Хувийн их, дээд, дунд сургуулийн эзэд нь улстөрч, бизнесмэнүүд

0
135

-Тэдэнд Ц.Цогзолмаа сайдын шийдвэрүүд хатуудаж, таалагдахгүй байна-

Боловсролын салбар гэж лүйжин тавьж, чойжин буулгаж баймаар хэцүү салбар болоод удаж буйг хэлэх юун. Ядаж байхад гадаад дотоодын төсөл хөтөлбөр, тендер төсвийн дийлэнх хэсэг нь энэ яаманд төвлөрдгөөс жирийн нэг сурах бичиг хэвлүүлэгчээс авахуулаад тендерт санаархсан том улс төрчдийн эдийн засгийн эрх ашиг бүхий шуналын нүд энэ яаманд төвлөрдгөөс хэл ам, хол ойрын дайсан болоод нөхөд үеийн үед, цагийн цагт, нам бүрт байсаар ирсэн. Тендерийг нь бүтээж өгвөл талархана. Тендерт ялахгүй бол шууд дайсан болно. Сургуулийн захирлыг ажлаа сайн хийсэнгүй гээд халбал өө би муу учраас халагдлаа гэхгүй, бусдаас өө сэв, шалтаг хайж, бултаараа дайсан болно. Ийн дайснууд хажуу өврөөс, хаа холоос ер нам, улс төр харгалзахгүй, сайн мууг ялгахгүй олширдог үндсэн цэг гэж байгаа. Ийм орчинд баргийн сайд энэ яамыг хэл амгүй авч явна гэдэг лөөлөө. Товчхондоо сайддаа, хувь хүндээ биш, салбартаа, яамандаа бүх хэргийн учир бий.

Гагцхүү улс орон, олон нийтийн эрх ашгаас хувийн эрх ашиг, хувийн нэр алдраа дээгүүрт тавьсан хүн л Боловсролын сайн сайд нэр алдар хүртэнэ. Харин шударга хүнд энэ салбар хамгийн халгаатай. Дайсан олныг хураана. Дайралт, гүтгэлгэд хамгийн их өртөнө.

Одоогийн сайд Ц.Цогзолмаа чухамдаа тэдгээр шударгуудын нэг байж таарах нь. Улс төрийн хүрээ болон олон нийтэд зарчимч, дайчнаараа зартай түүний олон ч шийдвэр эрх мэдэлтнүүдэд таалагдахгүй байгаа. Их, дээд сургуулийн босго оноог 480 болгож өндөрсгөснөөсөө эхлээд л дайсан хурааж эхэлсэн. Нэр төдий босго оноо тавьчихаад оюутнуудыг бөөндөж элсүүлдэг хувийн сургуулиуд салбарын сайдынхаа эсрэг “цэрэглэн” босох шахаж байна. Халаасандаа хувийн сургуультай улстөрчид ч сүрэглэн дайрав. Тэдгээр дайснууд мөнгөтэй, нөлөө бүхий түшээд голдуу байдаг нь үргэлжийн мөнгө цацсан хүчтэй эсэргүүцлийн шуургыг дэгдээж байна. Есдүгээр сарын 1-нд ажил хаясан багш нар гэхэд чухамдаа Ц.Цогзолмаад дайсагнасан, гомдсон олны түүн рүү шидсэн чулуу. Гэвч тэр бууж өгөхгүй нь сайхан. Зоримог шийдвэрүүд, шударга мэдэгдлүүдээсээ няцахгүй, буцахгүй давшиж явна. Үүнийх нь төлөө олон нийт Ц.Цогзолмаагийн цог золбоог урамшуулж, хүч оруулж улам эрчтэй шинэчлэл хийж боловсролын салбарын бугшсан идээ бээрийг шахаж, хамгаас чухал энэ салбарыг шинэ шатанд гаргах цорын ганц дайчнаар өргөмжлөөд байна. Битгий ухарч няцаарай, Цо сайд аа!

Сэтгэгдэл үлдээх

Please enter your comment!