Багш нарын цалин 1,6 сая болоход Үйлдвэрчний эвлэлийн нэг багшаас авдаг татвар 10600 төгрөг болно

-Сар бүр 40 мянган багшаас 10600 төгрөг авбал тус байгууллагын орлого хэд байх вэ, түүнээ юунд зарцуулдгийг шалгах цаг болжээ-

 

Татвар төлөгчдийн халааснаас төртэй зэрэгцэн татаас авдаг ганц байгууллага бий. Тэр бол газар нутгаар нь бүсчилсэн аймаг, нийслэлийн 22 холбоо, мэргэжлээр нь ангилсан салбарын 14 холбоо бүхий Монголын үйлдвэрчний эвлэл юм. Гишүүдийн нь тоо өдрөөс өдөрт нэмэгдэж байгааг баяртайгаар тунхагладаг эл байгууллага хөдөлмөрчдийнхөө эрх ашгийг хамгаалах үндсэн үүрэгтэй. Гэхдээ үүнээсээ урьтаж, тэднээр дамжуулан хөрөнгөө зузаатгах сонирхолтой гэхэд хилсдэхгүй.

Монголын Үйлдвэрчний эвлэлийн холбооны дүрэмд холбооны гишүүнээс нэг сарын цалин хөлс, түүнтэй адилтгах орлогын нэг ба түүнээс дээш хувьтай тэнцэх хэмжээгээр тогтоож, бэлэн бусаар хураана гэж заажээ. Өөрөөр хэлбэл, 500 мянган  төгрөгийн цалингаа голж ажил хаялт зарлаад байгаа багш нар сар бүр цалингаасаа 5000 төгрөгийг эл байгууллагад хураалгадаг гэсэн үг.

МҮЭХ-ны дэд ерөнхийлөгч С.Эрдэнэбат “Монголын үйлдвэрчний эвлэлийн холбооны гишүүд сайн дураараа татвар шимтгэлээ бэлэн бусаар хураалгамаар байна, зөвшөөрч байна гэж гарын үсэг зурсан байдаг. Хамтын гэрээндээ Үйлдвэрчний эвлэл, захиргааны байгууллагууд харилцан үйл ажиллагаагаа дэмжиж, хамтарч ажиллах талаар тусгачихсан байгаа. Бүх зүйлийг хуулиар зохицуулах албагүй. Хамтын гэрээ хэлэлцээрээр зарим зохицуулагдаагүй зүйлийг Хөдөлмөрийн хуулиар зохицуулахыг зааж өгсөн байдаг” хэмээж байсан удаатай.

Монгол Улсад 2016 оны байдлаар төрийн болон хувийн цэцэрлэг, сургууль, их дээд 48.577 багш ажиллаж байна гэсэн тоо байдаг. Харин ерөнхий боловсролын сургуульд 28490 багш ажиллаж байгаагаас нийслэлд 10530 аж. Нэг багшаас дунджаар 4.500 төгрөг авдаг, багш болгоноос авдаг гэвэл мөн ч их мөнгө гарч байна даа. Энэ бол зөвхөн боловсролын салбараас олж байгаа мөнгө. Үүний цаана эмч, сувилагч, барилгачин гээд мундахгүй. Хачирхалтай нь Үйлдвэрчний эвлэл энэ мөнгийг юунд зарцуулдгаа хэзээ ч тайлагнаж байгаагүй. Сардаа тэрбум гаруй төгрөг цугладаг гэх албан бус мэдээлэл бий.

Цалингийн доод хэмжээ өсч, цалин нэмэгдэх нь хэнд ашигтай вэ. Өнөөдрийн авдаг 500.000 төгрөг маргааш 700.000 боллоо гэхэд үр дүн гарах уу. Цалин нэмэх сургаар өргөн хэрэглээний барааны үнэ хөөрөгдөж, шатахууны үнэ хөөсөрдөг бичигдээгүй хууль Монголд үйлчилдэг. Үндэсний статистикийн хорооноос гаргасан энэ оны хоёрдугаар улирлын тайланд нэг өрхийн сарын дундаж зарлага энэ оны хоёрдугаар улиралд 1.1 сая төрөг болж өмнөх оны мөн үеэс 96.7 /9.7 хувь/ мянган төгрөгөөр өссөн талаар дурьджээ. Үүнд хүнсний бус бараа, үйлчилгээний болон бусад зарлага 73.1 мянган төгрөгөөр өссөн нь голлон нөлөөлсөн байна.

