fbpx

Засгийн Газар - Page 3

/

Шинэ танхим, сонгуулийн дараахь У.Хүрэлсүхийн суудалтай хамт яригджээ

Ерөнхий сайд Л.Оюун-Эрдэнэ танхимаа бүрдүүлэхээр нойргүй хонов. Үндсэн хуульд оруулсан өөрчлөлтөөр Засгийн газрын тэргүүн бүрэн эрхийн дагуу кабинетаа бүрдүүлэх боломжтой ч тийм боломж хомс. Нам доторх фракциудын зодооноос үүдэлтэй хуулиар олгогдсон эрхээ

/

Намын дарга парламентаа удирддаг хуучин дүрмээ дагачих, У.Хүрэлсүх ээ

Л.Оюун-Эрдэнийг Ерөнхий сайдад томилохыг Ерөнхийлөгч Х.Баттулга дэмжихгүй байгаа гэх сонирхолтой мэдээлэл эрх баригчдын дунд бий болов. Гэхдээ Төрийн тэргүүн татгалзлаа гээд тугалын бэлчээрээс хол гарах биш, хөөрхий. Ерөнхийлөгч Ерөнхий сайдад нэр дэвшигчээс татгалзлаа гээд буцаах эрх зүйн орчин байхгүй. Тэр

Том дэвсгэрт Засгийн газрыг тонгорох уран мэх биз, Монголбанкны ерөнхийлөгч өө!!!

/

Монгол Улс Венесуэлийн түүхийг давтахаар бэлтгэл ажлаа базааж байна. Эдийн засгийн гүн хямралд ороод байгаа Венесуэл улсын Төв банк шинэ мөнгөн дэвсгэртүүдийг гүйлгээнд гаргаж

Ерөнхий сайд Япон Улсад ажлын айлчлал хийнэ

Монгол Улсын Ерөнхий сайд Л.Оюун-Эрдэнэ 2021 оны 7 дугаар сарын 21-25-ны өдрүүдэд Япон Улсад ажлын айлчлал хийж, Токиогийн зуны XXXII Олимпын наадмын нээлтийн ажиллагаанд оролцоно.

Энэхүү айлчлал нь Монгол Улсын Ерөнхий сайд Л.Оюун-Эрдэнийн гадаад улс оронд хийж буй анхны айлчлал бөгөөд манай улсын гуравдагч хөрш, Стратегийн түнш Япон Улстай хөгжүүлж буй харилцаа, хамтын ажиллагаа Монгол Улсын гадаад бодлогын тэргүүлэх чиглэлийн нэг болохыг нотолж, цаашдын хамтын ажиллагааны чиглэлийг тодорхойлоход ач холбогдолтой юм. 

Ерөнхий сайд Л.Оюун-Эрдэнэ Япон Улсын Ерөнхий сайд Ё.Сүгатай албан ёсны уулзалт хийж, хоёр талын харилцаа, олон улс, бүс нутгийн хамтын ажиллагааны өргөн хүрээтэй асуудлаар санал солилцоно.Талууд ойрын болон дунд хугацаанд хэрэгжүүлэх томоохон төсөл хөтөлбөр,  хамтын ажиллагааны талаар ярилцана. Түүнчлэн Монгол, Японы хамтын ажиллагааны дараачийн Дунд хугацааны хөтөлбөрийг боловсруулах ажлын бэлтгэлийг хангах талаар тохирно. Ерөнхий сайд Л.Оюун-эрдэнэ Японы эрх баригч Либерал ардчилсан намын удирдлага, Япон Улсын парламент дахь найрамдлын бүлгийн удирдлагатай мөн уулзаж, санал солилцоно. 

Ерөнхий сайдын айлчлал Монгол, Японы хооронд дипломат харилцаа тогтоосны 50 жилийн ойн босгон дээр болж байгаагаараа онцлог юм гэж Засгийн газрын Хэвлэл мэдээлэлтэй харилцах газраас мэдээллээ. 

Авлигын индексийг бууруулах Ажлын хэсгийг Х.Нямбаатар ахлана

/

Засгийн газрын ээлжит бус хуралдаан 2021 оны долдугаар сарын 16-нд боллоо. Хуралдаанаас авлига, хүнд суртлыг таслан зогсоож, авлигын индексийг бууруулах зорилго бүхий Ажлын хэсэг байгуулав. Эрчимжүүлсэн арга хэмжээний төлөвлөгөө боловсруулж, батлуулан хэрэгжүүлж ажиллахыг тус Ажлын хэсгийн дарга, Хууль зүй, дотоод хэргийн сайд Х.Нямбаатарт даалгалаа.
ХБНГУ-ын Берлин хотод төвтэй “Транспаренси Интернэшнл” олон улсын төрийн бус байгууллагаас жил бүр улс орнуудын төрийн албан дахь авлигын талаар шинжээч, бизнес эрхлэгчдийн судалгаанд үндэслэн Авлигын төсөөллийн индексийг боловсруулдаг бөгөөд 2020 оны дүнг 2021 оны 1 дүгээр сарын 28-ны өдөр дэлхий нийтэд зарласан.
Индексийн дүнгээр Монгол Улс 2020 онд 35 оноо авч 180 улс орноос 111 дүгээр байрт эрэмбэлэгдсэн байна. Энэ нь өмнөх оныхтой ижил оноотой боловч 5 байраар ухарсан үзүүлэлт болж байна.
Монгол Улс өмнөх оныхоос оноо буурсан үндсэн шалтгаан нь төрийн албан хаагчид эрх мэдэл, албан тушаалын байдлаа урвуулан ашигладаг байдал нэмэгдсэнээс хамаарсан байж болох судалгааны дүн гарсан. Түүнчлэн бизнес эрхлэгчид үйл ажиллагаа эрхлэх болон гэрээ, хэлцэл байгуулахад авлигатай нүүр тулах эрсдэл нэмэгдсэн гэх шалтгаанаар манай улсын үнэлгээ буурсан байна.
Засгийн газраас гарч байгаа шийдвэр анхан болон дунд шатанд хэрэгжихгүй байгаагаас иргэдэд төрийн үйлчилгээ хүрэхдээ хүнд суртал, авлига дагуулж, энэ нь хилийн Замын-Үүд боомтод үүссэн асуудлаас тодорхой харагдаж байна.
Иймд олон улсын байгууллагын судалгаа, дүгнэлт болон Монгол Улсад тулгараад буй нөхцөл байдлыг харгалзан төрийн албан хаагчдын эрх мэдэл, албан тушаалаа урвуулан ашиглаж буй байдлыг таслан зогсоох, бизнес эрхлэгчдэд учирч буй дарамт, хүнд суртал, авлигыг бууруулах төрийн байгууллагуудын ажлын уялдааг хангах зорилгоор Авлигын индексийг бууруулах үүрэг бүхий төрийн байгууллагуудын төлөөллөөс бүрдсэн Ажлын хэсгийг байгуулан, төлөвлөгөө боловсруулж ажиллах нь зүйтэй гэж үзсэн байна.
Авлигын төсөөллийн индексээр Монгол Улс 111-р байрт жагсаж байгааг хоёр жилийн хугацаанд хоёр оронтой тоонд оруулах зорилт тавьж байна. Шинээр байгуулсан ажлын хэсэг авлигын гэмт хэргийг бий болгож байгаа суурь хүчин зүйлс буюу хууль эрх зүйн орчныг сайжруулах, цахим шилжилтийг эрчимжүүлэх зэрэг ажлыг эрчимжүүлнэ.

