Н.Цэрэнбат төслийн мөнгөнөөс дүүгийнхээ компанид шилжүүлсэн үү?

0
1541

-БОЯ-ны газрын дарга П.Цогтсайханы дарамтаас болж бие давхар бүсгүй ажилтан нь хүүхдээ цааш тээх боломжгүй болтлоо бие нь мууджээ-

Байгаль орчин, аялал жуулчлалын сайдын хамаарал бүхий компани хэрхэн мөнгө “халаасалсан” талаар АТГ-аас мэдээлж, энэ хэргийг шалгаж байгаагаа мэдэгдсэн. Тодруулбал, Байгаль, орчин аялал жуулчлалын яаманд засвар хийх, хурлын заалны тоног төхөөрөмж нийлүүлэх нийт 200 орчим сая төгрөгийн тодорхой хэсгийг ном, товхимлын мөнгө мэтээр халхавчлан “Эрдэнэзул” ХХК руу шилжүүлж бэлэн мөнгө болгон гарган авч, улмаар засварын ажлыг БОАЖ-ын сайдын хамаарал бүхий мөн компани гүйцэтгэсэн байж болзошгүй нөхцөл байдал тогтоогдсон гэж байгаа.

Харин ширэн нүүрт сайд маань АТГ-ын Мөрдөн шалгах албаны ажлыг үгүйсгэн дээрх мэдээллийг өөртэй нь хамааралгүй хэмээн санд мэнд мэдэгдсэн. Харамсалтай нь арчаагүй удирдлага ажилтан, алба хаагчдадаа түвэг уддагийн жишгээр Н.Цэрэнбат сайд ч яамыг яйран болгож буй бололтой. Товчхондоо БОАЖЯ-ыг хувийн компанийн засаглал руу чирж байна хэмээх дургүйцэл яаманд газар авчээ. Үүний нэг илрэл нь АТГ-ын шалгалтаар тогтоогдсон засварын ажлыг хүртэл өөрийн хамааралт компаниар дамжуулан хийлгэсэн гэх зөрчил.

Зүүдээ ярих гээд хулгайгаа ярив гэгчээр дээрх мэдээллийг үгүйсгэх гээд 26 компанид хувьцаа эзэмшдэгээ бататган зарласан тэрбээр барилгын салбар дахь хувийн бизнесийг нь авч явдаг бизнесийн хамтрагч н.Баттулга болон төрсөн дүү Намсрайн Отгонжаргал гэх нөхдөөр дээрх ажлуудаа хийлгэснийг бараг л хэлчих шахав.

Үүнтэй нь зэрэгцэн БОАЖ-ын сайд Н.Цэрэнбат болон түүний нутаг нэгт нөхөр, Ардчилсан намын угшилт П.Цогтсайхан нарын дээрэнгүй авир, хууль бус үйлдлийг зогсоож хариуцлага тооцохыг хүссэн шаардлага хэвлэлээр цацагдаж эхэллээ.

ТЗУГ-ын дарга П.Цогтсайхан гэгч нь нэр бүхий мэргэжилтнүүдийг дуудаж ажлаа өөрчлөхийг шаарддаг гэнэ. Тэр бүү хэл, хүний нөөцийн мэргэжилтнээрээ дамжуулан АТГ-т явуулах урьдчилсан мэдүүлгийн хуудсанд гарын үсэг зурахыг шаардаж дарамталсан, улмаар хүслээ гүйцээн Төрийн нарийн бичгийн дарга Ц.Цэнгэлийг ээлжийн амралтаа авахаас өмнө яаравчлан шийдүүлж дөнгөжээ. Харамсалтай нь, энэхүү дарамт хавчлага, дайралтад өртсөн мэргэжилтэн М-ийн бие тавгүйтэж, хоёрхон сарын дараа амаржих байсан бүсгүйд хүүхдээ цааш тээх боломжгүй гэсэн онош тавигдан, эмнэлэгт хүргэгдсэн байна. Төрийн яамыг төрлийн яам болгохоор улайрч суугаа Н.Цэрэнбат, түүний томилгоот П.Цогтсайхан нарын хэмжээлшгүй эрхт энэхүү дарангуйллыг яаралтай таслан зогсоохгүй бол Зам тээвэр, хөгжлийн яаманд гарсан ноцтой хэргийн үргэлжлэл тус яаманд ч үүсч мэдэхээр байгаа аж.

Сэтгэгдэл үлдээх

Please enter your comment!