Шинжилгээнд хамрагдсанаар элэгний вирүсийн тархалтыг зогсооно

0
82

Элэгний вирүсийн тархалт өндөр байна

Засгийн газраас хэрэгжүүлж буй “Элэг бүтэн Монгол” үндэсний хөтөлбөрийн хүрээнд энэ онд 40-65 насны хүмүүсийг элэгний вирүсийн шинжилгээнд хамруулахаар болсон билээ. Шинжилгээг энэ сарын 15-наас есдүгээр сарын 15 хүртэл дөрвөн сарын турш үнэ төлбөргүй авах юм. Манай улсад анх 1980-1990 оны үед бохир тариураар дамжин элэгний вирүс тархажээ. Тухайн үед тариурыг ариутгах зорилгоор буцалгаж байсан ч элэгний вирүс өндөр хэмийг тэсвэрлэх чадвартай тул ийн олон хүнд халдвар дамжсан байна. Мөн орчинд үед шүдний эмнэлэг, шивээс, гоо сайхны газар, бэлгийн зам зэрэг олон хэлбэрээр элэгний вирүс тархаж байгаа аж. Үүнээс хамаарч өдөр бүр хамгийн багадаа долоон хүн элэгний өвчнөөр нас барж байгааг судалгаагаар тогтоожээ. Иймд Засгийн газраас 2020 он гэхэд бүх хүнийг вирүсийн шинжилгээнд хамруулж, С вирүстэй 150 мянган хүнийг эмчлэх зорилт дэвшүүлсэн байна. Үүнд 220 гаруй тэрбум төгрөг зарцуулахаар төлөвлөөд байгаа юм.

Урдьчилсан байдлаар манай улсад 400 гаруй мянган хүн элэгний вирүсийн халдвартай аж. Харамсалтай нь эдгээр хүний 30-40 хувь нь халдвартай гэдгээ мэддэг байна. Үлдсэн нь халдвартай эсэхээ мэдэхгүй явсаар нэг мэдэхэд хатуурал болж, эмчилгээ авахад хэтэрхий оройтож байгааг эмч мэргэжилтнүүд анхааруулсан. Элэг чимээгүй эрхтэн тул хүнд мэдэгдэхүйц зовиур илрэхгүй явсаар нэг л мэдэхэд хатуурал болох аюултай аж. С вирүсийн хувьд эмээр эмчлэгдэх боломжтой. Манайд “Харвони” эмийг хөнгөлөлттэй борлуулж байга билээ. Харин В, Д вирүстэй бол эмчлэх төгс арга одоогоор бий болоогүй байгаа юм. Гэхдээ сэтгэлээ унах хэрэггүй. Юуны өмнө хүмүүс эхний ээлжинд вирусын халдвартай эсэхээ мэдэх нь ихээхэн чухал болохыг салбарынхан тайлбарлаж байна. Ингэснээр халдвартай бол хэрхэн эмчлэх, гам барих, амьдралын зөв хэвшлийг мөрдөх талаар одооноос анхаарах ёстой. Харин вирүсгүй бол халдвар авахгүй байхад юуг анхаарах талаар нарийн мэдлэгтэй болох шаардлагатай юм.

Харьяа өрхийн эмнэлэгтээ шинжилгээнд хамрагдана

Заагдсан насны иргэд буюу 40-65 насныхан илрүүлэг шинжилгээний хугацаа эхэлмэгц, харьяа дүүргийнхээ өрхийн эмнэлэгт хандаж вирүсээ шинжлүүлэх юм. Мөн хувийн хэвшлийн 10-аад лаборатори шинжилгээ авч байна. Ингэхдээ иргэний үнэмлэх, эрүүл мэндийн даатгалын дэвтэртэйгээ очих учиртай. Гол нь эрүүл мэндийн даатгалын дэвтрээ хуулийн дагуу бөглүүлсэн байх шаардлагатай юм. Хэрвээ вирүс илэрсэн бол дараах дарааллаар шат дамжлагтайгаар шинжилгээ эмчилгээндээ хамрагдах аж. Энэ нь өрх, сумын эрүүл мэндийн төвд хийсэн шинжилгээгээр элэгний В, С вирүсийн халдвартай илэрсэн бол эрүүл мэндийн даатгалын ерөнхий газраас итгэмжлэгдсэн лабораторуудад вирүс тоолох шинжилгээнд хамруулна.

Элэгний В, С вирүс тээгч болон элэгний архаг өвчтэй, хатууралтай иргэд байвал элэгний хорт хавдрыг эрт илрүүлэх үзлэгт хамруулна. Эрт илрүүлэг үзлэгт орж буй зорилтот бүлгийн хүнд элэгний ЭХО, хавдрын маркер AFP тодорхойлох шинжилгээ, биохимийн болон цусны дэлгэрэнгүй шинжилгээ хийнэ. Уг элэгний хорт хавдар илрүүлэх багц шинжилгээг аймаг, дүүргийн түвшинд хийхээр төлөвлөөд байгаа.
Үс тоолох шинжилгээгээр вирүсийн архаг тээгч эмчилгээ хийх шаардлагатай иргэдийг хөнгөлөлттэй үнээр вирүсийн эсрэг эмчилгээнд хамруулна. Элэгний архаг өвчтэй болон элэгний вирүс тээгч хүмүүсийг эмчийн хяналтанд бүрэн хамруулж шаардлагатай оношилгоо, эмчилгээг зааврын дагуу хийх юм.

Элэгний хорт хавдар илэрсэн хүмүүсийг Хавдар судлалын төв хорт хавдрын эмчилгээг удирдамжийн дагуу хийх зорилготой юм. Элэгний хавдрын эхний шат, элэгний хатууралтай, зайлшгүй элэг шилжүүлэн суулгах шаардлагатай иргэдийн элэг шилжүүлэн суулгах санхүүжилтийг төр хариуцах юм.

Сэтгэгдэл үлдээх

Please enter your comment!