Замын-Үүдийн чөлөөт бүс байгуулах ажлыг эрчимжүүлнэ

“Замын-Үүдийн дэд бүтцийг сайжруулах төсөл”-ийн хүрээнд барьсан Дулааны станц, Ус хангамж, ариутгах татуургын туршилт, тохируулга хийхэд шаардлагатай нэг тэрбум гаруй төгрөгийг Засгийн газрын нөөц сангаас гаргахаар болов. Замын-Үүдийн чөлөөт бүсийн бүтээн байгуулалт 2026 онд дуусч ашиглалтад орох хэдий ч Монгол Улсын Ерөнхий сайд Л.Оюун-Эрдэнэ чөлөөт бүсийг энэ зун нээж байнгын ажиллагаанд оруулах үүрэг өгөв.

Эрхзүй, хөрөнгө оруулалтын таатай орчин бүрдүүлснээр:

– Экспорт, импорт нэмэгдэнэ;

– Үйлдвэрүүд хөгжинө;

– Худалдаа, үйлчилгээний шинэ салбарууд бий болно;

– Шууд ажлын байр бий болно;

– Бүтээн байгуулалт нэмэгдэнэ;

– Аялал жуулчлал хөгжинө;

– Тэргүүний техник, технологи нутагшина;

– Транзит тээвэр, логистик нэмэгдэнэ;

– Худалдааг хөнгөвчилнө;- Бүс нутгийн хөгжил эрчимжинэ гэж үзэж байна. Тухайлбал 2026 он гэхэд хөрөнгө оруулагчийн тоо 70-д хүрч 9,400 ажлын байр бий болох юм. 2034 он гэхэд экспортын бүтээгдэхүүн гурав дахин нэмэгдэх бөгөөд гадаадын хөрөнгө оруулалт 2,9 тэрбум ам.долларт хүрч 18 мянган ажлын байр бий болох тооцоо гарчээ.

Аймаг сумд нь ч тусгаар улс шиг болж задарсан Засгаас нусгайнуудаа тат, МАН-ынхан!!!

Түүхэн дэх хамгийн муугийн жишээгээр Л.Оюун-Эрдэнийн тэргүүлсэн Засгийн газрыг нэрлэх байх. Үе үеийн Засгийн газар өөрийн гэсэн өнгө төрх, шүүмжлүүлэх зүйлтэй ч өнөөгийнх шиг сулбагар, үлбэгэр, ур чадваргүй, хулчгар байсан нь үгүй.

Нонж дорой, төрийн албаны туршлагагүй, мэдлэг чадвар нь 0 заасан, ядахад ямар ч хурд байхгүй нөхдөөр танхимаа бүрдүүлсэн нь бүгд салбар салбартаа гологдож ёстой л нусаа хацартаа нааж явна.

Үүнийг нь үл тоон шинэ, залуу үеийнхэнд боломж олгож, үүд хаалгыг нь нээж өгцгөөе хэмээн Л.Оюун-Эрдэнийн Засгийн газрыг өнгөлгөөр харж, хүлээж байсан үе бий.

Харамсалтай нь тэр зөвхөн үүрэг гүйцэтгэгч гэдгээс илүү тодотголыг бүтээж чадсангүй.

Сү.Батболдын фракцийн хөдөлгөөнөөс урьтаж У.Хүрэлсүх гүйцэтгэх засаглалын тэргүүний тамгаа Л.Оюун-Эрдэнэд атгуулаад хагас жилийн нүүр үзлээ. Засгийн тамгыг авсан ч “сайн” ахын даалгавраар 7 сайдыг суудалд нь үлдээж, үлдсэнийг нь мөнгөний өрөнд өгсөн гэхэд хилсдэхгүй.

Засгийн газрын гал тогоог барьж байгаа Ц.Нямдоржид урилга илгээсэн хүн нь “Би” гэж Л.Оюун-Эрдэнэ тодрох ч үнэн чанартаа хөгшин сайдын зорилго нь 49 хувийнхныг шахаж “Эрдэнэт”-ийг эрхшээлдээ байлгах.

Өөрөө авч чадахгүй ч өрөөлд өгөхгүй гэх байр сууриа Л.Оюун-Эрдэнийн араас хийж байгаа нь энэ. Түүний халаасанд Б.Хурцыг С.Зоригийн амь насыг бүрэлгэсэн хэргээс холдуулж, олон нийтийн анхаарлыг өөр зүгт хандуулах зорилго ч эвхээстэй явсан. Үүнийгээ биежүүлж Б.Хурцыг нарсанд, Б.Содномдаржаа, Т.Чимгээ нарыг наранд гарган будлиантуулж дөнгөв. Энэ бүхэн Ц.Нямдоржид таатай ч Л.Оюун-Эрдэнийн карьерт хар толбо болно. Хуулийн салбарыг самарч, олон жил мөрдсөн хэргийг ил ч биш, нууц ч биш болгон оромдоглосон зэм түүнийх. Үүнээс улбаалан улсын нууцыг хэсэгчлэн задруулж, эрэмдэглэсэн ялыг хожим түүнд сонсгож мэдэх юм.

Тэрчлэн генсэкийн шахаа гэгдэх Шадар сайд С.Амарсайхан түүний шүдний өвчин болж яваа. Шадар сайдын суудлыг генсэкийн аманд багтаж, женко Х.Баттулгын худад өгсөн нь Л.Оюун-Эрдэнийн хувьд мордохын хазгай болсон юм.УОК-ын хойрго назгай, зоримог бус шийдвэрээс болж цар тахлыг улам гааруулсан нүгэлтэн болж, албан тушаалаа тушаах дээрээ тулаад байна. Туршлагагүй Засгийн газрын тэргүүнд таяг биш тушаа болсон С.Амарсайхан огцруулах сайд нарын хамгийн эхэнд эрэмбэлэгдэж байгаа юм.

Сэтгүүлчийг сэтгүүлчээр сольсон гэх шүүмжлэлийг дагуулж яваа Байгаль орчин, аялал жуулчлалын сайд Н.Уртнасан хамгийн бүтэлгүй томилгоонуудын нь нэг. Гай ч үгүй, гавьяа ч үгүй, гараас нь ажил гардаггүй сайд. Ёстой хийсэн ажилгүй, хэлсэн үггүй, яамны буланд чимээгүйхэн шигдэж суудаг шавар бурхан л гэсэн үг. Хатгах тусам цагиргалж хэвтдэг жаран хөлттэй эгээ ижил. Цар тахлаас улбаатай аялал жуулчлалын салбар хоёр жил орчмын хугацаанд тэг зогсолт хийж байна. Өдгөө ч аялал, амралтын газрууд хаалгаа барьж, аж ахуйн нэгжүүд дампуурлаа зарлаж, ажилчид нь уйлж байна. Тэднийхээ халдвар хамгааллыг сахиулаад дотоодын аялал, амралтыг тасалдуулалгүй байлгая гээд ухасхийчих ухаан түүнд алга. Хэдэн зуун тонн шатахуун асгарч гол ус, байгаль дэлхий хордож байхад, Хүй 7 худагт наадамлана гээд хөрс шороо сэндийчиж байхад ч тэр чимээгүй.

