Улстөржсөөр буудаагүй өвөлжих вий

0
46

Улстөржиж байх зуур хөрсөнд цочир хүйтэрч, буудайгүй өвөлжих аюул нүүрлээд байна. Бичин жилийн эхлэлд, үгүй төгсөлд нь зуд болдог хэмээн маргасан малчин, тариаланчид хоёр жил айж түгшсэн. Азаар гэлтэй хуурайшилт ихтэйг эс тооцвол цаг агаар тогтуун, аятай таатай өнгөрсөн хоёр жилийг үдэв. Тиймдээ ч аюул ард хоцорлоо хэмээн их захгүй улстөржиж, урдах ажлаа умартах нь тэр. Хот хөдөөгүй улстөржиж, ухаангүй ноёнд урагшгүй албат гэгчээр доодох нь дээдэхээ дэгээдэх байдлаар эрх баригчид хүртэл дотроо хагаралдаж, төрийн ажил урагшлахаа болив. Засгийн газраас гаргасан цалин нэмэх шийдвэр ч эсэргүүцэлтэй тулж нийгмээрээ талцах зуур аюул хаяанд ирж, хаалга тогшиж эхэллээ.

Урд шөнө орсон бороо зарим аймагт цас болжээ. Тухайлбал, Завхан аймагт цастай байна. Цаг уур орчны шинжилгээний газраас аруун аймгуудын нутгаар солигдмол үүлтэй, бусад нутгаар үүлэрхэг. Төв болон зүүн аймгуудын нутаг, баруун аймгуудын нутгийн зүүн, говийн аймгуудын нутгийн хойд хэсгээр бороо, уулархаг нутгаар хур тунадас орно. Салхи зүүн аймгуудын нутгаар баруун өмнөөс баруун хойш эргэж, бусад нутгаар хойноос  6-11 м/с, говийн аймгуудын нутгаар 18-20 м/с, бусад нутгаар 14-16 м/с хүрч ширүүсэхийг анхааруулж байна. Энэ сарын урьдчилсан мэдээгээр нэгдүгээр арав хоногийн дунд үе болон сүүлч, хоёрдугаар арав хоногийн дунд үе, гуравдугаар арав хоногийн эхээр сэрүүсч тариалан бүхий нутгаар хөрсөн дээр цочир хүйтэрнэ. Гуравдугаар арав хоногийн сүүлийн хагаст хүйтэрч шөндөө хасах градуст орох төлөвтэй байгаа тул ургац хураалтыг талбайн болцоос хамааран ангилан болон шууд хадах ажлыг зохион байгуулахыг Ус цаг уурын байгууллагаас анхааруулсан.

Энэ жил 497 мянган га талбайд тариалалт хийсэн бөгөөд өмнөх жилтэй харьцуулахад ойролцоогоор 2 дахин их ургац хураан авах төлөвтэй байгааг ургацын урьдчилсан балансаар тогтоосон тухай салбарын сайд нь хэд хоногийн өмнө баяртайгаар мэдээлсэн. Энэ сарын дундаас улс орон даяар ургац хураалтын ажил жигдэрч эхэлнэ. Гэвч улстөржилт, тулга тойрсон хэрүүлээ хойш тавьж ургац хураалтаа түргэвчлэхгүй бол тариалангийн талбай нэг л өглөө цасанд дарагдах вий. Өмнө нь 20 мянган тонн буудайг цасанд даруулж, ашиглах боломжгүй болж байсан гашуун түүх бий.

Сэтгэгдэл үлдээх

Please enter your comment!