fbpx

Эрэн сурвалжлах - Page 3

//

“Нүхт тур” руу их хэмжээний мөнгө яагаад шилжүүлэв, Л.Оюун-Эрдэнэ сайдаа!!!

Зорчигчдын хоолыг зогсоосон атал “Нүхт тур” руу их хэмжээний мөнгө яагаад шилжүүлэв…… МИАТ компанийн сэжиг бүхий гүйлгээ, цар тахлын хүнд үед байж боломгүй гэрээ хэлэлцээрүүдийг манай сайт цувралаар хүргэсээр байгаа. Энэ удаад

/

МИАТ хэний саалийн үнээ болсныг илчлэх цаг ойртов

Төрийн өмчит МИАТ компани хагас жилийн өмнөөс гэнэтхэн Сингапур дахь компаниар шатахуунаа цэнэглүүлдэг болж ердөө хагас жилийн дотор Uniline Pte.Ltd компани руу 2 тэрбум шахам төгрөгийг шилжүүлсэн баримтыг бид хүргэсэн. Мэдээллийн араас МИАТ компани www.niigmiintoli.mn сайт нь илт худал, гүтгэлгийн чанартай

Uniline Pte.Ltd руу юуны учир хэдэн зуун саяар нь шилжүүлээд байна вэ, Ерөнхий сайд аа!!!

/

Төрийн өмчит МИАТ компани оны өмнөөс гэнэтхэн Сингапур дахь компаниар шатахуунаа цэнэглүүлдэг болж ердөө хагас жилийн дотор Uniline Pte.Ltd гээч компани руу 2 тэрбум шахам

Алдагдсан ам.доллар авлигалын мөнгө байсан юм биш байгаа

2 САЯ АМ.ДОЛЛАРЫН МӨРӨӨР-2

Нэгэн компанийн Худалдаа хөгжлийн банкин дахь данснаас 2 сая ам.доллар залилсан хэргийн талаар бид “2 сая ам.доллар гаргасан TDB иргэний үнэмлэхийг хэрхэн уншуулсан юм бол” гарчигтайгаар асуудал, хардлага, таамаг дэвшүүлсэн нийтлэл бичсэн. Нийтлэлийн мөрөөр уншигчдаас, зарим эх сурвалжаас өөр бусад мэдээлэл редакцид ирсээр байна.

Тэдгээрээс нэгэн эх сурвалжийн өгсөн мэдээлэл анхаарал татсан тул байж болзошгүй ТААМАГ2-ыг хүргэе.

Худалдаа хөгжлийн банкны харилцагч, Хятадын хөрөнгө оруулалттай компанийн захирал эмэгтэй өөрөө гэмт этгээдүүдийг дагуулан банк орж, улмаар данснаасаа 2 сая ам.доллар бэлнээр авч өгсөн байж болзошгүй. Учир нь бидний хардаж бичсэнчлэн эрэн сурвалжлагдаж буй залуустай хамт 50 орчим насны нэгэн эмэгтэй байсан гэх боловч Цагдаагийн байгууллагаас хайж буй мэдээлэлд эмэгтэйн талаарх мэдээлэл огт байхгүй байгаа. Тэгэхээр эмэгтэй гэмт этгээдийн хамтрагч гэхээс илүүтэй мөнгөө алдсан компанийн захирал байх магадлал нь илүү юм.

Хэрэв тийм бол анхнаасаа яагаад Худалдаа хөгжлийн банкнаас хэсэг бүлэг этгээдүүд хуурамч бичиг баримтаар их хэмжээний мөнгө аваад гарсан гэж мэдээлэх болов… Хятад компанийн захирал эмэгтэй өөрөө банкинд хандан мөнгө авсан бол банк биш компани бусдад залилуулсан байлтай. Банк эл хэрэгт ямар хамаатай байх билээ?!

Тухайлбал, УИХ-ын гишүүн асан, Кёкүшюзан Д.Батбаяр БНХАУ-ын “Евроази интернэшнл инвестмент групп”-ээс залилан мэхлэх замаар 32.7 тэрбум төгрөг авсан гэж хэвлэлүүд мэдээлдэг. Эл мөнгө банкуудаар дамжсан ч банкны нэр дурьдагддаггүй.

Нэр хүндэд нь халтай мэдээлэл цацагдвал харилцагчийн эрх ашгаас илүүтэй хохирлыг өөрсдөө амсч, олон зуугаар тоологдох харилцагчаа алдах тул банк ум хумгүй залруулга мэдээлэл хийх байлтай.

Гэтэл Худалдаа хөгжлийн банк өнөөдрийг хүртэл ганц ган хийгээгүй байгаа.

Энэ бичвэрт банкны асуудлыг түр хойш тавьж мөнгөө алдсан компанид анхаарлаа хандуулъя. Банк биш компани хохирсон байхад яагаад мөн чив чимээгүй байна вэ…

Тус компани нь барилгын бус уул уурхайн чиглэлээр үйл ажиллагаа явуулдаг байж магадгүй мэдээллийг эх сурвалжаас өгч байгаа. Тэд Эрдэнэс тавантолгой, Эрдэнэт үйлдвэрийн аль нэгтэй гэрээ хийхээр хөөцөлдөн, хүлээж байсан юм байх.

Аль нэгтэй нь гэрээ хийлгэж чадах эрх мэдэлтэнтэй уулзуулсан зуучлагч болон эрх мэдэлтэнд 2сая ам.долларын урамшуулал /ёндоо/ өгөхөөр амалсан гэх бөгөөд төлөвлөсөн уулзалтаа ч хийж чадсан гэгдэж байна. Уулзалтын зуучийг эрэн сурвалжлагдаж буй 4 этгээдийн нэг болох Б.Бямбадорж ахлан гүйцэтгэсэн төдийгүй итгэл төрүүлэхүйц эрх мэдэлтэнтэй уулзуулахаас гадна гэрээнд урьсан албаны хүний гарын үсэгтэй урилга ч үзүүлсэн байж болзошгүй гэнэ.

Улмаар Хятадын хөрөнгө оруулалттай компанийн итгэлийг бүрэн аваад эцэст нь ёндооны 2 сая ам.долларыг нь үүрээд алга болж орхиж. Мөнгөө өгсөн захирал эмэгтэй гэрээнд урьсан эрх мэдэлтнийг сураглахад өнөөх нь “Юун ёндооны мөнгө. Би аваагүй. Надад хамаагүй. Гэрээ хэлцэл ч бүтэхгүй болсон” гэсэн юм байх….

Ингээд л мөнгөө залилуулсан компани цагдаад мэдэгдэж, гэмт этгээдүүдийг эрэн хайж эхэлсэн гэх барим тавим мэдээллийг албан бус эх сурвалжаас өглөө.

Байж болох л хувилбаруудын нэг.

Гэхдээ дээр хардсанчлан банкны нэр яагаад холбогдсоор байгаа вэ. Банк яагаад харилцагчдынхаа санааг амраасан залруулга мэдээг өгөхгүй байна?!

Их хэмжээний мөнгөө алдсан компани хүртэл бухимдаж, орилолдохгүй байгаа нь сонин. Үнэхээр но-той, ноцтой, асар өндөр мөнгөн дүнтэй гэрээ хийхээр зорьсон болоод нууцалж байна уу…

Тэрчлэн энэ хувилбар үнэн бол ёндооны мөнгөө гаргаж өгөхөд хүргэсэн эрх мэдэлтэн мөнөөх 2 сая ам.доллараас огт хүртээгүйгээр алдсан нь үнэн үү?

Эсвэл мөн л бидний хардаж байгаачлан 2 сая ам.доллараас 50, 50 мянган ам.долларыг гэмт этгээдүүдэд өгөөд “ял наймаалцав” уу…

Аль ч таамаг, хувилбараар байсан энэхүү хэрэг эрэн сурвалжлагдаж буй гурван этгээдэд тохоод орхих жирийн нэг ЗАЛИЛАН биш юм.

2 сая ам.доллар гаргасан TDB иргэний үнэмлэхийг хэрхэн уншуулсан юм бол

/

Энэ сарын 25-ны өдөр /2021.05.25/ Худалдаа хөгжлийн банкны Шангрила салбараас гурван этгээд бүлэглэн, их хэмжээний буюу 2 сая ам.доллар залилсан гэх онц ноцтой гэмт хэрэг гарч, хэвлэлүүд түүнийг нь мэдээлсэн болоод өнгөрч байх шиг байна.

Гэтэл энэ ингэсгээд хаях мэдээлэл мөн үү.