Соёлын сайд Ч.Номин бол энэ Засгийн газрын аксессуар буюу туслах детал төдийхөн. Ганган хүнд гархи, галзуу хүнд салхи нэмэр гэгчээр Засагтаа дараа болсон илүүдэл нь. Тангараг өргөсөн эхний өдрөөсөө хазгай гишгэсэн Соёлын сайд Ч.Номин гүйцэтгэх засаглалын тэргүүнд өдөр шөнөгүй өвтгөж, нойргүй хонуулсан шүдний өвчин нь байсаар ирэв.

Гадны шоу импортлогчийг соёл түгээгч гэж эндүүрсэн нь Л.Оюун-Эрдэнийн тархины цар хүрээг харуулсан эмгэнэлт сонголт болсон юм. Өнөөх нь дотооддоо хөгөө чирж дүүрээд сүүлдээ гадагш хальж, гадаад хэлтэй хүн болон хөөрч яваад түмний шившиг болов.

Хоосон орхихгүй гэсэндээ Ховдынхны шахаасаар З.Мэндсайханыг Хүнс хөдөө аж ахуйн сайдаар үлдээсэн нь бүр лай ланчиг болсон. Сайн морь ярихаас салбарын бодлого ярьж мэддэггүйн балаг нь мах гурилын үнийг хүрч болох хамгийн дээд цэгт хүртэл өсгөж, тахлын зовлонд шаналсан түмнийг улам бүр бухимдуулж байна. Өлсч туйлдсан иргэдийн уур унтуу өдөр бүр Л.Оюун-Эрдэнийн зүг шидэлсэн зэвсэг болчихоод байгаа.

Ядаж байхад Ерөнхий сайдын өөрийн нь санаачилж улсын төсвийн 2 тэрбумаар бариулсан Андлалын өргөө цогцолбор нурчихсан. Байгалийн түүхий музей нь зураг төслөөсөө гажиж бухенвальдын шорон шиг юм болчихлоо гэх хүчтэй шүүмжлэлийг дагуулж байна.

Эрүүл мэндийн сайдаар томилогдсон С.Энхболд өмнөх Т.Мөнхсайханаасаа дээрдсэнгүй. Үнэндээ хэн хэнийхээ бизнесийг дэмжиж ирсэн халаас нэгтнүүд гэдгийг улс төрийн хүрээнийхэн анддаггүй аж. Л.Оюун-Эрдэнэ нэмэгдэхүүний байрыг сольж, нүд хуурсан төдий томилгоо хийсэн гэсэн үг. Унтаа, сэрүүн нь мэдэгдэхгүй С.Энхболд сайд цар тахлыг хумих байтугай эмч сувилагчдынхаа цалин хангамжид ч анхаарал тавьж, асуудал дэгдээж чадахгүй үүлгэртэж явна.  

Ганц нүдээ олсон томилгоо хэмээн сайшаагдаж байсан Л.Энх-Амгалан нь хичнээн хараад ч MCS-ийн төлөөлөл. Ашиг сонирхлын хамгийн том зөрчилтэй сайд. Төрөөс зарласан тендэрийг гаргаахгүй хүртдэг энэ компани салбар толгойлно гэдэг тоглоом биш.

Эрээвэр хураавар, эрх ашгийн зөрчилтэй энэ Засгийн газрын огцрох хамгийн том шалтгаан нь аймаг, орон нутгийн засаг захиргаад нь Засгийн газраасаа салж, сөрж, ганц ганцаар тоглодог болсон явдал.

Засгийн газрын тэргүүн нь ковидгүй зун болно гэдэгт уриалж, иргэн бүрийг дарлаажуулалтад хамруулан чичирч байхад орон нутгууд нь хилээ хаан улс доторх улс болцгоочихлоо. Уг нь монгол улсын иргэдийн хувьд энэ газар нутгийнхаа эзний ёсоор хаана ч аялж зугаалан, амрах эрхтэй. Гэтэл аймаг сумд бүр тусгаар улс шиг аашлан монгол хүний гишгэх газар, уух усыг хязгаарлан цамнаж байна. Энэ үйлдлүүд нь цар тахлыг хумих битгий хэл олон хүнийг агаар салхигүй орчинд хумьж бөөгнүүлснээрээ улам бүр гааруулж, үр дүнд нь улсын эдийн засаг ч тэг зогсолт хийхэд хүрээд байна.

Л.Оюун-Эрдэнийн тэргүүлсэн Засгийн газар нөхцөл байдлыг гартаа авснаас хойш тохиолдлын тоо 3 орон тоог хол давж, 700 шахам иргэн амь насаа алдлаа. Ажлын байр нэмэгдүүлэх зээл гаргасан ч аж ахуйн нэгжийн хаалга цоожтой, иргэдийн амьжиргаа талх таллаж, хальс ясханаар шөл гаргаж хооллохдоо хүрэв.

Түүний шийдвэр бүр эргэж буцсан, Нийслэлийн онцгой комисстойгоо ч ойлголцож чадахгүй, зарим шийдвэр нь 24 цаг хүрэхгүй өөрчлөгдөж байна.

Тиймээс 80-аад оныхноор Засгийн эрх бариулж, төрийн толгойгоор тоглуулж болсон бол одоо эрх нусгайнуудаа ав, эрхэм МАН-ынхаан.

Ерөнхий сайд Л.Оюун-Эрдэнэ: Бид халдвар хамгааллын дэглэмээ ягштал бариад том төслүүдээ урагшлуулах ёстой

/

Монгол Улсын Ерөнхий сайд Л.Оюун-Эрдэнэ Дорноговь аймгийн Алтанширээ суманд баригдаж буй Газрын тос боловсруулах үйлдвэрийн бүтээн байгуулалттай танилцлаа.

Газрын тос боловсруулах үйлдвэр байгуулах төслийн хэрэгжүүлэгч “Монгол газрын тос боловсруулах үйлдвэр” ТӨХХК-ийн Гүйцэтгэх захирал Д.Алтанцэцэг бүтээн байгуулалтын ажлуудын талаар Ерөнхий сайдад мэдээлэл өглөө.

Газрын тос боловсруулах үйлдвэр нь БНЭУ-ын Засгийн газрын хөнгөлөлттэй зээлийн санхүүжилтээр (1,236 тэрбум доллар) хэрэгжиж буй бөгөөд жилд 1,5 сая тонн газрын тос боловсруулах хүчин чадалтай. Төсөл 5 ажлын багцаас бүрдэнэ. Өнөөдрийн байдлаар Инженерчлэл, төлөвлөлт, зохион байгуулалт болон Технологийн бус барилга байгууламж барих ажлын гэрээ байгуулагдан бүтээн байгуулалт үргэлжилж байна. Үйлдвэрийн талбайд оффис, сургалтын төв, гал команд болон анхны тусламжийн байр,  засварын цех, лаборатори, агуулахаас гадна Бор Хөөвөрийн говиос татах усан хангамжийн ажлыг цогцоор нь байгуулна. Уг бүтээн байгуулалтын дараа үйлдвэрийн үндсэн технологийн байгууламжуудыг барина. 

