“Оргил рашаан сувилал”-ыг арилжжээ

0
33

Ашигтай ажилладаг байгууллагыг ашиггүй гэх хар тамга дарж, хувьчлах санаархал эртнээс үүдэлтэй. Тэгвэл “Оргил рашаан сувилал”-ыг хэдийнэ хувьчилсаныг ажилчид нь өнөөдөр дуулгав. Улмаар 115 ажилтан байгууллагыг нь хувьчилсан тул 12 ба түүнээс дээш сарын цалинтай тэнцэх хэмжээний мөнгөн төлбөр олгохыг төрөөс шаардаж байгаа талаараа мэдээлэл хийлээ.

Тэдний хэлж байгаагаар энэ сарын 3-нд нээлттэй дуудлага худалдаагаар 15 тэрбум 25 сая төгрөгөөр “Оргил рашаан сувилал”-ыг заржээ. Үүнээс хойш ажилтнуудын эрх ашиг хөндөгдөж, сэтгэл санааны тогтворгүй байдал үүсч, ирээдүйд итгэх итгэлгүй болж, төрийн өмч эзэнгүйдэж, хулгайд алдагдсаар байгаа гэнэ.

Хувьчлах нэрийдлээр төрийн өмчийг танил тал, эрх мэдэл, албан тушаалаа урвуулан ашиглаж шамшигдуулсан гэдгийг ч тэд дуулгалаа. Ингэж үзэх болсон үндэслэлийнхээ талаар “Өмч хувьчлах нэрийдлээр төрийн өмчийг танил тал, эрх мэдэл, албан тушаалаа урвуулан ашиглаж шамшигдуулж байгаа нь үе үеийн ажилтнууд бидний босгосон  сувиллын нэр хүнд төдийгүй ахмадууд, сувилагчдын эрх ашиг, сэтгэл санаа ихээр хохирч байна” гэсэн юм.

Төрөөс 2015 онд анх Оргил рашаан сувиллыг хувьчлах байгууллагын жагсаалтад оруулж, үнэгүйдүүлэх гэсэн бодлого барьж гэнэт хувьчлах тухай Засгийн газар, Улсын Их Хурлын тогтоол гаргажээ. Ингэж хувьчилснаар ажилтнуудын маань эрх ашиг хөндөгдөж, ажлын байрны баталгаа байхгүй болж, амьдрах нөхцөл бололцоогүй, сэтгэл санааны хувьд ч хохирол учирсан гэлээ. Тодруулбал, ажилчдын төлөөлөл “Манайд нийт ажиллаж байгаа 115 хүнд ажлаас чөлөөлөгдсөн эсэхээс үл хамааран 12 болон түүнээс дээш сарын цалинтай тэнцэх хэмжээний мөнгөн төлбөр олгохыг бид шаардаж байгаа юм. Энэ нь манай байгууллагыг зарсан төрийн мэдэлд очих 15 тэрбум төгрөгийн 6.3 хувьтай тэнцэнэ. Өөрөөр хэлбэл 115 хүний 12 сарын цалин нь 949 сая 221 мянган төгрөг болж байгаа юм” гэлээ.

Сэтгэгдэл үлдээх

Please enter your comment!