УИХ:Цалин нэмэхгүй

0
16

УИХ-аар 2017 оны төсөвт нэмэлт өөрчлөлт  оруулахаар хэлэлцэж байна. Төсвийн тодотголд энэ оны улсын төсвийн орлогыг 6.2 тэрбум, зарлагыг 5.9 тэрбум төгрөг, энэ оны эдийн засгийн өсөлтийг 3.3 хувь байхаар тусгажээ.

2018 оны эдийн засгийн өсөлтийг 4.2 гэж тооцсон байна.  “Засгийн газар эдийн засгийн өсөлтийг хий хоосноор өндөр тооцохыг зориогүй.  Төсвийн алдагдал 2.7 их наяд төгрөгт хүрээд байгаа. Засгийн газрын зүгээс төсвийн алдагдлыг 2.6 их наяд төгрөг болгож, дотоодын арилжааны банкуудуудаас өндөр хүүтэй зээл авахгүй байхаар зорьж байна” гэдгийг хэлэлцүүлгийн үеэр Сангийн сайд Ч.Хүрэлбаатар онцоллоо.

Энэ оны төсвийн тодолтголоор хүлээгдэж байгаа асуудлуудын нэг нь цалин, тэтгэвэр нэмэх эсэх. Тэр дундаа багш, эмч нар цалингаа нэмэгдүүлэхийг шаардлаж, жагсаал цуглаан хийсэн. Шинэ Засгийн газрын салбарын сайд нар цалин нэмэгдүүлэх боломжийг судална гэлээ. Харин бодит байдал дээр асуудал тэнгэр газар шиг зөрүүтэй байгааг ХЗДХ-ийн сайд Ц.Нямдорж шүүмжилж “Цалин нэмэх боломжтой гээд байх юм. Та нар боломжтой байсан бол нэмэхгүй яасан юм. Огт боломжгүй зүйл ярьж, олон нийтийн сэтгэл санааг битгий үймүүл. Ж.Мөнхбатаас эхлээд өчигдрөө мартаад цамнаад байгааг ойлгохгүй байна.  Нөөц бололцоо ямар байгааг судлах хэрэгтэй. Би яамандаа очиход яг 2012 оны дүр зургаар угтаж байна. Компьютерийг нь ч солиогүй байх юм” хэмээн шүүмжлэв.

Тиймээс төсвийн тодотголоор энэ удаад цалин нэмэхгүй.  Харин  төрийн өндөр албан тушаалтан, шүүгч, прокуророос бусад төрийн албан хаагчдад нэг удаагийн урамшуулалд 300 мянган төгрөг олгохоор болжээ. Энэ тухайгаа ч ОУВС-гийнхантай хэлэлцэн тохиролцсон байна. Нийт  192 мянган төрийн албан хаагчдад 300 мянган төгрөгийн нэг удаагийн олговор олгоход  54.9 тэрбум төгрөгийн эх үүсвэр шаардлагатай байгаа юм.

Ер нь ОУВС-тай хийсэн гэрээгээр  2019 он хүртэл төрийн албан хаагчдын цалин, урамшууллыг царцаахаар тохирчээ.

Харин хүүхдийн мөнгийг энэ оныг дуустал хүүхэд бүрт олгохоор болсон. Тиймээс шинэ Засгийн газар  он дуустал хүүхэд бүрт мөнгө олгохоор төсвийн тодотголд багтаасан байна. “Хүүхдийн мөнгө”-нд 104 тэрбум төгрөг төсөвдөгдсөн бөгөөд тодотол батлагдсанаар олголт эхлэх юм.

 

Сэтгэгдэл үлдээх

Please enter your comment!