 “Монгол газрын тос боловсруулах үйлдвэр” компани нь төслийг иж бүрнээр нь хэрэгжүүлэх үүднээс ажилтнуудын орон сууцны хотхоныг Сайншандад барьж байна. 550 айлын уг хотхон нь оффис, хурлын танхим, хоолны заал, анхны тусламжийн төв, дэлгүүр, ахуйн үйлчилгээ, сургууль цэцэрлэг, ногоон байгууламж зэргээс бүрдэх бөгөөд нийт 11 барилгаас бүрдэх ажээ. 

Одоогоор орон сууцны барилгын ажил 85 хувьтай байна. Өнгөрөгч зургадугаар сард эхний ээлжийн орон сууц ашиглалтад орох байсан ч цар тахлын улмаас хойшилжээ.

Эрдэнэт, Дархан, Хөтөл, Багануур зэрэг уул уурхай, үйлдвэр даган боссон хотуудын нэгэн адилаар Сайншанд ч тун удахгүй Газрын тос боловсруулах үйлдвэрээс эхтэй аж үйлдвэржсэн хот болон хөгжинө  гэж  гүйцэтгэх захирал Д.Алтанцэцэг хэллээ.

Ерөнхий сайд Л.Оюун-Эрдэнэ,

-Монгол Улсын түүхэнд үлдэх том бүтээн байгуулалтад гар бие оролцон, хүчин зүтгэж байгаа та бүхэнд Засгаас газраас талархаж буйгаа илэрхийлж байна. Дэлхий нийтээрээ цар тахалтай тулсан амаргүй нөхцөлд байна. Энэ цаг үед халдвар хамгааллын дэглэмээ баримтлан бүтээн байгуулалтыг урагшлуулж байгаа нь чухал хэдий ч та бүхний эрүүл мэнд юу юунаас чухал гэдгийг мартаж болохгүй гээд тэдний ажилд амжилт хүслээ.

Үүний дараагаар Ерөнхий сайд төв болон орон нутгийн хэвлэл мэдээллийнхний асуултад хариуллаа.

Замын-Үүд боомтын ажлыг эрчимжүүлэх үүднээс 30 хоногийн үүрэг өглөө. Энэ хугацаанд байдал дээрдэхгүй бол хариуцлага тооцно гэдгийг хэлсэн. Үүнд илүү тодорхой хариултыг сэтгүүлчид тодрууллаа.

–       Цар тахлаас үүдээд Замын-Үүд, Гашуун сухайт боомт дээр хүндрэлүүд гарч байна. Үүнтэй холбоотой өмнө нь ажлын хоёр хэсэг гарч ажилласан. Үр дүнг нь үзэх гэж Замын-Үүд боомтод ажиллаж байгаа нь энэ. Монголын талд Хятадын талаас тавьж буй хэд хэдэн шаардлагыг богино хугацаанд биелүүлэх нөхцөл байдал үүсч байна. Энэ нөхцөлийг сайжруулах Засгийн газрын бүрэн эрхэт төлөөлөгчийг томиллоо. Эрүүл мэнд, мэргэжлийн хяналтын баг томилж ажиллахаар боллоо. Үр дүн нь наана гарна гэж итгэж байгаа ч 30 хоногийн хугацаатай үүрэг өглөө. Хоёр талд байгаа хилийн хяналтын байгууллагууд халдвар хамгааллын дэглэмээ барьж Улаанбаатараас ирэх ачаа барааны халдваргүйтлийг хийх, ээлжийн жолооч нарын эрүүл мэндийн асуудал, вакцинжуулах зэрэг зайлшгүй хийх ажил байгаа. Энэ хугацаанд үр дүн гарахгүй бол хариуцлагын асуудал ярина гэж Засгийн газрын тэргүүн сэтгүүлчийн асуултад хариулахдаа хэллээ.

Юун дээр алдаа гарсан гэж харж байна. УОК-ийн дарга сар орчмын өмнө ирж, хил нэвтрэх машины тоог 50 орчмоор нэмэгдүүлнэ гэсэн. Гэтэл одоо ч байдал хэвээрээ л байна?

–       Гол зүйл цар тахалтай л холбоотой. Барааны гадаргуугаас үүдсэн ковидын нөхцөл байдлаас шалтгаалсан. Лабораторийн шинжилгээ хийсэн. Гадаад харилцааны яамаар дамжуулан Хятадын талтай ярьж байгаа. Ачаа барааны гадаргууг цэвэрлэх, халдваргүйжүүлэх, халдвар хамгааллын дэглэмээ сайжруулах ёстой.

Ачаа тээврийн үнийн хөөрөгдөл бий болоод байна. Энэ асуудлаар АТГ-д хандсан гэж байсан. Энэ талаар тодруулъя?

–       200-250 машин өдөрт хилээр гардаг байсан боомт өнөөдөр 100 машин гээд хязгаарлалт тавьчихаар бөөгнөрөл үүсэж, эрэлт нийлүүлэлт зөрж үнэ өсөж байна. Дээрээс нь нугалаа үүсгэж байж магадгүй гэсэн мэдээлэл ирсний дагуу Тагнуулын ерөнхий газар, Авлигатай тэмцэх газрын хамтарсан ажлын хэсэг байгуулсан. Ажлын хэсэг ажиллаад мэдээлэл өгөөд явж байгаа. Энэ мэдээллийн мөрөөр Замын-Үүдэд ажиллалаа.

Газрын тосны үйлдвэрийн бүтээн байгуулалтын ажил  нэг жилээр хоцорлоо гэдгийг удирдлагууд нь ярьж байна. Та ямар арга хэмжээ авна гэж төлөвлөж байна?

–       Зөвхөн Монгол биш дэлхий даяар цар тахалтай тулж байна. Нэг жил зогслоо. Тиймээс бид одоо ковидтой дасан зохицоод, сөрөөд, халдвар хамгааллын дэглэмээ сайн бариад том төслүүдээ урагшлуулахгүй бол эдийн засаг хүндэрч, бүх улс оронд төсөв тасалдах хэмжээний хямрал үүснэ. Эхний шинж тэмдгүүд гарч байна. Тухайлбал, зогсонги байж байгаад гэнэт хөдөлгөөн орж, үйлдвэрлэл сэргээд ирэхээр бараа материалын хомсдол, үнийн хөөрөгдөл үүсч байна.  Үүнийг хамтдаа даван туулах шаардлагатай. Газрын тосны үйлдвэр ч биш бусад бүтээн байгуулалт, олон төсөл цар тахлаас улбаалж нэг жил алдлаа. Ийм учраас эрчимтэй ажиллаж, анхаарал хандуулах ёстой гэлээ гэж Засгийн газрын Хэвлэл мэдээлэлтэй харилцах газраас мэдээллээ.

Элчин сайдуудын томилгооноос Д.Цогтбаатар хойш суусангүй, хоёр ч хүнээ хавчуулаад авчээ

-Машиндаа 70 кг хар тамхи тээвэрлэж яваад Холбооны Бүгд Найрамдах Герман Улс /ХБНГУ/-д баривчлагдсан нөхдийн нэг Д.Цогтбаатарын жолооч байсан гэдэг-

Зэлтэрийн гацаа шиг байсан Элчин сайдуудын асуудал эцэслэгдэв. Гэвч томилгоо Төрийн тэргүүнээр сонгогдсон У.Хүрэлсүхийн бялуу хуваалтаас хэтэрсэнгүй. Дипломат зарчим урьд байгаагүйгээр алдагдаж, эцэстээ очиж буй улсаа ч үл хүндэтгэсэн томилгоонууд хийгдэх боллоо.