Хэвлэл мэдээлэлд зориуд өгсөн мэт ижил үг, утга бүхий мэдээллүүд, түүнээсээ давсан сэжиг төрүүлэм ЭРЭН СУРВАЛЖИЛЖ буй цагдаагийн мэдээлэл гээд бүгд анхаарал татам…

Бүр хэн нэгнийг зориуд сэжиглэм…

Эх сурвалжаас өгсөн мэдээллээр бол Эрдэнэт үйлдвэрээс Монголын нэгэн эмэгтэй захиралтай барилгын компанитай гэрээ хийсэн байгаа юм. Улмаар гэрээний төлбөр тус компанийн Худалдаа хөгжлийн банкин дахь данс руу орж ирж. Харин ороод ирүүт нь гэмт этгээдүүд компанийн захирал, нярав нягтлангуудын буюу 1, 2-р гарын үсэгтнүүдийн дүрд тоглоод бэлнээр нь үүрээд гараад явчихсан юм байх.

Эл хэргийг Цагдаагийн байгууллагаас дээрэм бус залилангийн хэрэг хэмээгээд залилагчдыг эрэн хайж эхэлсэн.

Дээрэм бус залилангийн хэрэг болохоор компанийн эмэгтэй захирлын дүр бүтээн банк руу орсон эмэгтэй эрэн сурвалжлагдаж буй 3 залуугийн хамтрагч, хамсаатан, хамгийн гол хэрэгтэн болж таарна.

Тэгвэл яагаад ЭРЭН СУРВАЛЖЛАГДАЖ буй этгээдүүдийн дунд эмэгтэйн зураг, мэдээлэл байхгүй байгаа вэ.

Эмэгтэй үйлдэл дээрээ баригдсан юм болов уу… Тэгвэл мөнгө, хоёрдугаар гарын үсэгтэйгээ яагаад “баригдаагүй” гараад явчихав?!

Монголд 50 орчим насны эмэгтэй захиралтай, дээр нь Эрдэнэт үйлдвэртэй 2 сая болоод түүнээс дээш саяар тоологдох ам.долларын гэрээ хийж чадах барилгын компани хэд бий билээ.

Нэг нам дангаар эрх барьж, засаглаж буй үед ийм боломжийг эдэлж чадах компанийг хайхад тэгтэл түвэгтэй биш. Компанийг хайж, сурагласнаар асуулт эрсэн, хардлага дагуулж таамаглал дэвшүүлсэн нийтлэлээ эхэлж буйн учир нь ийм их хэмжээний мөнгөө банкны ажилтнуудын анзааргагүй, хяналт сулын алдаанаас болж алдчихаад тус компани яагаад уйлан дуугарахгүй, сандарч мэгдэхгүй байна вэ…

Яг үнэндээ мөнгө, гэмт этгээдүүдийн аль аль нь олдоогүй хэвээр байгаа биз дээ. Олдсон гэж хэвлэлүүд мэдээлээд байгаа. Олдсон юм бол яагаад Цагдаагийн газраас ЭРЭН СУРВАЛЖЛАГДАЖ буй этгээдүүдийн зураг дээр ОЛДСОН гэх улаан дардсаа дараад, мэдээллээ татахгүй байгаа юм… ?!

Эмэгтэй захирлын дүрд тоглосон эмэгтэйг эрэн сурвалжлаагүйн шалтгаан нь нэг бол гэмт хэргийн газраас холдож амжилгүй баригдсан, эсвэл компанийн захирал эмэгтэй өөрөө мөнгийг авсан. Харин мөнгийг өөрөө хүлээж авсны дараа алдсан бол энэ нь залилан биш дээрэм баймаар. Эсвэл эмэгтэй захирал өөрөө оролцож, хамтарсан гэмт хэрэг үү?!

Бидэнд олдсон мэдээллээр эмэгтэй захирал биш, түүний дүрд орж өөр эмэгтэй мөнгийг авсан гэж байгаа.

Хэрэв тийм бол асуудал бүр ноцтой юм. Гэмт хэрэгт банкныхан оролцсон уу гэх хардлага!!!

Нэгдүгээрт, ямарваа банкны салбараас их хэмжээний бэлэн мөнгө гаргадаг бил үү. Тэр дундаа 2 сая ам.доллар шүү дээ. Худалдаа хөгжлийн банкны Шангрила салбар нь вип үйлчлүүлэгчдэдээ зориулагдсан гэдэг ч энэ хэмжээний мөнгийг төв банкнаасаа л өгсөн байлтай.

Хоёрдугаарт, Эрдэнэт үйлдвэрээс барилгын компанийн данс руу гэрээний мөнгө орж ирснийг банк, компани хоёр л мэдэж байгаа. Их хэмжээний мөнгийг бэлнээр авахын тулд компаниас банк руу урьдчилан мэдэгдэх учиртай. Ингэхдээ компанийн захирлаас банк руу утастаад л хэлчих асуудал бас биш. Утастсан байлаа гэхэд банкинд бүртгэлтэй дугаараасаа ярьсан байх ёстой. Улмаар банкийг бэлэн мөнгө гаргуулахад бэлтгүүлэх, хэзээ очиж авахаа тохиролцох хэрэгтэй. Тэгэхээр эл хэрэгт ЭРЭН СУРВАЛЖЛАГДАЖ буй гурван залуу дээр компани болоод банкны ажилтнууд оролцоотой гэж шууд хардахаар байгаа юм.

Худалдаа хөгжлийн банк гадны хөрөнгө оруулагчтай, эзэмшигч нь монголчууд биш гэдэг. Тэр утгаараа бусад банкнаас илүү гадна дотнын давхар давхар хяналттай байдаг гэх. Банк ч өөрсдийгөө ISO стандарттай, аюулгүй байдалдаа чухам айхтар анхаардаг хэмээн рекламддаг.  

Гэтэл яагаад гэмт хэрэгтнүүдэд ийм их хэмжээний мөнгийг тэврүүлээд гаргачихав!!!

Компанийн гэрээ, гэрчилгээ, дүрэм, тамгыг хуурамчаар үйлдсэн байлаа гэхэд Иргэний үнэмлэхийг хуурамчаар үйлдэх боломжтой юу. Асар өндөр нууцлалтай гэдэг Иргэний үнэмлэхийг чинь гурав дөрөвхөн гэмт этгээд дууриагаад хийчихлээ гэж үү?!

Эсвэл банк Иргэний үнэмлэхийг уншуулаагүй юу… Уншуулаагүй бол ЯАГААД?!

Камерийн систем, мөнгө авч буй иргэний мэдээллийг гаргах биометр мэдээллийн системүүд чинь яагаад ажилласангүй вэ. Гудамжинд төөрөөд алга болчихсон хүүхэд, хөгшдийг хамгийн сүүлд тэнд, энд явж байсан гээд хөөгөөд гаргаад ирдэг гудамж талбайн нөгөө айхтар камер, системүүд чинь хаачив!!!

Тэр байтугай сонгуулийн сурталчилгаа эхэлсэн өдрөөс эхлээд хэний ч бай дансаар дамжсан 20 сая төгрөгөөс дээш дүнтэй гүйлгээг Цагдаа, Тагнуулынхан давхар шалгадаггүй билүү…

Эрдэнэт, барилгын компани хоёр өндөр дүнтэй гэрээ хийснийг, тэр гэрээний мөнгө нь тухайн компанийн данс руу орж ирснийг, түүнийг хэрхэн зальдаж, банкны хяналт шалгалтыг яажшуухан давахыг бүгдийг мэдэж, хийж чадсан нөхөд Хил гааль байтугай хөдөө орон нутгийн постууд хаалттай шахам, хараа хяналт өндөр энэ үед 2 сая ам.доллар үүрээд гүйлдэхээр тэнэг гэж үү…

Гэмт этгээдүүд бүгд өмнө нь банк санхүүгийн байгууллагыг залилан мэхэлж, ял хүртэл эдэлж байсан нөхөд гэж байгаа. Нас дөнгөж 30 гарч байгаа тэд өмнө нь энэ төрлийн гэмт хэргээр ял эдэлж байсан гэвэл арван найм, ес, ихдээ л 20 нас даваад, даваад банкуудыг “дээрэмдэж” байж…

За яахав, эл мэдээлэл нь үнэн байг. Нэгэнт ял сонсож, эдэлж байсан нөхөд дахиад 5, 5 жил аваа л биз… Тэгвэл цар тахлын хөл хорионы үед Монголын хил байтугай орон нутгийн пост давж чадахгүй баригдах тэдэнд хэн нэгэн 2 сая ам.доллараас нь 50, 50 мянган ам.доллар амалсан байж бас болох уу.

Эдэлвэл хэдхэн жил, эдэлж байх хугацаандаа дуулгавартай сайн хоригдсон гээд дахиад тал, талыг нь хасуулаад ганцхан жилийн дараа л гараад ирнэ. Ганц жилийнхээ талыг шалгагдаж, таслуулах гэж саатуулах байр хооронд зөөгдөж байгаад барчихна.

