У.Хүрэлсүхийн Засгийн газрыг огцруулахаас татгалзлаа

    0
    64

    УИХ-ын гишүүн Д.Хаянхярваа болон бусад 26 гишүүд өнгөрөгч сарын 19-ний өдөр Засгийн газрыг огцруулах бичгийг УИХ-д өргөн барьсан билээ. Тэгвэл өчигдөр УИХ-ын чуулганы нэгдсэн хуралдаанаар Засгийн газрыг огцруулах эсэх асуудлыг хэлэлцлээ. Хуралдааныг УИХ-ын гишүүн Л.Энх-Амгалан даргалав. Хуралдааны үеэр нэр бүхий 50 гишүүн үг хэлж, байр сууриа илэрхийлснийг товчлон хүргэе.

    УИХ-ын гишүүн Б.Пүрэвдорж: 2012-2016 оны хооронд АН засаг удирдсан. Энэ үед 2.3 тэрбум долларын зээл аваад ямар бүтээн байгуулалтууд хийснийг ард түмэн мэдэж байгаа. Тухайлбал, 90 жил тавьсан хатуу хучилттай замыг дөрвөн жилд багтаан тавьсан. Мөн хүүхдийн 80000, оюутны 70000 зэргийг өгч байлаа. Эцэст нь 2016 онд хийсэн бүтээсэн ажилд нь сайн дүн тавьчихаад хоорондоо эвдрэлцсэн асуудлаас нь болж хөөж явуулсан шүү дээ. Үүнээс хойш МАН одоог хүртэл засаглаж байна. Хийсэн зүйл харагдсангүй. Харин ч өмнөхөөс давуулаад 3.6 тэрбум долларын зээл авчихлаа. Засгийн газрын чинь дотоод өр 7 их наяд хүрээд байна. Утааны улирал дуусаад л та бүхэн мартдаг. Утааны эсрэг нэг ч ажил хийсэнгүй. Тиймээс иргэд минь маск сайн бэлдэж аваарай. Бензиний үнэ өслөө гээд тэмцсэн залуус ямар ч ахиц гараагүй байхад Ерөнхий сайд мундаг гээд буугаад өглөө. Та нар өөрсдөө жагсаал цуглааныг зохион байгуулдаг болоод байна.

    УИХ-ын гишүүн Т.Аюурсайхан: Миний хувьд Ерөнхий сайд У.Хүрэлсүхийг үргэлжлүүлэн ажиллаасай гэж хүсч байна. Шийдвэр ингэж гарна гэдэгт найдаж байгаа. Гэвч захиж хэлэх зүйлс байна. Төр, нийгэмд шударга ёс тогтооно гэсэн таны эрмэлзлэлийг шударга ёсоор цангасан ард түмэн хүсэн хүлээж байгаа. Энэ суудалд сууж байгаа үүрэг чинь гэж бодоорой. Хяналтаа улам чангатгах хэрэгтэй. Төрийн яаманд хүн амины хэрэг гарсан шүү. Дахин ийм зүйл гарч болохгүй. Эдийн засгийн өсөлт энэ жилдээ 6.3 хувьтай байна. Оны эцэст 6.5 хувьтай болох байх гэж бодож байна. Энэ өсөлтөө хүртээмжтэй байлгах хэрэгтэй. Энэ нь иргэд болон бизнес эрхлэгчдэд тэгш боломж, мөн эрүүл мэнд, боловсролын үйлчилгээний хүртээмжтэй байдал, иргэд олон түмний нийгмийн хамгаалал, хүнсний аюулгүй байдал зэргийн байр байдлыг сайжруулах хэрэгтэй гэсэн үг юм. Ажилд тань амжилт хүсье.

    УИХ-ын гишүүн С.Бямбацогт: Сүүлийн хэд хоногт бид ард түмэндээ муухайгаа их үзүүллээ. Парламент бол мэтгэлцээний талбар. Гэхдээ парламентад суудалтай намууд хоорондоо мэтгэлцэж бие биенээ муухайгаар дуудалцдаг байсан бол энэ удаа арай өөр байлаа. 2016 онд ард түмэн МАН-д итгэл үзүүлж 65 суудал өгсөн. Гэтэл өнөөдөр хоёр хуваагдчихаад тэмцэлдэж байгаа нь ичгэвтэр байна. Ард түмэн яйжгий нурах гэж байгаа гэрийг минь босгоод өгөөч гэж биднийг сонгосон. Гэтэл бид тэр яйжгий гэр дотроо тулга тойрсон хэрүүл хийгээд сууж байна. Өнөөдөр хэрүүл хиймээргүй байна.