Х.Баттулгын зүгээс өөрийн зөвлөхөөр ажиллаж байсан Л.Болдыг Бельги улсад суух Онц бөгөөд бүрэн эрхт Элчин сайдаар санал болгосныг нь Засгийн газар дэмжлээ. Зэвсгийн наймааны хэрэгт нэр хутгалдаж явсан түүнийг Германы Элчингээр ярьж байсан удаатай.

Болгарт суух онц бөгөөд бүрэн эрхт Элчин сайдаар томилогдсон Л.Саяанаа нь Ерөнхийлөгч У.Хүрэлсүхийн хүн. Түүнийг намын Ерөнхий нарийн бичгийн дарга байхаас нь салаагүй үнэнч “цүнх баригчдын” нь нэг.

Их Британи Умард Ирландын Нэгдсэн Вант Улсад суух элчин сайдаар томилогдоод байгаа Б.Энхсүх ч У.Хүрэлсүх, Л.Оюун-Эрдэнэ нарын ойрын хүн. Тэдний дэмжлэгээр олон ч албан тушаал хашиж яваа. Тагнуулын ерөнхий газрын дэд дарга, Оюуны өмчийн газрын дарга гээд аль ч салбарт өөрийгөө голохгүй, нүүр улайхгүй зүтгэнэ.

Гадаад харилцааны сайд Б.Батцэцэгийн хүргэн Ө.Батбаяр Элчингүүдийн жагсаалтаас хоцорсонгүйгээр үл барам АНУ-д суух элчин сайдаар нэрлэгдсэн нь олон нийтийн дургүйцлийг хамгийн ихээр хүргэж байна. “Сигар” тамхины борлуулагч тэрбээр аялагчдын группийн админ гэх ажил, мэргэжлийн алин үл болох сэтэртэй. КТМС буюу “Компьютер техник менежментийн сургууль”-д электроник инженер, мэдээллийн технологи мэргэжлээр сурч төгссөн хүргэнээ сайд эгч нь албан тушаалаа урвуулан ашиглаж Монгол Улсын нэр хүнд, дипломат ёсыг үгүй хийхээр ийнхүү шийдсэн нь хэрээс хэтрэв.

Улс орнууд Элчин сайдаар, тэр дундаа АНУ-д суух төлөөлөгчөөрөө улстөр, геополитикийн өндөр мэдлэгтэй, мэргэшсэн дипломатчдаа илгээдэг байхад манай улс зүгээр нэг бадарчны үүргэвчинд гадаад бодлогоо чихээд явуулж болохгүй юм.

Тэрчлэн энэ удаагийн томилгоонд М.Энхболдын талаас багтсан хүн нь Д.Даваасүрэн. Гадаад харилцааны яамны Төрийн нарийн бичгийн даргаар ажиллаж байхдаа ажлын хариуцлага алдсан шалтгаанаар үүрэгт ажлаасаа чөлөөлөгдөж байв. М.Энхболдын гэх тодотголоор нь халсан гэх яриа ч бий.

Засгийн газрын гал тогоог барьж байгаа Ц.Нямдорж томилгооноос хоцорно гэж юунд байхав. Өөрийн “цагдаа” С.Баатаржавыг дэвшүүлээд амжив. Ц.Элбэгдоржийг Ерөнхийлөгчөөр ажиллах үед Төрийн ёслолын албаны даргаар ажиллаж байсан Ж.Сэрээжав хүртэл Элчингийн сэнтийгээс зуураад авсан нь энэ төрийн эмгэнэл.

Төрийн ёслолын албаны дарга Ерөнхийлөгчийн Сар шинийн баярын идээг 10 үеэр зассан гэмээ хүлээхгүй, доод хүмүүсээ буруутган бангадуулж явсан нэгэн. Нэр дээрээ бүртгэлтэй компанигүй, хувийн бизнесгүй атлаа тэрбумаар үнэлэгдэх хөрөнгөтэй. Тэрбум 410 сая төгрөгөөр үнэлэгдэх хоёр ч үл хөдлөх хөрөнгө, 1 орон сууцтай. 40 саяын үнэлгээ бүхий мал, 52 сая үнэ бүхий үнэт эдлэл, 75 сая төгрөгийн хадгаламжтай байсан нь олон хүний анхаарлыг татаж байсан удаатай.

Ийм үл бүтэх нөхөд Элчингүүдийн томилгоонд шургалж, Монгол Улсыг төлөөлөх гэж байна.

Энэ удаагийн томилгоонд Сү.Батболдын фракц ч нэлээд жинтэй орж иржээ.

Засгийн газрыг амлаж байсан У.Хүрэлсүх Элчингийн томилгооны ихэнхийг С.Батболдод найр тавьсан бололтой юм.

Сингапурт суух Онц бөгөөд бүрэн эрхт Элчин сайд С.Энхбаяр гэхэд Д.Цогтбаатар, Сү.Батболд нарын зөвлөхөөр ажиллаж байсан бөгөөд МУИС-ийн хятад хэлний ангийг дүүргэсэн. Тэрбээр АНУ-д суралцаж байсан гэх ч диплом нь жинхэнэ үү, хуурамч уу гэх асуудал 2019 онд нэлээд өндрөө авч байв. Тухайн үед түүнийг Хятадад суух Элчин сайдаар зүтгүүлж, намтар нь дуулиан дэгдээснээс буцаж байлаа. Өдгөө ч энэ асуудал эцэслэгдээгүй.

Сү.Батболд Ерөнхий сайдаар ажиллаж байхдаа түүнд зориулж Уул уурхайн асуудал хариуцсан зөвлөх гэдэг албыг шинээр байгуулж байсан гэдэг. С.Энхбаяр нь Монгол Улсаас Хятадад нийлүүлэх нүүрсний гол тоглогч “Шинхуа” компанитай нягт харилцаатай нэгэн. Тавантолгойн ордыг барьцаалж “Чалко”-той байгуулсан 350 сая ам.долларын гэрээг байгуулахад гол үүрэг гүйцэтгэсэн гэлцдэг.

С.Энхбаярыг МАН-ын “хор найруулагч” болоод байгаа Сү.Батболдын улаан хамгаалагч гэдгийг улс төрийн хүрээнийхэн андахгүй.

2012.03.27-нд Ерөнхий сайд Сү.Батболдын зөвлөх С.Энхбаяр “ЗТБХБ-ын сайдын тушаалаар байгуулагдсан БНСУ-тай төмөр замын хамтын ажиллагааны асуудлаар яриа хэлэлцээ хийх ажлын хэсэгт би орж ажилласан нь үнэн. Энэ ажлын хэсгийг тухайн үеийн дэд сайд А.Гансүх ахалж байсан. Гэхдээ ажлын хэсэг нь МОРИК компанитай яриа хэлэлцээ хийж байгаагүй. Х.Баттулга гишүүний хэлээд байгаагаар Монголын төмөр зам компани дангаараа МОРИК-той яриа хэлэлцээгээ хийж гэрээ байгуулсан. Энэ гэрээг байгуулах асуудлаар тухайн үед Монголын төмөр зам компаниас ямар нэгэн мэдээлэл өгч байгаагүй учраас уг асуудлыг Монгол Улсын Ерөнхий сайд С.Батболдод танилцуулаагүй гэдгийг албан ёсоор хэлмээр байна” хэмээж байв.