Тэгвэл яг энэ цаг үед хэнд мөнгө хэрэгтэй болсон байхав?!…

Төрийн өмчит Эрдэнэт үйлдвэр, тийм их мөнгөө алдсан барилгын компани, хамар дороосоо 2 сая ам.доллар шуудайлалцаад өгөөд явуулчихсан банк уйлалдан орилолдохгүй, нам гүмхэн хүлээцтэй суугаа нь ямар учиртай вэ…

Ийм их мөнгийг нь хуурамч бичиг баримт, асар өндөр нууцлалтай байх ёстой Иргэний үнэмлэхний мөн бишийг ялгалгүй өгөөд явуулчихсан банкинд барилгын компанийн зүгээс яагаад УУРЛАХГҮЙ, ГОМДОХГҮЙ, ОЛООД ИР ЧИ гээд зүхэхгүй байгаа юм бол…

Бүгд нэг л сэжигтэй. Тээр жил ноолуурын ченжүүд нэгийгээ хөнөөж мөнгийг нь авчихаад, бидэн рүү зэвсэгт дээрэмчид халдлаа хэмээн улс орон даяар бужигнуулсныг олон түмнээрээ мартаагүй байх учиртай. Ам нүд, гар хөлгүй скочдуулан эзгүй хээрт, шинийн 2-ны хавирган сар ёлтойсгээд алга болчихдог түнэр харанхуйн дунд хаягдсан ченжийг шөнө дундын хэрд малаа хайж явсан малчин олж амийг нь авардаг. Азгүй ченжүүд хэргийг зохиохдоо хэрэг үйлдсэн шөнөө сартай байх, саргүй байх эсэхийг тооцоолоогүйдээ алдаж, баригдсан…

Яг үүнтэй адил, асар өндөр нууцлалтай гэгддэг Иргэний үнэмлэхийг банк хэрхэн уншуулж, гэмт этгээдүүдэд итгэсэн байх вэ гэдэг сонирхолтой.

Тэгээд сонгуулийн сурталчилгаат эл өдрүүдэд 20 саяас дээш дүнтэй гүйлгээ бүрийг хянах ёстой Цагдаа, Тагнуулынхан мэдээллээс хол хаачсан байх вэ… Цайндаа орох гээд, хуушуур бууз эргүүлж явсан гэх тайлбар лав бэлдээгүй байх?!

Тэгэхээр эл хэрэг гэмт этгээдүүд баривчлагдлаа гээд орхигдох байдаг л нэг ЗАЛИЛАН биш санагдана.

“Сахал” Д.Эрдэнэбилэгээр хулгайлсан мөнгийг төлүүлсэн ч, хулгайчийг сул тавьжээ

/

Авлигатай тэмцэх газрын Мөрдөн шалгах хэлтсээс авлигын гэмт хэргийг мөрдөн шалгах ажиллагааны үр дүнд нийт 123.5 тэрбум төгрөгийг буцаан төлүүлснээ албаны цахим хуудсаараа мэдээлжээ.

Мэдээлэлд “Монгол-Оросын хамтарсан “Эрдэнэт үйлдвэр” ХХК болон “Монголросцветмет” ХХК-ийн ОХУ-ын эзэмшиж байсан 49 хувийн энгийн хувьцааг улс төрд нөлөө бүхий этгээдүүд албан үүрэг, бүрэн эрхээ урвуулан ашиглаж, Худалдаа хөгжлийн банкны хяналтад үйл ажиллагаа явуулдаг “Монголиан коппер корпорейшн” ХХК-д 400.2 сая ам.доллараар худалдах хууль бус шийдвэрийг гаргаж бусдад давуу байдал олгосон гэх эрүүгийн хэрэгт Авлигатай тэмцэх газар, ЦЕГ-ын Эрүүгийн цагдаагийн албаны Эдийн засгийн гэмт хэрэгтэй тэмцэх газрын хамтарсан ажлын хэсэг мөрдөн шалгах ажиллагаа явуулсан билээ.

Мөрдөн шалгах ажиллагааны явцад Монголбанкнаас 2016 оны 4 дүгээр сарын 6-ны өдөр Дотоод актив чанаргүйдэх эрсдлийг бууруулах арга хэмжээний хүрээнд байгуулсан “Өрийн бичиг шилжүүлэх гэрээ”-ний дагуу шилжүүлсэн 100 тэрбум төгрөгийн санхүүжилтийн эх үүсвэрийг “Кью Эс Си” ХХК зориулалтын бусаар зарцуулсан болох нь тогтоогдсон юм.

Мөрдөгчдийн ажлын хэсгээс гэмт хэрэг гарахад нөлөөлсөн шалтгаан, нөхцөлийг арилгах тухай 2018 оны 6 дугаар сарын 19-ний өдрийн 10 дугаартай мөрдөгчийн мэдэгдлийг Монголбанканд хүргүүлж, санжүүжилтийг зориулалтын бусаар зарцуулсан “Өрийн бичиг шилжүүлэх гэрээ”-нээс нэг талын санаачилгаар татгалзах эрхээ хэрэгжүүлэн, төрд учруулсан 100 тэрбум төгрөгийн хохирлыг барагдуулахыг шаардсан байна.

Мөрдөгчийн мэдэгдэл, шаардлагын дагуу Монголбанкны талаас гэрээг цуцалж “Кью Эс Си” ХХК-иас үндсэн болон хүүгийн төлбөрийг төлүүлэх замаар төрд учирсан хохирлыг нөхөн төлүүлэх ажиллагааг явуулж эхэлсэн. Төрийн байгууллагуудын хамтын ажиллагааны үр дүнд тус компани 2021 оны 5 дугаар сарын 6-ны өдөр сүүлийн төлбөр болох 61.8 тэрбум төгрөгийг шилжүүлснээр нийт 123.5 тэрбум төгрөгийн хохирол бүрэн төлөгдлөө” гэжээ.

Нэхэн сануулахад, “Эрдэнэт үйлдвэр” ХХК-ийн 49 хувийн хувьцаа худалдан авахад зарцуулсан 400.270.000 долларын эх үүсвэрийг дараахь байдлаар босгосон байдаг.

  • Сангийн яамны виксел /2016.02.25/ 183.6 тэрбум төгрөг “Кью Эс Си” ХХК
  • Монголбанкны өрийн бичиг /2014.11.28/ 100 тэрбум төгрөг “Кью Эс Си” ХХК-д
  • Монголбанкны өрийн бичиг /2016.04.06/ 100 тэрбум төгрөг “Кью Эс Си” ХХК-д
  • Хөгжлийн банкны зээл /2014.12.01/ 71.3 сая ам.доллар “Кью Эс Си” ХХК
  • Хөгжлийн банкны зээл /2015/ 51.3 сая ам.доллар “Кью Эс Си” ХХК-д

“Кью Эс Си” ХХК нь Дарханы төмөрлөгийн үйлдвэртэй холбоотой бөгөөд захирлаар Э.Шижир, ТУЗ-ийн дарга нь сахал хочит Д.Эрдэнэбилэг.

Улмаар “Кью Эс Си” ХХК-иас Д.Эрдэнэбилэгийн үеэл дүүгийн “Хээдвей трейднг”, “Пик девелопмент” компаниудаар дамжуулан “Монголын зэс корпораци”-ийн захирал Ц.Пүрэвтүвшингийн дансанд 2016.04.21-нд 56.5 сая ам.доллар, 2016.06.20-нд 62.9 сая ам.доллар тус тус шилжсэн байдаг.

Ийнхүү Авлигатай тэмцэх газар, ЦЕГ-ын Эрүүгийн цагдаагийн албаны Эдийн засгийн гэмт хэрэгтэй тэмцэх газрын хамтарсан ажлын хэсгээс Д.Эрдэнэбилэгийг “Кью Эс Си” компаниараа дамжуулан хулгай хийснийг тогтоон, хулгайлсан 123.5 тэрбум төгрөгийг бүрэн төлүүллээ.

Харин хулгайч нь яагаад хариуцлага хүлээхгүй, сул чөлөөтэй явааг эрх баригчдаас, тэр дундаа Баялгийн эзэн болно хэмээгээд гарч давхисан У.Хүрэлсүхээс асуух хэрэгтэй болох нь.

Захиалагчийг нотолж чадаагүй гэдэг нь Э.Бат-Үүл ч хэлмэгдсэн гэсэн утга биш үү!!!

/

-ГЭТЭЛ БААТАР ЮУНД УУРЛАВ-

Тэрбээр яаран, сандран мэдээлэл биш мэдэгдэл хийлээ. Ийм мэдэгдлийг тэр хэд хэд хийж байв. Гэхдээ энэ удаад Ц.Нямдоржийг С.Зориг агсны амь насаа алдсан хэргийн холбогдогч, захиалагч хэмээн хардаж байгаагаа улс орон даяар зарлаад, араас нь хараалын үг хайр найргүй чулуудлаа.