    Монгол Улсын Ерөнхий сайд У.Хүрэлсүх: Засгийн газар үлдэх үү, эс үлдэх үү гэдгийг хэдхэн секундын дараа шийдэх гэж байна. Өнгөрсөн нэг жилийн хугацаанд бидэнд хийж хэрэгжүүлсэн зүйл их байгаа. Тухайлбал, нефтийн үйлдвэр, цэвэрлэх байгууламж зэрэг зөндөө ажил бий. Засгийн газрын мөрийн хөтөлбөрөөс үндэслэгдсэн ажлуудыг бололцооныхоо хэрээр хийж ажиллаж байна. Улсын түүх бүтэх, ажил үйлс явна гэдэгт нэг жилийн хугацаа багахан юм. Гарын алганаас өргөс авсан юм шиг нэг жилийн дотор Хүрэлсүх гэдэг нөхөр бүх зүйл бүтээнэ гэж байхгүй. Надад цаг хугацаа хэрэгтэй байгааг мэдэж байгаа. Би хоёр зүйл хэлэх гэсэн юм. Нэгдүгээрт, шударга ёс тогтоох, хариуцлага дэг журмыг сайжруулах тал дээр би бүхий чадлаа дайчлан ажиллаж байна. Хоёрдугаарт, улсынхаа унаж буй эдийн засгийг тогтоож чадлаа, одоо сэргээх чиглэлд нь боломжтой бүх зүйлсийг хийж ажиллана. Дээр нь хэрэв би үлдвэл ард түмний хэлж сурсан МАНАН гэдэг зүйлтэй үргэлжлүүлэн тэмцэнэ. Тэр шударга бусын пирамидыг эвдэхийн төлөө зүтгэнэ. Д.Хаянхярвааг огцруулсны орой энэ 27 гишүүн намайг огцруулах гарын үсэг зурсан. Би тэднийг бүгдийг буруутай гэж үзэхгүй байна. Найз нөхдөө, хүн чанараа бодоод гарын үсэг зурсан хүмүүс бий. Одоо битгий тэг ээ. Эх орноо бод. М.Энхболд дарга та ажлаа өг өө. Би энэ суудалд үлдсэн ч, үлдээгүй ч таниас үүнийг шаардах болно. Та олон жил дарга хийлээ. Төрийн тэргүүний сонгуульд хүртэл үзлээ. Одоо болно. Зүгээр УИХ-ын гишүүнийхээ ажлыг сайхан хий л дээ. Мөн миний цаашид хэрэгжүүлье гэж бодож байгаа зүйл бол энэ хууль хяналтын байгууллагыг бие даасан хараат бус үйл ажиллагаа явуулахад маш их анаарч ажиллах хэрэгтэй юм байна гэж бодлоо. Өнөөдөр төрдөө, ард түмэндээ өргөсөн тангаргаасаа урвасан хүмүүс байна гэж бодохгүй байгаа. Улс төрчид бид өөрсдөө хуулийн байгууллагыг улс төрийн байгууллага болгоод байна. Тэднийг дарамтална, ажил албан тушаалаар нь айлгаж сүрдүүлнэ. Эцэст нь өөртөө уусгана. Хууль хяналт, шүүх прокурорын байгууллагууд шударга ажиллаж байж нийгэм цэвэршинэ. Улсын өмч хөрөнгөөс хууль бусаар хулгайлж авсан хүмүүсээс тэр хөрөнгийг хурааж авахыг ард түмэн шаардаж байна. Энэ засаг тогтсон ч эс тогтсон ч би үзэл бодлоосоо няцахгүй. 

    Энэчлэн үг хэлэх санал өгсөн бүх гишүүд болсон болоогүй, авмаар ч хаямаар ч үг хэлж, саналаа илэрхийлсний дараа Монгол Улсын Ерөнхий сайдыг огцруулахыг дэмжье гэсэн Төрийн байгуулалтын байнгын хорооны саналын томъёоллоор санал хураалт явуулахад хуралдаанд оролцсон 73 гишүүний 33 нь буюу  45.2 хувь нь дэмжиж, 40 нь буюу 54.8 хувь нь татгалзсанаар Монгол Улсын Ерөнхий сайд У.Хүрэлсүхийг огцруулах шаардлагагүй гэж үзсэн юм.

    Сэтгэгдэл үлдээх

    Please enter your comment!