Гүйцэтгэх засаглалын тэргүүн нь мэдээгүй байна гэж байхгүй хэмээн тухайн үед Зам тээвэр, барилга хот байгуулалтын сайдаар ажиллаж байсан Х.Баттулга мэдэгдсэн ч С.Энхбаяр ийнхүү хир халдаахгүй хамгаалж байлаа.

Үүнээс долоо хоногийн дараа /2012.04.05/ Ерөнхий сайд С.Батболд, АН-ын дарга Н.Алтанхуяг нар Иргэдэд олгох Эрдэнэс Тавантолгойн 1072 хувьцааны талаар хамтарч мэдээлэл хийх болсон ч С.Батболд оролцоогүй. Гэтэл зөвлөх С.Энхбаяр мөн л “Ерөнхий сайдад албан ёсоор хандаж хэлээгүй. Түүний өмнөөс шийдвэр гаргаж хамтарсан хурал зарласан чинь зохисгүй явдал” хэмээн Н.Алтанхуяг руу ассан. Ийм нэгэн улаан хамгаалагчаа 2019 онд БНХАУ-д суух Элчин сайдад зүтгүүлээд бараагүй ч энэ удаад оффшор хөрөнгийн бүс нутаг Сингапур руу илгээх нь.

Сингапур ч лиценз болон нүүрсний наймаачдын дэн буудал мэт болсоор удлаа.

ОХУ-д суух Онц бөгөөд бүрэн эрхт Элчин сайд Ө.Энхтүвшин: Нам доторх фракциудынхаа алинд ч харьяалагддаггүй хэмээн өөрийгөө тодорхойлдог тэрбээр цагийн зүү дагаж, албан тушаал горилж явдаг нэгэн. “Уламжлал шинэчлэл, Ардчилал-шударга ёс” жигүүр байгуулан намын удирдлагуудаа барьц алдуулж байж Боловсрол, шинжлэх ухааны сайдаар томилогдож байсан элдэвтэй эр.  

Аз тохиож зурвас үе МАН-ын даргаар ажиллаж байсан. Тухайн үед Сү.Батболд болон М.Энхболдын дэмжлэгээр тэр суудалд заларч байв. 2017 онд Ж.Эрдэнэбатын Засгийн газрыг огцруулахад гол хутгуур хийж байсныхаа хариуд энэ удаад мөн л С.Батболдын дэмжлэгээр хойд хөрш рүү мордох боллоо.

Бүгд Найрамдах Беларусь улсад суух Онц бөгөөд бүрэн эрхт Элчин сайд Б.Баярсайхан: С.Батболдын гарын хүн, бизнесийн хамтрагч Д.Цогтбаатар хаана явна тэр газар Б.Баярсайхан сүүдэр мэт дагадаг. Д.Цогтбаатар 2008-2012 онд Гадаад хэргийн яамны Төрийн нарийн бичгийн даргаар ажиллаж байх үед Б.Баярсайхан ГХЯ-ны Төрийн захиргаа, удирдлагын газрын захирлаар ажиллаж байв. Улмаар Д.Цогтбаатар 2014-2015 онд Барилга, хот байгуулалтын сайдаар ажиллахдаа Б.Баярсайханыг мөн чирч тус яамны Төрийн захиргааны удирдлагын газрын даргаар авч явсан.

Б.Баярсайхан хуульч болохоос дипломатч биш. Хорин жил зүтгэж байж авдаг дипломат албаны цолыг 4 жилийн дотор УИХ-ын дарга Г.Занданшатараас гардсан ч салбарынхандаа үнэлэгддэггүй нэгэн. Нам ялбал албан тушаалтай, ялагдвал гудамжинд лааз өшиглөж явдаг “зорилгогүй”-чүүдийн өрөөсөн дугуй. МАН 2008-2012 онд парламентад олонх болоход тэр ГХЯ-нд Төрийн захиргаа удирдлагын газрын дарга хийж байсан бол 2012-2016 онуудад нам ялагдахад хувийн хэвшилд ажиллаж, дахин олонх болоход Гадаад харилцааны яаманд эргэн ирсэн зуугуул гэдгийг орхигдуулж болохгүй.

Кувейт улсад суух онц бөгөөд бүрэн эрхт Элчин сайд Н.Наранбат: С.Батболд гадаад харилцааны дэд сайдаар ажиллаж эхлэх болсон үеэс зуузай холбон яваа. Хожим Засгийн газрын тэргүүн болоход Төрийн ёслолын газрын дэд захирал болон дэвшсэн.

Гэвч хар тамхи, контарбандын хэрэгт холбогдож, 2019 онд түүнийг ГХЯ-наас эгүүлэн татаж байсан. Гэтэл буцаад Элчин сайдаар томилуулахаар зүтгүүлсэн нь С.Батболдын хүч нөлөө хэр байгааг харуулж буй хэрэг.

Польшийн Цагдаагийн газраас түүнийг хууль бус эд зүйл, тамхи, хар тамхи зөөвөрлөсөн хэргээр эрэн сурвалжилж байсан удаатай. УИХ-ын дэд дарга Т.Аюурсайхан Польш улсын хилээр эргэж орохгүйгээр хуулийн хоригт орсон 69 иргэний нэрийг зарлахад тэр багтаж байсан юм. Ийнхүү гадаад оронд муу нэртэй энэ хүнийг дахин илгээхээр зэхэж нэрийг нь оруулсан Л.Оюун-Эрдэнийн Засгийн газрын хэр хэмжээ дэндүү гутамшигтай.

Ийм бусармаг, ичгүүргүй нөхдийг Ерөнхийлөгч У.Хүрэлсүх зөвшөөрвөл дипломат харилцаатай гадны улс орнуудыг хэрхэн үнэлж, хүндэтгэж байгаагийн илэрхийлэл нь болно гэсэн үг.

Уг нь Элчин сайдуудыг Засгийн газар, холбогдох яам нь санал болгоод Засгийн газрын хуралдаанаар хэлэлцээд Ерөнхийлөгчид нэр нь очдог ч эсрэгээрээ энэ бүх нэрс У.Хүрэлсүх, Сү.Батболд, Д.Цогтбаатар, Б.Батцэцэг нарын шүүлтүүрээр эхлээд орсон гэлцэж байгаа.

Энэ ч хардлагын үүднээс Монголын эмэгтэй дипломат ажилтнуудын төлөөлөл Гадаад харилцааны сайд, дэд сайд, төрийн нарийн бичгийн дарга нарт заавал хариулахыг шаардсан асуулга тавьсан биз. Асуулгыг бүрэн эхээр хүргэе.

“Гадаад харилцааны сайд Б.Батцэцэг, Дэд сайд Б.Мөнхжин, Төрийн нарийн бичгийн дарга Н.Анхбаяр танаа

Элчин сайдын томилгооны асуудлаар.

