил гарахыг Тувачуудад хэн зөвшөөрөөд байна аа, эсвэл хүүхдийн хулгай юм уу

  9. Ажил хийдэггүй байгууллага УВС аймагт байдаг тэр нь Нансалмаа гэх эмэгтэйн толгойлсон ГБХЗГазар гэхэд болно өөр аймагт ийм их оронтойтой агентлаг байхгүй. 40 гаруй орон тоотой 18 сумандаа мэргэжилтэнтэй байж сум орон нутагт хүүхэд залуучууд ямар байгаа талаар мэдээлэл байдаггүй зөвхөн сургаар ажил хийдэг сул цалин авсан хүмүүс байна. Энэ хүүхэн залилангийн хэргээр 5 жилийн тэнсэн ял аваад байхад Алтансүх гэх дарга Засаг даргатай нь зөвшилцөлгүй томилсон байдаг.

  10. Залилангийн хэрэгтэн засрахгүй, одоо хүүхэд худалдаалж байгаам биш үү


Notice: Undefined variable: fields in /home/tuvmn1/niigmiintoli.mn/wp-content/themes/Newspaper/includes/wp_booster/comments.php on line 64

Сэтгэгдэл үлдээх

Please enter your comment!