Хүүхдийнхээ сурлагын талаарх бүхий л мэдээллийг цахимаар харах боломж бүрдлээ

0
22

“Боловсролын салбарын мэдээллийн систем” төслийн талаар БСШУСЯ-аас мэдээлэл хийсэн. Энэхүү төсөл нь 2014 оноос эхлэн хэрэгжиж эхэлсэн бөгөөд өнөөдрийг хүртэлх хугацаанд суурь бүртгэл, статистик тайлан мэдээ солилцох системийн үүргийг голлон гүйцэтгэдэг байжээ. Харин  2018-2019 оны хичээлийн жилээс эхлэн ерөнхий боловсролын сургууль, цэцэрлэг, багш, эцэг эх рүү чиглэсэн систем болон өргөж байгаа аж. Ингэснээр багшийн ажлын ачааллыг хөнгөвчлөх төдийгүй эцэг эхчүүд хүүхдийнхээ сурлага, хичээлийн ирц гэх мэт бүхий л мэдээллийг интернетээр цаг тухай бүрт хүлээн авах боломжтой болж байгаа юм байна. Өөрөөр хэлбэл, бичиг цаастай зууралддаг байсан хуучны арга барилыг халж, эцэг эхчүүдийн хүүхдийнхээ хүмүүжил, сургууль, цэцэрлэгийн үйл ажиллагаанд оролцох оролцоог нэмэгдүүлж байгаа юм.

Системийн танилцуулгын үеэр БСШУС-ын сайд Ц.Цогзолмаа “Улс орны эдийн засаг хүнд хэцүү байх цаг үед боловсролын салбарыг дэмжиж ажилласан олон улсын байгууллагууддаа баярласан талархснаа илэрхийж байна. Тухайлбал, хамгийн удаан хугацаанд боловсролын салбарыг дэмжиж, тууштай хөрөнгө оруулалт хийж байгаа газар бол “Жайка” олон улсын байгууллага юм.

Тус байгууллага нь манай боловсролын салбартай сүүлийн 25 гаруй жилийн хугацаанд хамтран ажиллаж байна. Энэ хугацаанд нийт 50 гаруй мянган хүүхдийн багтаамжтай сургууль, цэцэрлэгүүдийг барьж бидэнд хүлээлгэн өгсөн байдаг. Өнөөдөр ч тус байгууллагын санхүүжилтээр нийслэлийн хэмжээнд Налайх, Чингэлтэй, Хан-Уул зэрэг дүүргүүдэд сургуулийн өргөтгөлийн барилгын ажлыг явуулж байна. Мөн 2014 оноос эхлэн БСШУСЯ болон Азийн хөгжлийн банкны санхүүжилтээр “Боловсролын салбарын мэдээллийн систем” төсөл хэрэгжиж эхэлсэн.

Энэхүү төсөл нь өнөөдөр бүрэн боловсорч сургууль, цэцэрлэг, багш, эцэг эхчүүдийн хоорондын харилцааг улам бүр нягт болгох суурийг бүрдүүллээ. Учир нь энэ л системээс эцэг эхчүүд цаг заваа хэмнэн хүүхдийнхээ талаарх мэдээллийг бүрэн авах боломжтой. Багш нар маань хуучин шиг бичиг цаастай зууралдаж журнал хөтлөх, цаасан дээр хүүхдийн судалгаа авах зэрэг асуудлуудаас бүрэн холдох боломжтой болж байгаа юм. Мөн багш бүр хүссэн үедээ салбарынхаа сайдад санал бодлоо чөлөөтэй илэрхийлэх таатай нөхцөл ч бүрдэж байна. Өнөөдрөөс эхлэн хүүхдийн тухай бүртгэлийг нэг удаа цаг гаргаж энэ системд суулгана. Үүнээс хойш тэр мэдээлэл хадгалагдах учир багшийн ажлыг хөнгөвчилнө гэж үзэж байгаа.

Энэхүү системд боловсролын салбарын бүхий л мэдээлэл багтах бөгөөд статистик, дүн мэдээ зэрэг нь нээлттэй байрлаж, харин багш, сурагч, эцэг эхийн буюу хувь хүний талаарх мэдээлэл хаалттай байх юм. Ингэснээр эцэг эх, багш нар өөр өөрийн нууц үгээ ашиглан нэвтэрч мэдээллээ харах боломжтой болж байна. Түүнчлэн улс орны хаана нь сургууль, цэцэрлэг хомс байгаа, ямар мэргэжлийн багш хэрэгтэй байгаа зэргийг хурдан шуурхай мэдэх боломжтой боллоо. Энэхүү системд гадаадын улс орнуудын тэтгэлэгт хөтөлбөрүүдийн талаарх мэдээлэл ч багтана. Өмнө нь оюутан залуус маань гадны аль улсад ямар сурууль, хэдий үед тэтгэлэг зарладаг талаар, түүнд хэрхэн яаж бүртгүүлэхээ мэдэхгүй байсан бол одоо энэ тухай бүхий л мэдээллийг нэг дороос авах боломжтой боллоо” гэв.

Дашрамд дуулгахад, эцэг эхчүүд  “Google play store”-оос ESIS хэмээх аппликейшнийг татан суулгаснаар “Боловсролын салбарын мэдээллийн систем”-д нэвтэрч дээрх үйлчилгээг хүлээн авах ажээ.

Сэтгэгдэл үлдээх

Please enter your comment!