Саалийн ганц үнээтэй өвгөн шиг Засгийн газрын Хэрэг эрхлэх газрын дарга Ц.Нямдоржийн ганц сэдэв нь С.Зоригийг хөнөөсөн хэрэг мөн. Тэрбээр гурван шатны шүүхээс ял сонссон Б.Содномдаржаа, Т.Чимгээ нарыг хилс хэрэг үүрсэн гэдэгт бат итгэж явдаг нэгэн.

Тиймдээ ч эрүүдэн шүүж, хэрэг тулгасан хэмээн ТЕГ-ын дарга асан Б.Хурц тэргүүтэй хүмүүсийг буруутган, эцэст нь холбогдох нөхдөд шүүхээс ял оноосноор Т.Чимгээ, Б.Содномдаржаа нарын асуудлыг дахин шүүхийн байгууллагаар авч хэлэлцэх боломжийг эрх зүйн хувьд нээлгээд байгаа.

Энэ байр сууриа шинэ Засгийн газрын 100 хоногийн тайлангийн үеэр “2016 оны гуравдугаар сараас хойш С.Зоригийн хэрэгт хэлмэгдсэн хүмүүсийн араас хөөцөлдөж байна. Би баян тарган, эрх мэдэлтэй хүний араас хөөцөлдөөгүй. Монголд шударга ёс, хууль гэж байдгийг үзэх гэж зургаан жил болж байна. Миний зүгээс хүмүүс хэлмэгдсэнийг мэдэж байгаа учраас хэргийн захиалагч нарыг хууль хяналтын байгууллагаас зарлахыг шаардсан.

2017.11 сард ажил авсан өдрийнхөө орой цагдаа нарыг цуглуулж энэ хоёр хүнийг яллаж байгаа бол захиалагчийг зарла гэсэн. Гэвч хэн ч зарлаагүй.

2016 онд С.Зоригийн хэргийг мөрдөж, шалгасан хүмүүс захиалагчийг тогтоож чадаагүй байж, захиалгаар хүн алсан гээд Б.Содномдаржаа, Т.Чимгээ нарт ял оноосон. 2016.09.02-нд Ц.Амгаланбаатарын мэдүүлгээр энэ хэргийн захиалагчаар Э.Бат-Үүлийг татсан. “Нотлогдож байгаа тул” гэдэг үгтэйгээр татсан боловч 20 хоногийн дараа 2016.09.21-нд нотлогдоогүй тул гээд хүчингүй болгосон. Түүний хамжигчаар Б.Булганыг татаж арван сар хорьсон ч тогтоож чадалгүй сулласан. Хамтрагчаар А.Ганхуяг гэж хүнийг мөн 8 сар хорьсон.

Ц.Амгаланбаатар 2014 оноос хойш Э.Бат-Үүлийн талаар ярьсан байдаг. Гэвч Э.Бат-Үүлээс байцаалт авах ёстой байтал ямар ч байцаалт аваагүй. Үнэхээр захиалагч юм бол яагаад байцаалт авахгүй байгаа юм. Иймээс энэ хэрэгт хүн хэлмэгдсэн гэж тууштай үзэж байна. Ямар ч эргэлзээ байхгүй” хэмээн бататган хэлсэн.

Гэтэл Э.Бат-Үүл огло үсрэв. 

Ц.Нямдоржийн үгийг хичнээн нягталж, ухсан ч улсын баатар Э.Бат-Үүлийг хэргийн захиалагч гэж зарлаагүй төдийгүй харин ч эсрэгээрээ захиалагч гэгдэн хэлмэгдээд яваад байгааг хэлсэн байх юм.

Товчхондоо “Ц.Амгаланбаатарын мэдүүлгээр Э.Бат-Үүл захиалагч гэгдээд удлаа. Үнэхээр захиалагч мөн нь нотлогдсон юм бол зарла. Зарлаж чадахгүй байгаа бол захиалагч гэдгийг нотолж чадаагүй гэсэн үг. Нотолж чадаагүй нь энэ хэрэгт хүмүүс хэлмэгдсэн гэдгийг л харуулж байгаа” гэх ойлголт явж байна…  

Гэтэл юун гуя гэдэг шиг баатар Э.Бат-Үүл мэдэгдэл хийж, хараал зүхэл тавин Ц.Нямдоржийг захиалагч хэмээн чичлэх нь ойлгомжгүй явдал боллоо.

Түүний хувьд “Ц.Нямдоржийн хэлдэг үнэн. Хэрэв би энэ хэргийн захиалагч юм бол хэдийнэ баривчлагдаад явах байсан. Та бүхний өмнө ингээд мэдэгдэл хийгээд зогсож байхгүй. Сонгууль бүрийн өмнө надтай энэ хэргийг холбодог. Монгол Улс хуультай бас шүүхтэй биз дээ” гээд тайвнаар хэлчихэд л хангалттай байв.

Тэр байтугай энэ олон жилийн хугацаанд хүн амины онц ноцтой хэрэгт гүтгэсээр ирсэн Ц.Амгаланбаатарыг шүүхэд өгч байна гэчихсэн бол сүртэй, даацтай байх байсан юм биш үү. Ер нь ч яагаад эрхэм баатар ийм олон жил Ц.Амгаланбаатарт хүн гүтгэсэн хэргээр гомдол гаргаж байгаагүй юм бол… Ийм ууртай, омогтой хүний хамгийн түрүүнд хийх, хийлгэх ёстой ажил байлтай.

Монголын цагдаа, хууль шүүхийн байгууллага нь захиалагчийг нотолж чадаагүй гэж хэлсэн нь хүн цочим мэдэгдэл гэж үү.

Uniline Pte.Ltd руу юуны учир хэдэн зуун саяар нь шилжүүлээд байна вэ, Ерөнхий сайд аа!!!

/

Төрийн өмчит МИАТ компани оны өмнөөс гэнэтхэн Сингапур дахь компаниар шатахуунаа цэнэглүүлдэг болж ердөө хагас жилийн дотор Uniline Pte.Ltd гээч компани руу 2 тэрбум шахам төгрөг шилжүүлсэн баримтыг бид өмнө хүргэсэн.

Гэтэл МИАТ компаниас www.niigmiintoli.mn сайт нь илт худал, гүтгэлгийн чанартай мэдээлэл түгээсэн тул залруулга хий хэмээн омогдон мэдэгдэж байсан ч Uniline Pte.Ltd компанитай 2018.4.1-ний өдрөөс хойш хамтран ажиллаж байгаа гэдгээ өөрсдөө баталсан байдаг.

Гэвч 2018.4.1-ний ажлын бус амралтын НЯМ гариг, инээдмийн баярын өдрөөр гэрээгээ байгуулан ажиллаж эхэлсэн гэх ч хамтын ажиллагааг нь нотлох ШИЛЭН ДАНС-ны мэдээлэл одоо хүртэл хаалттай хэвээр…

Сингапур руу нислэггүй байгаа энэ үед тэндээс хэрхэн шатахуун зөөдөг, Uniline Pte.Ltd компани нь яг ямар үйл ажиллагаа явуулдаг, МИАТ компанитай хэдий үеэс хэрхэн, ямар байдлаар хамтарч ажиллах гэрээ байгуулсан, өнөөдрийг хүртэл хэд хичнээн төгрөг шилжүүлж авсан, тэрчлэн МИАТ компанитай хамтран ажилладаг гэх гадны байгууллагуудын бүртгэл, санхүүд эрэн сурвалжлага хийлгэж монголоос урсдаг мөнгөн дүнгүүдийг тодорхой болгох зэрэг манайхны дотооддоо нууцлаад байгаа мэдээллийг гадны хамтрагчдаас нь ил болгохыг зорьсон бидний ажил эхнээсээ үр дүнд хүрч тус “оффшор” компаниас мөнгө нэхэмжилсэн имэйл хаягууд задарсныг Сингапур дахь Олон улсын эрэн сурвалжлах сэтгүүлчдийн багаас бидэнд ирүүллээ.

Uniline Pte.Ltd болон МИАТ компанийн хамтын ажиллагааг нотлох ШИЛЭН ДАНС-ны мэдээлэл хаалттай байгаа атал тус компанийн төлөөлөгч Лилиан Лим гэгч нөхрөөс их хэмжээний ам.доллар нэхэмжилсэн нэхэмжлэлүүд тасардаггүй аж.

No description available.

“Дайны эрсдлийн даатгалын сан”-гийн хэргийг санагдуулам мөнгө урссаар хагас жилийн дотор 2 тэрбум шахсан гэдэг анхаарлын гадна үлдээх асуудал биш.

