Ж.Нарантуяа: Эцэг эхчүүдийн эрүүл мэндийн боловсрол дутмаг байна

Агаар, орчны бохирдлоос хамаарч томуу болон томуу төст өвчний дэгдэлт ихсэх хандлагатай байна. Нийслэлийн хэмжээнд амбулаторын үзлэгийн 5.3 хувийг томуу болон томуу төст өвчин эзэлж байгаа бол 1396 хүүхэд дүүргийн эрүүл мэндийн төвүүдэд хэвтэн эмчлүүлж байгаа аж. Тэгвэл иргэдэд хамгийн ойр байдаг өрхийн эрүүл мэндийн төвд ачаалал хэр байгаа талаар Баянзүрх дүүргийн 14 дүгээр хорооны ЕвроЭм ӨЭМТ-ийн дарга АУ магистр, их эмч Ж.Нарантуяатай уулзаж тодруулга авлаа.

-Томуу, томуу төст өвчний нөхцөл байдал танай хороонд ямар түвшинд байна вэ?

-Манай хороо статистик судалгаагаар 13131 хүн амтай, 6137 өрх айлтай. Өнөөдрийн байдлаар өдөрт 168-225 иргэнд үйлчилж байна. Үзлэгийн 40-50 хувийг томуу болон томуу төст өвчний үзлэг эзэлж байгаа. Дийлэнх хувийг 0-5 насны хүүхдүүд эзлэх боллоо.  Он гарснаас хойш дуудлага, үзлэгийн дараалал эрс нэмэгдсэн.

-Энэ нь эмч нарын ажлын ачаалалд хэрхэн нөлөөж байгаа вэ?

-Хэдийгээр манай хороог 13131 хүн амтай гэсэн судалгаа байдаг ч манай эрүүл мэндийн төвөөр  үйлчлүүлэгчдийн тоо илүү их. Учир нь энэ орчмын газар хот төлөвлөлтөд орсон болохоор орон сууцны шинэ хорооллууд нэмэгдэж байна. Үүний хэрээр шилжин ирэгсэд нэмэгдэх боллоо. Мөн шилжин явсан иргэд албан ёсны шилжих хөдөлгөөн хийлгээгүйн улмаас ирж үйлчлүүлдэг. Ингэхлээр бид дээрхи тоог давсан хүмүүст үйлчилж байна гэсэн үг. ӨЭМТ-үүдэд хүн амынх нь тоогоор хангалт болон эмч, сувилагч нарын орон тоог тогтоодог болохоор бидний хувьд хүндхэн л байгаа. Гэсэн ч хүнд хэцүү гэж шантралгүй хүн бүрт хүрч ажиллахыг хичээдэг дээ. Одоогийн байдлаар зургаан эмч, таван сувилагч, нэг нийгмийн ажилчинтайгаар үйл ажиллагаагаа явуулж байна. Өөрөөр хэлбэл өдөрт нэг эмчид 50-60 өвчтөн ногддог.

-Ямар төрлийн дуудлага их ирж байна вэ?

-Эмч нар ажлынхаа хажуугаар дуудлагаар гэрээр очиж үздэг. Бидэнд унаа тэрэг байдаггүй учраас өдөрт 15-20 дуудлаганд л очиж амждаг юм. Үүний хажуугаар нярайн эргэлтийг тогтмол хийнэ. Зарим иргэд бидний ажлыг ойлгохгүй өрхийн эмч ирдэггүй хэмээн гомдоллодог нь харамсалтай. Ирсэн дуудлагын ихэнхийг бага насны хүүхэд ханиад хүрсэн, халуурч байна гэх дуудлагууд эзэлдэг. Халуурсан хүүхдийн халууныг гэрийн нөхцөлд буулгах олон арга бий. Тухайлбал, хувцсыг нимгэлж бүлээн зүйл бага багаар олон давтамжтай уулгах. Хүйтэн жин тавих гэх мэт. Хамгийн гол нь халууныг тогтмол үзэж халуун буухгүй удах, эсвэл халуун нэмэгдэх зэрэгт эмчид хандах хэрэгтэй.

-Эцэг эхчүүдийн зүгээс томуу, томуу төст өвчнөөс хэрхэн урьдчилан сэргийлж байна вэ?

-Үнэндээ эцэг эхчүүдийн эрүүл мэндийн боловсрол дутмаг байна. Томуугаас сэргийлэх үндсэн арга замуудыг хэрэглэдэггүй, өвдсөн хүүхдийг гэрийн нөхцөлд хэрхэн асарч сувилахаа мэдэхгүй байна. Уг нь томуу болон томуу төст өвчнөөс сэргийлэх үндсэн хэдхэн л зүйл бий. Гэртээ цэвэр агаар оруулах, чийгтэй цэвэрлэгээ тогтмол хийх, витаминлаг хоол хүнс хэрэглэх, гадуур гарахдаа маск зүүх, хүүхдэдээ цэгэн массаж хийж өгөх зэрэг. Мөн хамгийн гол нь зөв хувцаслах юм. Жишээлбэл, бага зэрэг ханиалгаж байгаа хүүхдийг маш зузаан хувцаслаад хөлөргөөд аваад ирдэг. Ирж үзүүлчихээд нөгөө хөлстэй хүүхдээ буцааж хувцаслаад аваад явж байна. Энэ нь нөгөө бага зэрэг ханиадыг нь уушигны хатгалгаа болгох эрсдлийг дагуулж байгаа хэрэг. Уг нь ӨЭМТ-үүд өвдсөн хүнийг эмчлэх биш өвдөхөөс нь урьдчилан сэргийлдэг байх ёстой. Тиймээс манайд өрхийн эрүүл мэндийн нийгмийн ажилтан хэмээх ажлын байр бий болоод байгаа. Бид өөрсдийн нөөц бололцоондоо тулгуурлан гарын авлага, үзүүлэн тараах материал бэлтгэн иргэдэд сургалт орж байна. Мөн мэдээ мэдээлэл, зөвлөгөөг цахим хаягаараа байнга хүргэдэг болсон. Өнгөрөгч оны байдлаар 79 төрлийн мэдээ мэдээллийг боловсруулан цахимаар 22053 иргэнд хүргэжээ.


Notice: Undefined variable: fields in /home/tuvmn1/niigmiintoli.mn/wp-content/themes/Newspaper/includes/wp_booster/comments.php on line 64

Сэтгэгдэл үлдээх

Please enter your comment!