Монгол Улсыг гадаад орнуудад төлөөллөн ажиллах ДТГ-ын тэргүүн нарыг томилох ажил багагүй хугацаанд гацсаны дараагаар 25 ДТГ-ын тэргүүнд нэр дэвшүүлэх асуудлыг тус яамны саналыг үндэслэн Засгийн газрын хуралдаанаар хэлэлцэн дэмжсэн тухай мэдээллийг бид хэвлэл мэдээллийн хэрэгслээр авлаа. Элчин сайдад нэр дэвшүүлэх явц ил тод бус байдалд явагдсаны зэрэгцээ зарим нэр дэвшигчийг ямар шалгуураар сонгосон нь ойлгомжгүй байгаад яамны ажилтнууд ихэд гайхаж байгаа тул эмэгтэй дипломат ажилтнуудын төлөөлөл бид энэ асуудлаар яамны удирдлагад хандаж байна.

Улс эх орон, яамныхаа нэр хүндийг хувийн сонирхолоос ямагт дээдэлж, дипломат албанд хоёргүй сэтгэлээр зүтгэж ирсэн хүмүүсийн хувьд “олгой хагаравч тогоон дотроо” гэдгийг санан, уг асуудлаарх байр сууриа эхний ээлжинд яамны удирдлагуудад илэрхийлэх нь зөв гэж үзсэн болно. Энэ асуудал нь элчин сайдаар ажиллах болзол, шалгуурыг хангасан гэж үзэн тодорхой оронд томилогдох саналаа яамны удирдлагуудад илэрхийлж байсан, яамны системд 20 гаруй жил, түүний дотор зөвлөх болон түүнээс дээш албан тушаалд 10 гаруй жил ажилласан бидний асуудал биш, цаашид дипломат албаны нэр хүн, ажлын үр дүнтэй холбоотой. Улмаар төрийн тусгай энэ албанд тууштай ажиллах эсэхдээ эргэлзэн, бидний байдлыг анхаарч байгаа өсөх ирээдүйтэй ажилтнуудын хувь заяатай холбоотой тул бид энэ шударга бус байдлыг харж, мэдэрч буй хэрнээ дуугүй өнгөрч хэрхэвч болохгүй гэж үзлээ.

Бид яамны удирдлага биднийг хүлээн авч уулзан, АНУ, Кувейт, Франц, Сингапур, Швейцар улсад Элчин сайдаар ажиллахаар нэр дэвшигчдийг ямар шалгуураар сонгосон тухайгаа танилцуулахыг хүсэж байна.

-Яагаад манай чухал “гуравдагч хөрш” болох АНУ-д сэтгүүлч-аялагч, хэлний мэдлэгийн хувьд тааруу, яриа хэлэлцээрийн ур чадваргүй хүнийг томилохыг дэмжив? Олон улсын харилцааны улам бүр хурцдаж буй өнөөгийн нөхцөл байдалд их гүрнүүдээс шууд болон шууд бусаар бидэнд үзүүлдэг дипломат дарамтыг энэ хүн дааж, улсын язгуур эрх ашгийг хамгаалж чадах уу? Ийм хүн томилохыг нөгөө улс хэрхэн хүлээн авахыг та бүхэн эрхбиш тунгаан бодно биз ээ.

-Яагаад Польш улсын хүчний байгууллагын хар жагсаалтад орсны улмаас өмнө ажиллаж байсан улсаас хугацаанаас нь өмнө татсан, эх орондоо ирснээс хойш ажилласан тайлангаа тавих бүү хэл яамаар ч үзэгдэхгүй хүнийг дахин томилохыг дэмжив? Энэ жагсаалтад орсон зарим хүнийг ажлаас нь халсан, заримыг нь яамандаа авахгүй байгаа бус уу?
-Яагаад манай өөр нэг чухал “гуравдагч хөрш” Франц улсад сүүлийн 2 жил орчмын хугацаанд түр хамаарагч ажиллуулсны дараагаар ЭСЯ-нд нэгдүгээр нарийн бичгийн даргаар дөнгөж томилогдсон хүнийг огцом дээшлүүлэн томилохыг дэмжив? Нэгдүгээр нарийн бичгийн даргаас Элчин сайд болж болдог юм бол бид мэтийн зөвлөх, дэд захирал, захирлын албан тушаалыг цөөнгүй жил хашсан хүмүүс цаашид юунд найдаж, юунд тэмүүлэн ажиллах вэ?
-Яагаад дипломат албыг цалин хөлс багатай ч ачаалал ихтэй хэмээн голж олон жилийн өмнө орхин гарсан хүнийг Ази тив дэх чухал түнш оронд томилохыг дэмжив?
-Яагаад өмнө нь хоёр удаа Элчин сайдаар ажилласны дараа өвчний шалтгаанаар хүсэлт гарган үргэлжлүүлэн гадаадад ажилласан, өөрөөр хэлбэл сүүлийн 7 жил гадаадад ажилласан хүн 3 дахь удаагаа Элчин сайдаар ажиллахыг яамны удирдлага дэмжив? Энэ хүнд 3 дахь удаагаа Элчин сайдаар ажиллах боломжийг гадаад оронд ажиллаж байхад нь олгосон хэрнээ сүүлийн 4-5 жил төвд ажилласан бидэнд яагаад нэг удаа Элчин сайдаар ажиллах боломж олгохгүй байна вэ?

Дээрх нэр дэвшигчидтэй холбоотой шударга бус байдал бидний ажиллах эрч хүч, урам зоригийг мохоож байгаагийн зэрэгцээ бид үүний улмаас  залуу ажилтнуудын авч буй буруу ойлголтод санаа зовж байна. Улс, яамны төлөө хоёргүй сэтгэлээр зүтгэж ажиллах хэрэггүй, ажлаа унагачихгүй хэмжээнд бай, хажуугаар нь дээрээс татах хүнтэй ойрт, мөнгө хуримтлуул, тэгвэл “тооноор орж ирэн Элчин сайд болох боломжтой” гэсэн ойлголтыг залуу ажилтнуудад өгч байна шүү дээ.

Биднийг хүлээн авч уулзан, цаашид Элчин сайд нарын томилгоонд баримтлах бодлого, зарчмын талаар нээлттэй ярилцана хэмээн найдаж байна.

Т.Батцэцэг, Э.Сарантогос, В.Оюу, Д.Гэрэлмаа, Б.Болормаа

2021.06.30

Алтанбулаг боомтын зорчигч тээврийн хөдөлгөөнийг түр зогсооно

/


Засгийн газрын ээлжит бус хуралдаан өнөөдөр болж дараах асуудлуудыг хэлэлцэн шийдвэрлэлээ
 
Үндэсний их баяр наадмыг нэг жилээр хойшлууллаа
 
Коронавируст халдварын тархалт нэмэгдэж, нөхцөл байдал хүндэрч байгаатай холбогдуулан Тулгар төрийн 2230, Их Монгол Улсын 815, Ардын хувьсгалын 100 жилийн ой, Үндэсний их баяр наадмыг улсын хэмжээнд нэг жилээр хойшлууллаа.
Мөн аймаг, сумдын баяр наадам, хурдан морины бүсийн уралдаан, уул овооны тахилга, ой тэмдэглэх зэрэг нийтийг хамарсан арга хэмжээ зохион байгуулахгүй байхыг бүх шатны Засаг дарга нарт үүрэг болгов.
 