Цар тахлын хүнд үед дотоод гадаадын бүх нислэг зогсч алдагдал хүлээгээд байгаа төрийн өмчит авиа компанийн данснаас ийнхүү ичгүүр сонжуургүйгээр мөнгө гаргаж буйг Засгийн газрын Хэрэг эрхлэх газар мэдэхгүй байна гэж үгүй. Тэр тусмаа шинэ он гаруут 1 тэрбум гаруй төгрөгийг зөвхөн энэ компани руу шилжүүлсэн байхад эрхэм сайд Л.Оюун-Эрдэнэ мэдээгүй байна гэдэг бүр үлгэр юм…

Ямартаа ч Олон улсын эрэн сурвалжлах сэтгүүлчдийн багтай хамтарсан бидний ажил нэг алхмаар урагшилж учир битүүлэг Uniline Pte.Ltd компаниас Монгол руу, тэр дундаа МИАТ компанийг төлөөлсөн нөхөдтэй тогтмол харьцдаг, асуудлаа хэлэлцдэг цахим шуудан болон зарим нэг монгол иргэний утасны дугаар ч ил болж байна.

Цахим шуудангаар хэлэлцсэн, нэхэмжилсэн зарим мэдээллийг нотлох ажиллагааг Олон улсын эрэн сурвалжлах сэтгүүлчдийн багийн зүгээс хийж, Сингапурт, газар дээр нь ажиллаж байна.

Сэдэвтэй холбогдох өмнөх мэдээллийн линкүүд:

http://niigmiintoli.mn/?p=8043

http://niigmiintoli.mn/?p=8105

http://niigmiintoli.mn/?p=8331

http://niigmiintoli.mn/?p=8608

Ж.Болд дарга гомдсон бол Дамбын эцэст “дуудмааргүй” л юм

Орхон аймгийн цагдаагийн газрын ажилтнууд өнгөрөгч намар амарч зугаалж яваад 27-хон настай алба хаагч учир битүүлэг байдлаар амиа алдсан. Цагдаагийн албан хаагчдын нийт бие бүрэлдэхүүнийг хамруулдаг эрүүл мэндийн үзлэг төдийгүй нэр хүнд бүхий хувийн томоохон эмнэлэгт сайн дураар өгсөн нарийвчилсан шинжилгээгээр эрүүл гэж гарч байсан залуу “элэг, нойр булчирхайн хавсарсан архаг үрэвсэлтэй байсан бөгөөд цус харвалтын улмаас нас барсан” гэх онош тавигдсан байдаг.

Эл онош, задлан шинжилгээний хариуг үгүйсгэн зөвшөөрөөгүй ар гэрийн гомдлоор шүүх шинжилгээний бүрэлдэхүүнтэй үзлэг дахин хийгдсэн агаад энэ үзлэгээр толгойд мохоо, метал зүйлээр үүсгэгдэх гэмтэлтэй гэж гарсан.

Харамсалтай нь эл хэрэг цус харвалт гэх анхны оношоороо хаагдахдаа тулж байгаад хүүгийн ар гэр гомдолтой төдийгүй “хүн амины хэрэг” биш байгаа гэх хардлага төрүүлэх олон сэжигтэй зүйл бий талаар бид өмнөх дугаартаа нийтэлсэн билээ.

Үнэхээр ч нас барсан цаг минут, дуудлага өгсөн гэх цаг хугацаа, ар гэрт буюу аав ээжид нь хэл дуулгаагүй зэрэг шалтгаанаас /2020.09.19-20нд шилжих шөнө тус амралтын газарт тог тасран, улмаар үүрэн телефоны бүх операторын сүлжээ тасалдсан гэж гэрчүүд хэлдэг/ эхлээд эргэлзээтэй зүйл дэндүү их.

Бид өмнөх нийтлэлийг бичсэнээс хойших хугацаанд Сэлэнгэ аймгийн Баруунбүрэн суман дахь Амарбаясгалант хийдийн ойролцоо тухайн цаг минутад эрчим хүч үнэхээр тасалдсан уу, оператор компаниудын сүлжээ доголдсон эсэх зэрэг мэдээллийг тодруулаад байгаа.

Бидэнд олдсон мэдээллээр Амарбаясгалант хийд орчимд 2020.09.19-ний оройн 21:11 минутаас 2020.09.20-ны 01:24 минут хүртэл буюу нийт 4 цаг орчим тог тасарч, үүний улмаас оператор компаниудын сүлжээ тасалдсан байгаа юм. Тог тасрах үед үүрэн телефоны операторуудын өөрсдийн эрчим хүчний нөөцөөс шалтгаалан 10-20 минутын наана цаанатай тасарсан ч сүлжээ эргээд хэвийн болохдоо бүгд нэгэн зэрэг ажиллаж эхэлсэн байна. Өөрөөр хэлбэл бүх утасны сүлжээ 2020.09.20-ны 01:24:23 секундэд хэвийн болсон гэсэн үг.

No description available.

Гэтэл ар гэрийнхнийг цаг тухайд нь дуудаагүй шалтгаанаа хамт байсан нөхөд эхэндээ олон янзаар тайлбарласан байдаг. Тухайлбал, “Цагдаад дуудлага өгөөд байж байтал сүлжээ тасарчихсан” гэх нэг тайлбар бий. Цагдаад дуудлага өгөөд л сүлжээ тасарсан юм бол хүү 19-ний оройн 21:11 минутаас өмнө буюу байгалийн гэгээ тасарчихаагүй байхад амиа алдсан болж таарна.

Харин дуудлага өгсөн гэх офицер нь шөнийн 00:57 минутын үед Цагдаагийн байгууллага руу залгасан гэж ар гэрт нь хэлсэн байдаг. Хэрэв энэ цаг минутаар тооцвол энэ үед үүрэн телефоны бүх сүлжээ тасалдаж хэнийх нь ч утас гадагш дотогш дуудлага хийх боломжгүй байсан гэсэн үг.

Тэгэхээр хүүгийн амиа алдсан цаг, ар гэрт нь тэр даруйд хэл өгөөгүй шалтгаан, эрчим хүч, сүлжээ тасалдсан цаг хормуудаас эхлээд энэ хэрэг сэжигтэй, хүн амины хэрэг биш байгаа гэж хардах хардлагыг төрүүлээд байгаа.

Нөгөөтэйгүүр хэргийн талаар хэвлэл мэдээллийн хэрэгсэлд дурьдмагц тэвдэн сандардаг хэн нэгэн бас бий юм биш үү гэх хардах өнцгийг бид өмнөх нийтлэлдээ дурьдсан.

Энэ мэтчилэн эрүүл мэндийн шалтгаанаар гэхэд хэтэрхий өрөөсгөл, ар гэрийнх нь гомдол тайлагдаагүй нэгэн хэргийн талаар манай сайт бичиж, сурвалжилж, судалж байна.

Гэтэл зариг.мн сайтыг тус хэрэгтэй холбоотой мэдээ мэдээлэл тавихад мэдээллийн дорх сэтгэгдэл хэсэгт уйлан дуугарсан, элдвээр хэлсэн сэжиг бүхий сэтгэгдлүүд урссан байсантай адил манай сайтын нийтлэл бас хэн нэгнийг гомдоочихсон юм байх.

Гомдсон нөхөр цагдаад өргөдөл гаргасан бололтой. Талийгаач хүүгийн ар гэр сэтгүүлч бидэнтэй байнга холбоотой байгаа тул тэд бол биш. Тэгэхээр Орхоны цагдаагийн газраас “гомдсон” болов уу гэх таамаглалыг дэвшүүлж байна.

Харин гомдлын мөрөөр шалгах гэж дуудсан Цагдаагийн байгууллага нь ихээхэн сэжиг төрүүлснийг нуух юун.

Албаны биш, ямар нэг бүртгэлгүй хувийн дугаараас амралтын өдрөөр редакци руу биш сэтгүүлч рүү утастаад заавал ир гэж шахалт үзүүлэв. Нөгөө сэтгүүлч нь дуудсан хэрэгтэй нь холбоотой эсэхийг мэдэхгүй байж шүү дээ.

Ингэхдээ учир битүүлэг, бүртгэлгүй, хувийн дугаараас залгачихаад ямар асуудал, гомдол, хэргээр дуудаж байгаагаа хэлэхгүй нууцалж, автобусанд суугаад заавал ир, ирээд мэд хэмээн шаардах нь зүйд нийцэх үү, Ж.Болд дарга аа!!!

