Ерөнхий сайдаа, асар хариуцлагатай төслийн багийг АТГ-т шалгуулбал яана?!

Нийслэлийг өнгөтэй, өөдтэй байлгах төслөөс хөрөнгөжиж яваа гэгдэх Д.Авирмэд хотын даргатай тун сайн найз гэнэ. Үе үе өөр газрын харьяалалтай хэрнээ хотын зааланд тоглож, цагийг өнгөрүүлдэг. Шулуухан хэлэхэд, хотын даргын уулзалтад л дагалддаггүй болохоос уулзаж учрах, тоглож наадахаараа хүзүү сээрээрээ хэлхэлдэж явдгийг нь мэдэх хүмүүс олон.

Тиймдээ ч тэр том дуугарч, хүссэнээрээ авирлаж чаддаг биз. “Улаанбаатар хотын гэр хорооллыг хөгжүүлэх хөрөнгө оруулалтыг дэмжих хөтөлбөр” төсөл хэрэгжээд дөрвөн жил гаруй хугацаа өнгөрч байгаа. Анх 2013 оноос Монгол Улсын Засгийн газар болон Азийн хөгжлийн банк хоорондын хэлэлцээрээр батлагдаж, 2014 оны тавдугаар сараас УИХ-аар батлагдан хэрэгжиж эхэлсэн тус төсөл 10 гаруй ажилтантай. Зөвхөн төслийн удирдагч Д.Авирмэдийн цалин гэхэд таван сая төгрөг. Ажилчид нь гурван сая төгрөгөөс дээш пүнлүү хүртдэг.

Үнэндээ төсөл хэрэгжээд олон жил өнгөрч байхад авдаг хэд нь нэмэгдсэнээс биш гараас гарсан ажил нь тун ховор. Нийслэлийн удирдлагууд хаяахан очиж, ажилтай танилцаж байгаа нэрийдлээр зургаа татуулж, зурагтаар түгээхээс өөрөөр гавьсан ажил үнэндээ байхгүй. Бүхэл бүтэн дөрвөн жил өнгөрч байхад төслийн ажил дөнгөж л эхэлж байх жишээтэй.

Морьдохын хазгай гэгчээр төслийн тендер шалгаруулалтыг хоёр ч удаа зохион байгуулсан нь анхаарал татна. Дотоодын компаниа хойш тавьж, гадныхныг тахин шүтэх өвчиндөө нэрвэгдсэн аятай шалгаруулсан гэх хардлага ч байгаа юм. Үүнийг төслийн зохицуулагч Д.Авирмэд ч хэвлэлд өгсөн ярилцлагадаа тодотгож, Хятадын компани шалгарсан байсан ч дараа нь Герман болж өөрчлөгдсөн талаар онцолсон. Тэгэхдээ 6.2 сая ам.долларын өртгөөр хийе гэсэн дотоодын компаниа гоочлоод 9.1 сая ам.доллараас нааш бүтэхгүй гэсэн гадны компанид өгснөө ч хэлээд авна лээ.

Төслийн санхүүжилт 20 жилийн хугацаатай, хоёр хувийн хүүтэй, хөнгөлөлттэй зээлээр явагдаж байгаа. Өөрөөр хэлбэл, эргэн төлөгдөх зээл. Түүнээс биш тусламжаар ирсэн хандивын мөнгө биш юм. Эргээд төлөгдөх энэ их зээлийг Сангийн яам болон нийслэлийн Засаг даргын Тамгын газар хянах ёстой аж. Харин Д.Авирмэдийн яриагаар Азийн хөгжлийн банкнаас хяналт тавьдаг гэж байгаа. Төслийн удирдагч өөрт нь хэн хяналт тавьдгийг мэдэхгүй байна гэдэг Монгол Улсын төрийн байгууллагууд ажлаа сайн хийж чадахгүйг илэрхийлж байгаа хэрэг биш үү, У.Хүрэлсүх сайд аа.

Уг нь 2013 онд нийслэлийн төвлөрлийг сааруулах зорилгоор УИХ-аас тогтоол гаргаж, Азийн хөгжлийн банкнаас хөнгөлөлттэй зээлээр санхүүжүүлэхээр болж төслийн эхний шангаа амжилттай тавьж байсан юмсан. Тэрбайтугай, тухайн үед төслийн багийнхныг Нийслэлийн Засаг даргын Тамгын газар, Барилга хот байгуулалтын яам, Сангийн яамны төлөөллөөс бүрдүүлж байв.

Хэд хэдэн байгууллагын төлөөлөл, хяналттай ажиллуулж байсан төслийн баг хэдий үеэс ийнхүү хэдхэн хүний гарт орчихсон юм. Ямартай ч Миеэг мөргөж Парламентын тэргүүнд санаархаж яваа Ж.Эрдэнэбаттан л Сангийн сайдаар ажиллах хэдхэн сарын хугацаандаа мань Авирмэдийг төслийн санхүүгийн ажилтан болгож “шургалуулсан” байдаг. Өнөөх нь ч хариуцсан ажлаа олигтой хийж чадахгүй хүнээр хийлгэх, буруу хийх гэх мэт ноцтой зөрчил гаргаснаас халагдаж байв. Гэвч Ж.Эрдэнэбат Ерөнхий сайд болохдоо өнөөх халагдсан санхүүчийг төслийн зохицуулагч болгон буцаан томилуулжээ. Д.Авирмэд их мөнгө эргэлдсэн төсөл хөтөлбөрүүд дээр ажиллаж гаршсан нэгэн гэдгийг намтраас нь харахад илт. Тэрбээр 2000 оноос хойш АНУ-ын Азийн сангийн “Мерси кор”-оос явуулсан “Говийн санаачилга” төсөл, Монголын мянганы сорилтын сангийн санхүү хариуцсан захирал, 2014 оноос Улаанбаатар хотын гэр хорооллыг хөгжүүлэх хөрөнгө оруулалтыг дэмжих хөтөлбөр” төслийн санхүүгийн мэргэжилтэн гэхчлэн төслөөс салсангүй. Ямартай ч төрийн албыг намын харьяаллаар бужигнуулдаг хөгийн жишиг төслийн энэхүү нэгж дээр ч шигж орхиж.

Хоёр төрд нүүртэй гэгчээр хотын даргатай сүжирч, М.Энхболдын фракцид багтаж явсан тэрбээр Ж.Эрдэнэбатын суганы хүн гэгдэх хэрнээ, мөн Уул уурхай, хүнд үйлдвэрийн сайд Д.Сумъяабазарын итгэлийг хүлээсэн “хор найруулагч” гэгдсэн хамгаалалтын хичнээн ч давхар дээлтэй юм.

Үргэлжлэлийг

Сэтгэгдэл үлдээх

Please enter your comment!