 Алтанбулаг боомтын зорчигч тээврийн хөдөлгөөнийг түр зогсооно
 
Коронавируст халдварын цар тахлаас урьдчилан сэргийлэх, эрсдэлийг бууруулах зорилгоор Монгол-Оросын хилийн Алтанбулаг автозамын боомтоор улсын хил нэвтрэх зорчигч тээврийн хөдөлгөөнийг 2021 оны долдугаар сарын 7-ны өдрөөс 2021 оны долдугаар сарын 31-ний өдрийг дуустал түр зогсоохоор Засгийн газрын ээлжит бус хуралдаанаас шийдвэрлэлээ.
 
Товч мэдээ
Коронавируст халдвар цар тахлын үед экспортын хэмжээг нэмэгдүүлэх зорилгоор нүүрс экспортолж буй хилийн боомт, улсын хилийн бүс, зурвас газарт чингэлэг тээврийн терминалууд байгуулахаар боллоо.
Хилийн Замын-Үүд, Гашуун сухайт боомтын экспорт, импортын үйл ажиллагааг зохицуулах үүрэг бүхий Ажлын хэсэг байгуулав. Ажлын хэсгийг Хууль зүй, дотоод хэргийн сайд Х.Нямбаатар ахална гэж Засгийн газрын Хэвлэл мэдээлэлтэй харилцах газраас мэдээллээ

Өндөржүүлсэн бэлэн байдлын зэрэгт шилжүүлсэн хугацааг сунгалаа

/

Засгийн газраас өндөржүүлсэн бэлэн байдлын зэрэгт шилжүүлсэн хугацааг наймдугаар сарын 31-ныг хүртэл сунгах шийдвэр гаргажээ.

Өндөржүүлсэн бэлэн байдлын “Улбар шар” түвшинд 18 аж ахуй нэгж, салбарын үйл ажиллагааг хязгаарладаг. Салбарын үйл ажиллагааг хязгаарласан ч хариуцлагын гэрээний хүрээнд зарим нэгжийг нээсэн хэмээн Ерөнхий сайдын хэвлэлийн төлөөлөгч Ч.Болортуяа хэллээ.

Өөр нэгэн сунгаж байгаа өөрчлөлт бол хилийн зарим боомтын зорчигч тээврийн хөдөлгөөнийг түр зогсоосон хугацааг сунгаж байна. Тодруулбал, агаарын замын Чингис хаан, автозамын Замын-Үүд, Алтанбулаг боомтоос бусад боомтын хөдөлгөөнийг түр зогсоох хугацаа наймдугаар сарын 31-нд дуусах ажээ.

Засгийн газрын ээлжит бус хуралдаанаас гарсан шийдвэрийг танилцууллаа

/

Засгийн газрын өнөөдрийн ээлжит бус хуралдаанаар эрүүл мэндийн салбарт санхүүжилтийг нэмэгдүүлэх төсвийн тодотголыг хэлэлцэж, УИХ-д өргөн барихаар болсон байна. Энэ талаар Ерөнхий сайдын Хэвлэлийн төлөөлөгч Ч.Болортуяа танилцууллаа.

Энэхүү төсвийн тодотголд айл, өрхийн орлогыг нэмэгдүүлэх зорилгоор хүүхэд бүрд олгох 100,000 төгрөгийг он дуустал үргэлжлүүлэх тухай тусгажээ. Үүний зэрэгцээ айл өрх, аж ахуйн нэгжийн цахилгаан, дулаан, ус, хог хаягдлын төлбөрийн хөнгөлөлтийг он дуустал олгохоор тус тус тусгасан байна.

Түүнээс гадна эрүүл мэндийн салбарт нэмж 700 тэрбум гаруй төгрөгийн санхүүжилт олгохоор тусгалаа.

Уг санхүүжилтийг цар тахалтай тэмцэж буй буюу улаан бүсэд ажиллаж байгаа 13 мянган эмч, эмнэлгийн ажилчинд нэг удаагийн хоёр сая төгрөгийн тэтгэмж, улаан бүсэд биш ч эрүүл мэндийн бусад салбарт ажиллаж байгаа 19.5 мянган ажилчинд нэг удаагийн нэг сая төгрөгийн тэтгэмж олгохоор тусгасан.

Мөн улаан бүсэд ажиллаж байгаа эмч, эмнэлгийн ажилчдын цалинг 50 хувиар нэмэгдүүлэх санал оруулжээ.

Хүүхдийн мөнгө, ААН, айл өрхөд үзүүлж буй дэмжлэгийг үргэлжлүүлэх саналаа УИХ-д өргөн мэдүүлнэ

Монгол Улсын Ерөнхий сайд Л.Оюун-Эрдэнэ өчигдөр/2021.06.25/ КОВИД19-ын хүндрэлийг давахад Эрүүл мэндийн салбарт оруулах нэмэлт санхүүжилт, хүүхдийн 100 мянган төгрөгийн мөнгөн тэтгэмж, ААН, айл өрхийн хэрэглээний зарим зардлыг төрөөс төлөх шийдвэрээ тус тус он дуустал үргэлжлүүлэх тухай Засгийн газрын саналаа ҮАБЗ-д танилцууллаа.

Монгол Улсын Ерөнхийлөгч У.Хүрэлсүх, УИХ-ын дарга Г.Занданшатар нар дэмжиж ажиллахаа илэрхийлжээ.Иймд Засгийн газраас ирэх 7 хоногт багтаан доор дурдсан иргэд, аж ахуйн нэгж, айл өрхөд үзүүлж буй зарим дэмжлэгийг үргэлжлүүлэх, эрүүл мэндийн салбарт зайлшгүй шаардлагатай нэмэлт санхүүжилтийн талаарх авч хэрэгжүүлэх арга хэмжээний нарийвчилсан төлөвлөгөөгөө гаргаж УИХ-д өргөн мэдүүлэхээр болов.

Үүнд:

– Эрүүл мэндийн салбарт 668 тэрбум төгрөгийн нэмэлт санхүүжилт хийнэ. Оношилгоо, шинжилгээ, хүчилтөрөгчийн нөөцийг нэмэгдүүлэх, уушги орлуулагч аппаратны нөөц бүрдүүлж, эмнэлэгийн орыг нэмэгдүүлэх, орон нутагт коронавирусын халдварыг эмчлэх чадавхийг дэмжих, халдварын улаан бүсэд ажиллаж байгаа эмч нарын цалин, урамшууллыг нэмэхэд шаардагдах төсөв багтаж буй.

Айл өрхүүд, аж ахуй нэгжүүдийн орлогыг дэмжих хүрээнд:

– Хүүхдийн 100 мянган төгрөгийн мөнгөн тэтгэмжийг 2021 оны арванхоёрдугаар сарын 31-ний өдөр хүртэл сунгахаар,

– ААН, өрхийн цахилгаан дулаан, цэвэр, бохир ус, хог хаягдлын хураамжийг төрөөс төлөх шийдвэрээ 2021 оны арванхоёрдугаар сарын 31-ний өдөр хүртэл сунгахаар,

– Сайжруулсан шахмал түлшний үнийг 50 хувиар хөнгөлөх арга хэмжээг 2022 оны гуравдугаар сар хүртэл сунгах зэрэг асуудлууд багтах юм.

Мэдээ орчуулах »