Техник технологи хурдтай хөгжиж, даяарчлагдахын хэрээр эрэн сурвалжлах чиглэлээр дагнан ажилладаг мэргэжлийн редакциуд Олон улсын эрэн сурвалжлах сэтгүүлчдийн холбоотойгоо хамтран ажиллаж, залгаж буй дугаарын алба амины гэдгийг дуудлага нь тасраагүй байхад л олоод мэдчих чадвартай болсон юм шүү дээ.

Хүн алаад, хүрээ тоночихсон биш. Яасан давчуу, ямар сүрхий дуудлага вэ… Цагдаагийн байгууллагын нэр хүндтэй холбоотой хэрэгт ийм түргэн шуурхай, ажил амралтын өдрөө ялгалгүй ажилладаг хэрэг үү.

Цар тахлын хатуу хөл хорионы үеэр байгууллага нь тодорхойлоогүй бол хэнийг ч гадуур гаргахгүй, ганц алхуулахгүй шалгаж байгааг бүгд мэднэ. Хатуу хөл хорионы дэглэм, журмын дагуу манай сайт ч нийт ажилтныхаа 10-15 хувийг л ажиллуулж байгаа.

Гэтэл хувийн, бүртгэлгүй дугаараас залгачихаад Дамбын эцэст дэх Цагдаагийн хэлтэст автобусанд чихэлдээд заавал ир гэж амралтын өдрөөр дуудсан дуудлагыг ойлгоход бэрх. Дуудлага хийсэн дугаар нь учир битүүлэг дугаар байсан тул утасны цаадах нөхрийн ам хэлийг сугалах шахам хоргоож байж дээрх хэрэгтэй холбоотой асуудлаар тайлбар авах гэж байгааг олж мэдэв.

Бүхэл бүтэн нэг халуун амь тасарч, ар гэр нь гомдолтой байхад тэр талаар бичсэн хэвлэл мэдээллийн байгууллагыг буруутгах гээд явж байдаг хөгийн ч явдал бол?!

Тэгээд ч нийтлэлийг www.niigmiintoli.mn гэх албан ёсны редакцитай, хаяг, бүртгэлтэй хэвлэл мэдээллийн хэрэгсэлд нийтэлсэн байхад хувь сэтгүүлчийн гэрийн дугаар руу залган дуудсан нь ямар учиртай вэ. Яагаад байгууллагыг, байгууллагын нь редакторыг, тэгэхдээ ажлын цагаар дуудсангүй вэ…

Амралтын өдрөөр, тэр дундаа цар тахлын хатуу хөл хорионы дэглэм журам дундуур ямар учир шалтгааны улмаас гэдгээ хэлэхгүй байж заавал ирэхийг шаардсан утасны дугаар үнэхээр цагдаагийн байгууллагын утас мөн эсэх тодорхойгүй, бүртгэлгүй бөгөөд эл дугаараар үнэгүй.мн сайтад “Сэйф зарна” гэх ганц зар өгсөн байсан нь сэжигтэй байв.

Редакцид гомдсон гомдлыг редакцид нь ирүүлэхгүй, мөн редакцийн хаяг байршлаар харьяалагдах цагдаагийн байгууллагад нь өгөлгүй хаа хамааралгүй Дамбын эцэс дэх Цагдаагийн хэлтэс дээр дуудсан дуудлагын үнэн мөнд итгэж ядан удаан хоргоосны эцэст дээрх хэрэгт гомдсон хэн нэгний гомдлоор дуудаж байгаа гэх ганц өгүүлбэр олж сонссон.

Бид өмнөх нийтлэлээ Цагдаагийн ерөнхий газрын дарга, дотоодын цэргийн командлагч цагдаагийн хурандаа Ж.Болдод хаяглаж бичсэн. Гэхдээ Ж.Болд дарга гомдол гаргасан бол арай ч Дамбын эцэс дэх хэлтэс дээр дуудмааргүй л юм.  

Цагдаа нар “хүн амины” хэргийг дарсан юм биш байгаа, Ж.Болд хурандаа!!!

-Хөтөлийн цагдааг дуудаж болсон утас талийгаачийн ар гэрийг дуудах болоход яагаад сүлжээгүй болсон бэ-

Одоогоос 7 сарын өмнө буюу өнгөрөгч намар /2020 оны есдүгээр сарын 19-20нд шилжих шөнө/ Сэлэнгэ аймгийн Баруунбүрэн суман дахь Амарбаясгалант хийдийн ойролцоох жуулчны баазад амарч явсан 27-хон настай, гэр бүл ч зохиож амжаагүй байсан цэл залуухан хүү учир битүүлгээр нас барсан.

Тэрбээр Орхон аймгийн Цагдаагийн газарт ажиллаж байсан бөгөөд тухайн үед аймгийн цагдаагийн газрын 25 албан хаагч тус амралтын газарт амарч зугаалахаар очсон байдаг.

Зугаалга, парти-ны шалтгаан нь тэтгэвэртээ гарч буй 3 нөхрийн албанаас чөлөөлөгдөж буйд зориулсан “хамт олны үдэлт” хийх.

Уг нь зугаалгад Цагдаагийн газрын залуу албан хаагчид төдийлөн оролцоогүй бөгөөд талийгаач Б ч “мөнгө байхгүй” хэмээн явахаас цааргалахад н.Саранцэцэг гэх офицер эмэгтэй “би мөнгийг чинь даана, яв” гэж авч явсан байдаг.

Ингээд амралтын газарт очсон “ахмадууд” архидан талийгаач Б-г “шувууны бага жиргэдэг” гээд сөн түшүүлсэн байгаа юм. Улмаар идэж уухын зуурт өөрсдийгөө хөгжөөн гар барилдаан зохиоход хүү бүгдийг ялж байсан бөгөөд үүнд нь эгдүүцсэн н.Билэгсайхан гэх нөхөр 4-5 удаа хүүтэй гар барилдаан хийсэн ч бүх тохиолдолд дахин ялагдаж, үүндээ нэлээдгүй бухимдсан гэдгийг хамт явсан нөхдөөс хэрэг гарсны дараахан ар гэрийнхэнд нь хэлсэн байдаг ч сүүлд хэргийг мөрдөн шалгах явцад энэ үйлдлийн талаар дахин ам нээх хүн олдолгүй бүгд “бүлх” залгичихсан.

Үүнээс цааш төдий удалгүй бүрэнхий болж, бүрэнхий болохтой зэрэгцэн амралтын газар даяар тог тасарчихсан нь тохиолдол гэхэд хэтэрхий сэжигтэй.

Тог тасарсны дараахан мобиком, юнител, скайтел, жи-мобайл гээд бүх оператор компанийн сүлжээ “доголдсон” /хэргийн газарт байсан нөхөд ар гэрийнхэнд нь ингэж хэлсэн байдаг/ нь анхаарахгүй орхих хэрэг биш.

Түүнчлэн тог тасарсны дараахь үйл явдал дээр гэрт байсан нөхдийн яриа тухайн үедээ зөрөлдөж байсан нь хүүгийн үхэл “аллага” байсан байж болзошгүйг илэрхийлэх бас нэг өнцөг.

Тог тасарч гэрт харанхуй болсон тул “ахмадууд” гар утасны гэрэлд архидалтаа үргэлжлүүлж, хүү сөн түшилтээ үргэлжлүүлэн явж байгаад гэнэт уначихсан гэх яриа сүүлд “хүү нэг орны толгойн хавьд сууж байгаад хажуугийн ор руу шилжин суухдаа уначихсан” гэх өөр яриагаар солигдчихсон.

Ингэж унасан хүү дахин босч ирсэнгүй…

Эндээс эхлээд хэвийн ажиллаж байсан оператор компаниудын сүлжээ тасалдан ар гэрийнхэнд нь хэл дуулгаж чадалгүй өглөө болгочихсон гэх атлаа хэргийн газарт Хөтөлийн цагдаа ирээд явчихсан байгаа юм. Улмаар хүн үхчихээд байхад хэргийн газрын үзлэг хийгдээгүй, хийгдэх байтугай шинжээч ч ирээгүй.

Ингээд тоггүй харанхуй, дээр нь утасны сүлжээ унасан байхад Хөтөлийн цагдаа ид шидээр хүрч ирчихээд сүүлд, нэгэнт өглөө болсон хойно талийгаач хүүгийн үеэл рүү холбогдон “Б-гийн бие тааруу байна. Бензинээ дүүргээд гараарай” гэсэн байдаг.

Үеэлийг ирэхэд Б-гийн бие хэдийнэ хөрчихсөн, толгойн тушаа газарт нүүрийг нь кока колагаар угаасан болов уу гэмээр задалж асгасан кола, мөн эмэгтэй хүний нүүр цэвэрлэдэг хөвөн олон тоогоор хаягдсан байдалтай байж.

Тэрчлэн хүүг газарт унасан гэдэг ч хувцас нь шороо тоосгүй цэвэрхэн байсан нь энд “хүн амины хэрэг” үйлдэгдсэн юм бишүү гэх хардлагыг дахин төрүүлж байгаа юм.

