“Эрдэнэс Тавантолгой”-н захирал Б.Ганхуягийн байгуулсан нүүрсний 8 гэрээний ард УИХ-ын гишүүн Т.Аюурсайхан, МАН-ын бас нэг “том нөхөр” байна гэнэ дээ

0
1254

Нүүрсний гэрээ хэмээх энгийн сайхан нэршилтэй нууц наймааны талаар улс төрийн хүрээнийхэн, “юм”-ны учир гадарладаг хүмүүс андахгүй.

Товчхондоо, Тавантолгойн нүүрсийг “Эрдэнэс Тавантолгой” ХК-иас гэрээлэн борлуулдаг явцыг хэлж байгаа юм. Гэхдээ энэ гэрээг хийлгээд дундаас нь 1-2 ам.доллар “цохидог” бизнесийг “нүүрсний квот, нүүрсний гэрээ”-ний наймаа гэж ярьдаг болоод удаж байна.
Одоо “Эрдэнэс Тавантолгой” ХК-ийн гүйцэтгэх захирлаар ажиллаж буй Б.Ганхуягийг тус компанийн ТУЗ-ийн шийдвэрээр 2018 оны дөрөвдүгээр сарын 4-нд томилж байлаа. Эхлээд үүрэг гүйцэтгэгчээр, сүүлд нь засгийн шийдвэрээр жинхэлсэн байдаг юм.

Б.Ганхуягийг захирал болсноос хойш “Эрдэнэс Тавантолгой” ХК нүүрсний найман гэрээ байгуулсан байна. Яригдаад, бэлтгэгдээд, хугацаагаа хүлээж байгаа олон гэрээ бий.

Юутай ч нэлээд эрж, сурсны дүнд ийм тооны гэрээний талаарх мэдээллийг олж авлаа. Харамсалтай нь Б.Ганхуягийн байгуулсан эдгээр гэрээний ард УИХ-ын гишүүн Т.Аюурсайханы нэр гараад ирлээ. Тусгаар тогтнолын ордонд суудаг бас нэг “том нөхөр” Б.Ганхуягт нүүрс худалдах гэрээг хэнтэй хийх, яаж хийхийг үүрэгдээд сууж байдаг аж.

Ер нь бол Б.Ганхуягийг “Эрдэнэс Тавантолгой” ХК-ийн захирлаар томилогдоод сар болсны дараахнаас л УИХ-ын гишүүн Т.Аюурсайхан нүүрсний квоттой холбогдлоо гэх яриа түгээд эхэлсэн. Бүр Төрийн ордон, Тусгаар тогтнолын ордноор дүүрэн ярьцгаадаг болсон. Удалгүй МАН-ын нэг нөлөө бүхий нөхөр нэмэгдэж орж ирсэн байдаг.
Гурилын хулгай, нүүрсний хулгай хоёр баригддаг юм гэдэг.

Ж.Эрдэнэбатын Засгийн газрын үед “Эрдэнэс Тавантолгой”-н захиралд шууд үүрэг өгч удирддаг ганц хүн байсан бол одоогийн Засгийн газрын үед хоёр болж үржжээ.

Түүнчлэн “Эрдэнэс Тавантолгой” ХК-ийн нүүрсний наймаанд МАН-ын генсек оролцдог уу?

Эрдэнэс Тавантолгойн Гүйцэтгэх захирал Б.Ганхуяг өмнө нь Үйлдвэрлэл эрхэлсэн тэргүүн дэд захирлаар нь ажиллаж байв. Түүнийг томилогдсоноос сар гаруйхны дараагаас нүүрсний гэрээ дээр дурьдсанчлан бөөн бөөнөөрөө хийгдсэн нь анхаарал татаж байгаа юм.
Тухайлбал, 2018 оны тавдугаар сарын 9-ний өдөр ЭТТ-2018/115 дугаар бүхий гэрээ байгуулсан байна. Үүгээр 64.449.798 тонн коксжих нүүрсийг тонн тутмыг нь 68.1 ам.доллараар худалджээ. Энэ гэрээ нь 2018 оны есдүгээр сарын 1-нд дуусах буюу энэ хүртэл ачиж дуусгасан гэсэн үг.

Мөн ЭТТ-2018/134 дугаар бүхий гэрээг 2018 оны тавдугаар сарын 24-ний өдөр байгуулж, 490.971.278 тонн коксжих нүүрсийг худалдсан байна. Гэрээнд тонн тутмыг нь 69.2 ам.доллараар худалдахаар тооцож, энэ оны арваннэгдүгээр сарын 24-нийг хүртэл ачиж дуусгахаар байгуулжээ.

Дараа нь 2018 оны тавдугаар сарын 28-нд ЭТТ-2018/139, ЭТТ-2018/164, ЭТТ-2018/165 дугаар бүхий гурван гэрээ байгуулсан байгаа юм. Гурвуулаа тус бүр 500 000 тонн буюу нийлээд 1.5 сая тонн коксжих нүүрсний гэрээ байна. Тэднийг мөн л тонн тутмыг нь 69.2 ам.доллараар борлуулжээ. Хугацаа нь гурвуулаа 2018 оны арванхоёрдугаар сарын 1-нд дуусах юм байна.

