Улаанбаатар хотод Төв болон зүүн Азийн бодибилдинг, фитнессийн аварга шалгаруулах тэмцээн болно

0
4560

Манай улсын спорт холбоодууд олон улсын хэмжээний уралдаан тэмцээнүүдийг өөрийн орондоо амжилттай зохион байгуулсаар байна. Тэдгээрийн нэг болох Монголын Бодибилдинг, фитнессийн нэгдсэн холбоо гэхэд л Бодибилдинг, фитнессийн дэлхийн болон азийн аварга шалгаруулах нэр хүндтэй тэмцээнүүдийг жил бүр эх орондоо зохион байгуулж ирэв. Саяхан тивийн аварга шалгаруулах тэмцээнийг зохиож, улмаар ази тивийн 50 шахам улсын нэгдсэн бодибилдинг, фитнессийн холбоог монгол залуу удирдахаар болж ерөнхийлөгчөөр нь сонгогдсон. Салбартаа, төрөлдөө улс орныхоо нэрийг дуурсгаж, амжилтаа ахиулж яваа тус холбооныхон энэ удаад Төв болон зүүн Азийн бодибилдинг, фитнессийн аварга шалгаруулах тэмцээнийг Улаанбаатар хотноо хоёр дахь удаагаа зохиох гэж байна. Есдүгээр сарын 1-3 буюу ирэх бүтэн сайн өдөр болох тус тэмцээнийг Азийн бодибилдинг, фитнессийн холбоо буюу “AFBF”-тэй хамтран зохион байгуулж байгаа бөгөөд түрүүлсэн дөрвөн тамирчин нь “IFBB-ын procard”-ын эзэн болдгоороо онцлогтой, нэн хариуцлагатай тэмцээн аж.  Түүнчлэн аравдугаар сард Польш улсад зохиогдох “Фитнессийн дэлхийн аварга шалгаруулах тэмцээн”, мөн ирэх сарын 17-24-ний хооронд Хятад улсад болох “Торгоны зам” тэмцээний өмнө болж байгаа нь манай тамирчдын хувьд өндөр хариуцлагатай сорил нь болж байгаа юм байна. Энэхүү олон олон боломжийн үүдийг нээх тус тэмцээнд манай улсаас улсын 6 удаагийн аварга, Монголын 3 удаагийн мистер Батболд, мэнс физик төрөлд энэ жилийн Ази тивийн аваргын хүрэл медальт Энхжин, 2017 оны Ази тивийн аваргын мөнгөн медальт Баасандорж, эмэгтэй тамирчдаас Оюунтуяа, Доржнамжил зэрэг 30 гаруй шилдэг тамирчин оролцохоор мэдүүлгээ өгчээ. Хүн гээч амьтны бие махбодийг зөв хооллолт, хөдөлгөөн гэхчлэн амьдралын зөв хэв маягаар хэрхэн гайхамшигтай хөгжүүлж, эрүүл сайхан авч явж болохын үлгэрлэлийг харуулсан энэхүү сайхан спортоор хичээллэгч хүүхэд залуусын тоо жил ирэх бүр өссөөр байгаа нь сайшаалтай юм.

Ирэх амралтын өдрүүдээр болох тус тэмцээний үеэр үзэсгэлэн худалдаа зохиогдох бөгөөд фитнесс клубүүдэд хөнгөлөлттэй үнээр хичээллэх эрхийн картыг мөн нээж өгөх юм байна. Түүнчлэн уураг, витаминуудыг ч хямдралтай үнээр худалдаалах гэнэ.

 

Сэтгэгдэл үлдээх

Please enter your comment!