Гэрчүүдийн зөрөлдсөн яриа болох орноос ор дамжих гээд унасан, сөн түшиж яваад унасны алин ч байлаа гэсэн 110кг жинтэй, 1.94 буюу бараг 2 метр шахам өндөртэй чийрэг бадриун залуу хүүгийн нүүр, хувцас, гар хуруу нь ямар ч шал, дэвсгэргүй, дан шороогоороо эргэсэн гэрт унасан гэхэд мөлчийсөн цэвэрхэн. Үеэл нь нэгэнт хөрсөн дүүгийнхээ нүүрэнд хүрэхэд колагаар угаасан юмуу гэмээр нүүр гарын арьс зууралдан наалдаад байсан гэдэг.

Ингэж учир битүүлгээр амиа алдсан хүүгийн үхэл өнөөдөр “цус харвалт, элэг, нойр булчирхайн хавсарсан архаг үрэвсэл”-тэй байсан тул гээд хаагдаж байна.

Яагаад….

Нас барахаасаа жил хагасын өмнөхөн Цагдаагийн байгууллагын бие бүрэлдэхүүний эрүүл мэндийн нэгдсэн, нарийн мэргэжлийн эмчийн үзлэгээр цоо эрүүл гэж гарсан. Мөн амиа алдахаас 8-хан сарын өмнө Япон явахаар эрүүл мэндийн цогц үзлэгт орж эрүүл гэгдэж байсан хүү яагаад “элэг, нойр булчирхайн хавсарсан архаг үрэвсэл”-тэй болж, эрүүл мэндийн шалтгаанаар цус харван үхэх билээ?!

Цогцсыг үеэлийнх нь машинаар Сэлэнгэ аймгийн Шүүх шинжилгээний хүрээлэн рүү хүргүүлж задланд оруулж байх үед Хөтөлийн Прокурорын газрын тухайн үеийн дарга /одоо солигдсон/, мөн Хөтөлийн Цагдаагийн газрын дарга /бас солигдсон/ нар орчихоод төд удалгүй гарч ирэхдээ “гадны нөлөөгүй л юм байна” гэж хэлсэн байдаг.

Задлан шинжилгээний хариу гараагүй, үзлэг дуусаагүй байхад энэ нөхөд ямар учраас ингэж дүгнэв, хэлэв?!

Удалгүй хариу гарахад яг л тэдний хэлснээр болж “Гадны нөлөөгүй бөгөөд элэг, нойр булчирхайн хавсарсан архаг үрэвсэлтэй. Үхлийн шалтгаан цус харвалт” гэж…

No description available.

Өндөр чийрэг биетэй, сагс волейбол тоглодог, Цагдаагийн байгууллагын ажилтан албан хаагчдын эрүүл мэндийн нэгдсэн үзлэг болон Япон явахын тулд нэр хүндтэй, хувийн томоохон эмнэлэгт хийлгэсэн шинжилгээгээр ч эрүүл гэж гарч байсан хүүдээ ийм онош тавиулсанд итгээгүй ар гэрийнхний гомдлоор шүүх шинжилгээний бүрэлдэхүүнтэй үзлэг дахин хийгдсэн.

Энэ үзлэгээр толгойд мохоо, метал зүйлээр үүсгэгдэх гэмтэлтэй гэж гарсан.

Ийм факт илэрсэн ч залуу хүүгийн үхэл “өвчнөөр” хэмээн бичигдээд цагдаа нь цагдаагаа егүүтгэсэн байж магадгүй нэгэн хэрэг хаагдахдаа хүрээд байна.

Хамт олноороо, байгууллагаараа үгсэн хуйвалдаж энэ хэргийг дарсан байж болзошгүй хэмээн хардах бас нэг таамаглал нь хөдөөгийн малчин, хөгшин эцэг эхийнх нь үймэрч уйлалдсан сэтгэл зүйг “хуурч”, хүү тань амралт зугаалгад биш албан ажлаа гүйцэтгэж яваад нас барсан гээд 36 сарын цалинтай дүйцэх нөхөн олговор гаргуулж өгсөн нь сэжигтэй.

Ингэхгүй бол, ажлын бус цагаар амарч зугаалж яваад нас барсан гэвэл “хүн амины” хэрэг болчих гээд байв уу?!

Тиймээс байгууллага хамт олноороо ажил албаа гүйцэтгэж яваад нас барсан болгож хувиргаад, нөхөн олговор олгуулж, “аллага, хүн амь”-ны нэгэн хэргийг төөрүүлэн хаах гэсэн ноцтой оролдлого байсан юм биш байгаа, Ж.Болд хурандаа!!!

Цагдаа цагдаагаа егүүтгэсэн гээд Цагдаагийн байгууллагын нэр хүндэд сэв сууна гэх шалтгаанаар хэргийг хав дарах даалгавар өгчихөөгүй л бол хэрэгтэн тун ойрхон харагдаад байх юм, уг нь.

Мөнгөгүй гээд явахаас татгалзахад өмнөөс нь мөнгийг нь төлөөд хүчээр авч явсан эмэгтэй офицероос эхлээд, гар барилдаанд удаа дараа ялагдан бухимдсан нөхөр, тэр байтугай залууг амиа алдахад дэргэд нь байсан мэт, нэг болохоор хэрэг гарах үед гэртээ ирчихсэн байсан гэж хоёр өөрөөр ярьдаг Хэв журмын тасгийн дарга асан гээд олон хүнийг сэжиглэн шалгаж болмоор.

Энэ хэргийн талаар хэвлэл мэдээллийн хэрэгслүүдээс тухайн үед “Зариг.мн” сайт мэдээлсэн бөгөөд мэдээллийг нь ТВ9 телевизийн “Монгол коммент” нэвтрүүлэг тоймлон уншсан байгаа юм.

Гэтэл тус сайтын хоёрхон удаа товчхоноор мэдээлсэн хоёр мэдээний дорх коммент, сэтгэгдлүүд дотор ар гэрийнхэнд нь хүнд байхад наад мэдээгээ устгаач /яг үнэндээ ар гэр нь хэвлэл мэдээллийн туслалцаатайгаар хүүгийнхээ үхлийн үнэн мөнийг олохыг хүсч байсан/, төрийн албан хаагчдыг Зариг.мн гүтгэхээ боль /мэдээнд төрийн албан хаагчдыг буруутгасан ганц ч үг, өгүүлбэр байхгүй/, 25 цагдаагийн нэгийг буруутгах гээ юү гэхчлэн хэн нэгний сандарсан, уг мэдээг устгачихвал санаа нь амрах гэсэн ойр ойрхон, маш олон удаа орж бичсэн сэтгэгдлүүд өдгөө IP хаягаараа баримт болон үлдсэн байна.

Энэ бүхний эцэст, ийм олон сэжиг бүхий, анхаарал татам зүйлүүд байхад цагдаагийн алба хаагчдын хэргийг шалгадаг Цагдаагийн ерөнхий газрын Тусгай субъектын дарга солигдсон, шинэ дарга нь хатуу хөл хорионоос болоод юу ч шалгаж, хийж чадахгүй байна гэх хөгийн шалтаг тоочсоор өнөөг хүрч байгаа нь дэндүү эмгэнэл, дэндүү увайгүй юм.  

Амиа алдсан хүүг эрүүл чийрэг, бусдын ааш авирыг хөдөлгөхөөргүй зөөлөн, зан авир, хүмүүжлийн хувьд доголдолгүй нэгэн байсныг Зариг.мн сайтын мэдээн дор үлдээсэн хүүгийн танилуудын сэтгэгдлээс харж болно. Дор хавсаргав.

Ерөнхийлөгчийн хар технологийг Сүнээ амжилттай хэрэгжүүлэв

“Сонгууль болгоноор нэг эмэгтэйг золиосонд гаргадаг” хэмээн хэлж байсан Сүнээ буюу Б.Сүндэръяа хэлсэн үгнийхээ гол дүрд өөрөө тоглочихов.

Одоогоос зургаан хоногийн өмнө буюу өнгөрсөн ням гаригт тэрбээр өөрийн фэйсбүүк хуудсаар УИХ-ын гишүүн, Монголын толгой бизнесмэн, тэрбумтан эрийн хүчирхийллийн хохирогч болсноо зарлаж, үүний дараа олон нийтийн сүлжээгээр бэлгийн хүчирхийллийг эсэргүүцсэн “Me too” хөдөлгөөнийн эхлүүлж олон ч хохирогч бүсгүйчүүдийг эгнээндээ элсүүлж ялгуусан баатрын дүр эсгэсэн. Мэдээж олон нийтийн зүгээс түүний энэхүү давалгааг дэмжиж хүчирхийллийг дарах, ёстой хэмээн түүнд итгэсэн ч энэ нь улстөрчдийн зүгээс шидсэн маш том өгөөш байсан гэдэг нь ил болов.

