Ерөнхий сайд та авлига үүрлэсэн МХЕГ-т анхаарал хандуулна уу?

0
5760

Төр, төсвийн байгууллагын бүх шатанд авлига, хээл хахууль хэрээс хэтэрч, ард түмэн чинь өнөө маргаашийн борог амьдралынхаа төлөө борви бохисхийхгүй ажиллаж байгаа болохоос тэсвэр алдаж, тэмцэж босоход бэлэн болсон байгааг Ерөнхий сайд та мэдэрч буй биз ээ. Элдэв бусармаг явдал, эрээ цээргүй авлигал чинь ёстой л орон сууц, барилга байшингийн аюулгүй байдал руу аль эрт нэвчин орчихоод удаж байна. Тиймээс аль хэдийнэ авлигын үүр уурхай болчихоод байгаа Мэргэжлийн хяналтын ерөнхий газрыг татан буулгаж, шинэ боловсон хүчин, шинэ сэргэг удирдлагаар хангаж өгөөч… Нийслэлийн бүтцийг иргэд товчхондоо хоёр хэсэгт хуваадаг. Энхтайваны гүүрнээс урагш хэсэг чинь хөрсний усанд нэвчиж, хойших хэсэг нь багахан газар хөдлөлтөд тарж унахаар барилга байшингууд өрөгдсөөр байна. Улстөрийн хор найруулга, нам фракциудын тэмцэл, стратегийн орд газруудаа хувааж цөлмөх идээ бээрт ертөнцийнхөө цонхоор энгийн амьдрал руу өнгийгөөд нэг хараач. Бүхий л салбарт стандарт, хэм хэмжээг мөрдүүлэх учиртай МХЕГ-ыг мэргэжлийн бус нам дагасан, цүнх барьсан нөхөд удирддаг болж, тэдний ур чадваргүй унхиагүй үйл ажиллагаанаас болж энэ улсад, энэ хотод бүтэж бүрэлдэх сайхан зүйл гэж үнэндээ алга, У.Хүрэлсүх сайд аа!!!

АВЛИГА БАЙШИН НУРААДАГ

Т.МӨНХТУНГАЛАГ /www.iaag.mn/

Ийм гарчигтай нэгэн мэдээг АТГ-ын албан ёсны цахим хуудасны гадаад мэдээний хэсэгт байршуулсныг уншив1.

Яг нэг жилийн өмнө Мексикийн өмнөд хэсэгт 8.2 магнитудын хүчтэй газар хөдлөлт болсон бөгөөд энэ явдлыг тус улсад сүүлийн 100 жилд болсон хамгийн хүчтэй газар хөдлөлт гэж тэмдэглээд байна. Газар хөдлөлтийн дараа Салина Круз орчмын далайн усанд нэг метр өндөртэй давалгаа үүссэн нь цунами дагуулах вий гэж иргэд айж байв. Мексик нь дэлхийн таван тектоник хавтангийн уулзвар дээр оршдог. Үүгээрээ газар хөдлөлтийн хамгийн идэвхтэй бүсэд тооцогддог байна. Гэлээ ч энэ нь том аюул биш гэж иргэдийн төлөөлөгчид хэлж байна.

Мехико хотын 369 хүнийг амийг авч одсон газар хөдлөлтөөс нэг жилийн дараа тус улсын иргэний нийгмийн байгууллагууд “Энэ бол байгалийн гамшиг биш. Харин авлига болон хүний хайхрамжгүй хандлага, үйл ажиллагааны улмаас олон тооны барилга байшин нурсан” гэж үзэж байгаагаа илэрхийлжээ. Мексикийн Авлигын эсрэг групп “Зардлаа хэмнэсэн барилгын компаниуд, авлигад идэгдсэн төрийн албан хаагчдын хамтын хүч оролцоогоор 2017 оны 9 дүгээр сарын 19-ний гамшиг болсон” хэмээн мэдэгдсэн байна. Барилгын компаниудын үйл ажиллагааг хянах үүрэгтэй төрийн байгууллагууд ажлаа хийхгүй байгааг иргэд буруутган шүүмжилсээр байна.

Тус улсын иргэний нийгмийн байгууллагууд газар хөдлөлтөд өртсөн 38 барилгын 28-д нь гүнзгийрүүлсэн судалгаа хийсэн бөгөөд албан ёсны бичиг баримтууд цуглуулж, нурангийг нарийвчлан шалгажээ. Иргэдээс ярилцлага авч өөрсдийн хэмжээнд шалган судлаад барилгууд цаасан дээр анх төлөвлөсөн материал, арга, техникээр баригдаагүй болохыг тогтоосон байна. Энэ тайлан нь орон нутгийн удирдлагууд болон үл хөдлөх хөрөнгийн компаниуд хоорондын хууль бус харилцаа холбоог илтгэсэн баримт болж байгаа ажээ.

Мексикийн Авлигын эсрэг группийн судлаач Салвадор Камарена “Газар хөдлөлт хүний амийг хороодоггүй. Албан тушаалтнуудын хайхрамжгүй байдал, авлигач үйлдэл, мөн барилгын компаниудын сувдаг сэтгэл газар хөдлөлтийн хор уршгийг нэмэгдүүлдэг” гэж хэлсэн байна.

369 хүний амийг авч одсон аймшигт газар хөдлөлтийн үеэр сураггүй алга болсон 7 настай охиныхоо тухай мэдээ хүлээж буй нэгэн ээж сурвалжлагчдад хандан “Хэн ч миний өвдөлтийг төсөөлж чадахгүй” гэж хэлсэн нь олон хүний сэтгэлийг эмзэглүүлсээр байна. 2008 онд Хятадын Сичуань мужид болсон аймшигт газар хөдлөлт ч мөн авлигын хор хөнөөл байсан гэж түүхэнд тэмдэглэгдэн үлдсэн билээ. Энэ мужид газар хөдлөлтийн үеэр зөвхөн сургуулийн барилгууд нурсан бөгөөд хичээлээ хийгээд сууж байсан 10 мянга орчим хүүхэд амь насаа алдсан. Цорын ганц хүүхдээ алдсан эцэг, эхчүүд “Энэ бол байгалийн гамшиг биш. Чанаргүй барилга бидний хүүхдүүдийг амийг авлаа” хэмээн харуусан уйлж байсан юм.

Үргэлжлэлийг

Сэтгэгдэл үлдээх

Please enter your comment!