Мөн хэрэглээний бараа, үйлчилгээний үнэ энэ оны эхний долоон сарын байдлаар 7.7 хувь өсчээ. Төмс хүнсний ногоо 45 хувь, сүү сүүн бүтээгдэхүүний үнэ 10 хувиар өссөн. Орон сууц, ус цахилгаан, хийн ба  бусад түлшний үнэ 14.9 хувиар өсчээ. Харин мах махан бүтээгдэхүүн 32.8 хувиар нэмэгдсэн. Өөрөөр хэлбэл, өнөөх нэхээд байгаа нэмэгдэл нь гараар нь дамжих төдий байгааг ухаант багш нар мэдсэнгүй юу, мэдсэн ч санаатай үйлдэл хийв үү. Төрийн албан хаагчдын энэхүү үйлдэлд хувийн хэвшлийнхэн чирэгдэж, нуруун дээрх ачаалал нь хүндэрдэг. Өнөөдөр амтай бүхэн бензиний үнэ эрс өссөнийг ярьж, бичиж байна. Гэтэл энэ бүхэн дээрх цалингийн нэмэгдэлтээс үндэстэйг огт ярьдаггүй. Шатахуун импортлогчид руу л бурууг чихэж хараагаад байгаагаас Үйлдвэрчний эвлэлийн шантааж руу хашгичдаг хэн ч үгүй.

Үнэндээ хувийн хэвшлийнхэн болоод ажилгүйчүүд, тэтгэврийнхний нуруун дээр ирдэг энэ хатуу зовлон төрийн албан хаагч хийгээд Үйлдвэрчний эвлэлд хамаатай зүйл биш. Харин ч цалин нэмэгдэх нь Үйлдвэрчний эвлэлд ашигтай. Монголын үйлдвэрчний эвлэлийн холбооны байгуулсан томоохон гавьяануудыг дурьдвал цалингийн доод хэмжээг нэмүүлж 140400-гаас 192000 төгрөг болгосон. Хэдий наанаа 50 гаруй мянган төгрөгөөр нэмэгдсэн нааштай үйл явдал боловч нийт массын хувьд өнөөх өргөн хэрэглээний барааны шошгон дээрх үнийн цифр өөдөө өгсөх сайхан шалтгаан болсоор ирсэн. Албан мэдээгээр сүүлийн нэг жилийн хугацаанд 4.5 хувиар өссөн инфляц өнөөх 50 мянган төгрөгийн нэмэгдлийг аваагүйтэй адил, бүр тэрнээс ч дор хэмжээнд хүргэж орхилоо. Харин 36.7 хувиар нэмэгдсэн цалингийн доод хэмжээ Монголын үйлдвэрчний эвлэлийн холбоо гэх байгууллагын орлогыг 36.7 хувиар нэмснийг хэн ч анзаараагүй. Өөрөөр хэлбэл, холбоондоо 1400 төгрөгийн татвар төлдөг байсан ажилчин цалин нь нэмэгдсэнээр 1900 төгрөгийн татвар төлдөг болсон хэрэг. Энэ мэтчилэн цалингийн доод хэмжээ 320 мянга болж, багш нар цалингаа 1.5 саяд хүргэх нь нийтэд гэхээсээ зөвхөн нэг байгууллагад л ашигтайд анхаарч харах цаг болжээ.


Notice: Undefined variable: fields in /home/tuvmn1/niigmiintoli.mn/wp-content/themes/Newspaper/includes/wp_booster/comments.php on line 64

Сэтгэгдэл үлдээх

Please enter your comment!