Өөрөөр хэлбэл, Ерөнхийлөгч Х.Баттулгын талынхан Сүнээг энэхүү танил технологийнхоо  гол дүрийн “жүжигчин”-ээр тоглуулж нэлээн амжилттайгаар олныг хамруулсан ч Сүнээ өчигдөр энэ тухайгаа олон нийтэд зарлаж булайгаа чирэв. Тэрбээр “Х.Баттулга Ерөнхийлөгч өө, намайг бохир улстөрдөө бүү ашигла” гэх утгатай үгийг сошиал хуудаснаа цацаж олны эргэлзэхэд хүргэсэн юм.

Учир нь Монголчууд бид 2017 оны Ерөнхийлөгчийн сонгуулиас хойш иймэрхүү тавилттай хар технологийг олонтаа харсан учраас ийнхүү Сүнээгийн оруулсан дээрх постонд эргэлзэж эхэлсэн гэсэн үг. Үндсэндээ тэрбээр Ерөнхийлөгчийн санаачилсан энэхүү галыг өөр тийш нь эргүүлж олны тархийг угаахыг оролдсон ч тэд тэнэг биш гэдгээ харуулав.

Учир нь сенсаацийг сенсаациар дарах технологи Монголд нэвтрээд хэдэн жилийг ардаа үдсэн. Өөрөөр хэлбэл, маш чухал асуудлыг дараагийн нэг сенсаацтай сэдвийг гаргаж дарах жишээтэй. Ялангуяа сонгуулиар ажиглагддаг, өрсөлдөгчөө намнах, өөрийн хуудуутай асуудлыг мартуулдаг танил технологи гэсэн үг.

Тухайлбал, хэдхэн хоногийн өмнө олимпийн аварга Н.Түвшинбаяр багынхаа андыг нэвширтэл нь зодож нийгмийг бухимдуулахад хүргэсэн. Олон нийт энэхүү асуудлыг өлгөж авч  зодуулсан Энхбатын талд зогсож, Н.Түвшинбаярыг буруутгасан. Энэ мэт нийгмийн анхаарлыг татсан чухал асуудлуудыг мартагнуулах үүднээс Ерөнхийлөгчийн талынхан дахин нэг сенсаацийг гаргаж ирэн Н.Түвшинбаярын зодооны хэргийг мартуулж өөр сенсаацид олныг хуйлруулсан гэсэн үг.

Ямартай ч охид бүсгүйчүүдийн эмзэг сэдвээр шоу хийж сүр дуулиантайгаар хийсэн энэхүү “Me too”  гэх хөдөлгөөн цаашид хэрхэн өрнөх, үр дүн гарах эсэхийг олон нийт хүлээж байсан ч энэхүү аян албан зогссоноо өчигдөр зарласан нь сенсаацийг сенсаациар дарах нь манайд тогтсон, тогтоож буй танил технологи гэдгийг улам батлав.

Эх Сурвалж: erennews.mn

Тэгш сондгойгоор хөдөлгөөнд оролцох шийдвэр цуцлагдсан уу

Нийслэлийн онцгой комиссоос ирүүлсэн жагсаалт дотор автомашины чинь улсын дугаар алга хэмээн буцааж олон түмнийг чирэгдүүлсэн явдлыг манай сайт “Эрх мэдэлтнүүд үр хүүхэдтэйгээ тусгай ЭРХ-ээр хөдөлгөөнд оролцох нь” хэмээн шүүмжилсэн.

Хатуу хөл хорионы үеэр ажиллах 15 салбарын албан хаагчдыг хувийн автомашиныхаа улсын дугаарын сүүлийн орноор хуанлийн өдрийн тэгш сондгой өдрүүдэд хөдөлгөөнд оролц гэсэн. Оролцож ч байгаа.

Гэтэл гэнэтхэн өнөөдөр өглөөнөөс эхлэн эл шийдвэр мөрдөгдөхөө больж, НОК-оос ирүүлсэн нэрс, автомашины дугаараар хөдөлгөөнд оролцоно гэсэн нь даанч ойлгомжгүй.

Ингэж өөрчлөгдсөн шийдвэр, хэрэгжилтийнхээ талаар нийтэд мэдээлээгүй атлаа манай сайтад шүүмжлэлт нийтлэл гарсны дараахан энэ тухайдаа холбогдох байгууллагуудад албан тоот явуулж мэдэгдсэн мэт сандралдав.

Ингэхдээ бушуу туулай борвиндоо баастайн үлгэрээр мөнөөх албан тоотын он сараа буруу бичиж, тоот хүлээн авсан байгууллагуудын толгойг эргүүлээд л авч…

Ямартай ч эл үл ойлгогдох, хэзээ хэн гаргасан нь үл мэдэгдэх шийдвэр, 2012 оны он сарт албан тоот дахь мэдээллээс үзвэл “тэгш, сондгойгоор хөдөлгөөнд оролцох” захирамж хүчингүй болсон бололтой.

May be an image of text

Бүтээгдэхүүнээ татаж устгах ёстой Мах импекс хэрэглэгчийн “амыг барих” увайгүй үйлдэл гаргав

“Мах импекс” компанийн “Аянчин” хиамнаас үс гарсан мэдээлэл цахим орчинд шуугиан тариад байгаа. Хялгас ч биш бөөгнөрсөн үс гарч ирснийг хэрэглэгч баримтжуулан фэйсбүүк хуудастаа нийтэлсэн.

Тухайн иргэн “Мах импекс” компани руу гомдол мэдүүлэн хандахад тус компанийн харилцах утаснаас “Ахын дүү хөрсөн дээрээ буу, манайх найдвартай савалгаатай ариутгалтай, нээх өвчин нян илрэхгүй байх гэж бодож байна, би олон жил ажилласан туршлагатай 300.000 төгрөг өгөөд тохиръё” хэмээгээд мессэж явуулсан байсан нь олон нийтийн бухимдлыг төрүүлээд байна. Тэрчлэн гомдол гаргасан иргэнийг 300 мянган төгрөгийг голлоо гэж үзэн 1.000.000 төгрөг өгье гэж нэмж бичсэн нь дэндүү увайгүй хандлага юм.

Үс гэдэг хамгийн их нян хуримтлуулж тээдэг зүйл гэдгийг цар тахлын энэ үед ч анхааруулсаар байна. Тиймдээ ч хүнсний салбарынхныг малгай өмсөх, үсээ боох хатуу шаардлагыг тавьдаг.

Ийм байтал ой гутам бөөгнөрсөн үс хиамнаас гарч ирсэн нь “Мах импекс” компанид эрүүл ахуйн шаардлага алдагдсан, бохир заваан орчинд үйлдвэрлэл явагддаг байх нь гэх ойлголтыг нийгэмд өгч байгаа юм.

Нөгөөтэйгүүр хэрэглэгчдээс уучлал гуйж, бүтээгдэхүүнээ эргүүлэн авч, алдаа дутагдлаа залруулах учиртай Үндэсний томоохон үйлдвэрлэгч “Мах импекс” эсрэгээрээ хэрэглэгчийг худалдан авах оролдлого хийн тохуурхсан нь дэндүү гутамшигтай.

Бохирын хоолойноос гараа юу гэмээр бохир үс тухайн өдөр үйлдвэрлэсэн бүхий л хиамтай хамт хичнээн шат дамжлага дамжин байж савлагдсаныг хэн ч мэдэхгүй. Тиймээс “Мах импекс” аль шатандаа алдаа гаргаснаа тайлбарлаад, тэр өдөр үйлдвэрлэгдсэн бүх бүтээгдэхүүнээ худалдаанаас татан, нийт хэрэглэгчдээс уучлалт хүсэх ёстой.

Тэрчлэн, Нийслэлийн мэргэжлийн хяналтын газрын эрхэм дарга Л.Эрдэнэчулуун гуай… Нүдний чинь өмнө аймшигтай бохир орчинд хүнсний үйлдвэрлэл явагдаад байх шиг байх юм. Шуурхай ажиллаж, “Мах импекс” компанийн тухайн өдрийн бүтээгдэхүүнүүдийг эргүүлэн татуулж устгуулах ажлыг танайх ч хийлцэх ёстой биш үү…

Тэр байтугай хэрэглэгчийг хахуульдан гомдол саналыг нь татуулах оролдлого хийсэн тус компанийн ичгүүргүй үйлдэлд нь холбогдох хууль хяналтын бусад байгууллагаас ч хариуцлага тооцон арга хэмжээ авах нь зүй юм.

Мэдээ орчуулах »