Энэ нэг сар гаруйхны хугацаанд таван удаагийн гэрээгээр маш их хэмжээний коксжих нүүрс худалдсан байгаа юм.
Ингээд дараа нь 2018 оны зургадугаар сарын 7-нд ЭТТ-2018/178 дугаартай гэрээгээр 200 000 тонн исэлдсэн нүүрсийг тонн тутмыг нь 16.1 ам.доллараар худалдах гэрээ байгуулжээ. Гэрээний хугацаа нь энэ оны аравдугаар сарын 7-нд дуусна.
Бас 2018 оны зургадугаар сарын 11-нээс аравдугаар сарын 22-ны хооронд ачиж дуусгахаар тус бүр 200 000 тонн, нийт 400 000 тонн исэлдсэн нүүрсний ЭТТ-2018/181, ЭТТ-2018/183 дугаартай хоёр гэрээг байгуулжээ. Эдгээрийн тонн тутмыг нь 16.1 ам.долларын үнэтэй худалдсан байна.

2018 оны зургадугаар сарын 15-ны өдөр дахиад ЭТТ-2018/185, ЭТТ-2018/186 дугаар бүхий хоёр гэрээгээр тус бүр 200 000, нийт 400 000 тонн исэлдсэн нүүрсийг тонн тутмыг нь 16.1 ам.доллараар худалдсан байна. Энэ нүүрсийг 2018 оны есдүгээр сарын 16-нд буюу ирэх 7 хоногийн сүүлээр ачиж дуусгахаар гэрээлсэн байгаа юм.
Ингэж таван удаагийн гэрээгээр 1.0 сая тонн исэлдсэн нүүрс борлуулжээ.
Энэ оны зургадугаар зургадугаар сарын 28-нд ЭТТ-2018/216 дугаар бүхий гэрээгээр 76.777.33 тонн коксжих нүүрсийг тонн тутмыг нь 70.1 ам.доллараар худалдсан байна. Энэ гэрээ арванхоёрдугаар сарын 1-нд дуусна.

Түүнчлэн 2018 оны долдугаар сарын 2-6-ны хооронд нийт таван удаагийн гэрээгээр тус бүр 500 000 тонн коксжих нүүрс худалдах гэрээ байгуулжээ. Тодруулбал, 2018 оны долдугаар сарын 2-ны өдөр ЭТТ-2018/264, ЭТТ-2018/266 дугаар бүхий хоёр гэрээ, долдугаар сарын 4-нд ЭТТ-2018/265, ЭТТ-2018/267 дугаар бүхий дахин хоёр гэрээ, мөн долдугаар сарын 6-ны өдөр ЭТТ-2018/287 дугаар бүхий гэрээнүүдийг байгуулсан байгаа юм. Тус бүр нь 500 000 тонн, нийт 2.5 сая тонн коксжих нүүрс худалдсан гэсэн үг. Эдгээрийг тонн тус бүрийг нь 70.1 тонноор худалдахаар гэрээлсэн байна. Дээрх таван гэрээний дагуу 2.5 сая коксжих нүүрсийг 2019 оны нэгдүгээр сарын 1-ний өмнө ачиж дуусгах хуваарь хийсэн байна.

Товчхондоо Б.Ганхуягийг “Эрдэнэс Тавантолгой” ХК-ийн захирал болсноос хойшхи гурван сарын дотор ийм хэмжээний нүүрсний гэрээг байгуулсан гэсэн үг.

Гэтэл Д.Ариунболдыг тус компанийн захирал байхад сайн чанарын коксжих нүүрсийг 500 000 тонноор нь худалдах гэрээ тун цөөхнийг байгуулсан байдаг юм. Тухайлбал, 2017 оны тавдугаар сарын 25-наас долдугаар сарын 31-ний хооронд ЭТТ-2017/044-А , ЭТТ-2017/046 –А, ЭТТ-2017/080-А, ЭТТ-2017/081, ЭТТ-2017/101, ЭТТ-2017/102, ЭТТ-2017/103, ЭТТ-2017/105, ЭТТ-2017/108, ЭТТ-2017/117, ЭТТ-2017/118, ЭТТ-2017/122, ЭТТ-2017/123, ЭТТ-2017/124 дугаар бүхий гэрээгээр 30 000-1.0 сая тонн хүртэл гэрээ хийж, нийт 3 510 000 тонн коксжих нүүрс борлуулсан мэдээлэл бий.

Харин Б.Ганхуяг захирлын байгуулсан коксжих нүүрсний гэрээ гурван сарын дотор 11 болж, гэрээлсэн нүүрсний хэмжээ нь 5.0 сая тонн дөхөөд явчихсан байна.
Хамгийн гол нь энэ бүх гэрээ ямар замаар хийгддэг нь анхаарал татна. Өөрөөр хэлбэл, хэрхэн хийгдсэн нь ил болох шаардлагатай юм.

Ер нь тус компанийн гэрээнд УИХ-ын нэр бүхий гишүүн “хуруу” дүрчихээд байдгийг Төрийн ордон, Тусгаар тогтнолын ордноор дүүрэн ярьдгаас гадна Б.Ганхуяг захирал ч энэ мэт гэрээг “Генсек мэднэ” гэж хэлдэг тухай яриа улс төрийн хүрээнд тараад удаж байна.
Б.Ганхуягийн хэлсэн ГЕНСЕК нь МАН-ын генсекийг хэлээд байгаа бололтой юм. Генсек “Эрдэнэс Тавантолгой”-н гэрээнд хуруу дүрсэн үү үгүй юу гэдэг тодорхой хугацааны дараа ил болох зүйл. Гэхдээ түүний нэрийг барьдаг ч байж болохыг эх сурвалжууд үгүйсгэхгүй байна. Бидний жижигхэн Монголд нууц гэж байдаггүй хойно эргэлзээ төрүүлэм эдгээр мэдээллийн учиг удахгүй тайлагдах биз.

Эх сурвалж: aguulga.mn

Сэтгэгдэл үлдээх

Please enter your comment!